ജിസിഎസ്ഇ ഫലം ഇനി വിരൽത്തുമ്പിൽ; പുതിയ മൊബൈൽ ആപ്പ് ഈ വർഷം മുതൽ

ലണ്ടൻ : ഇംഗ്ലണ്ടിലുടനീളമുള്ള ജിസിഎസ്ഇ വിദ്യാർത്ഥികൾക്ക് ഈ ഓഗസ്റ്റ് മുതൽ തങ്ങളുടെ പരീക്ഷാഫലം മൊബൈൽ ഫോണിലൂടെ തൽസമയം അറിയാൻ സാധിക്കും. വിദ്യാഭ്യാസ റെക്കോർഡുകൾ ഡിജിറ്റലൈസ് ചെയ്യുന്നതിന്റെ ഭാഗമായി സർക്കാർ പുറത്തിറക്കുന്ന പുതിയ "എജുക്കേഷൻ റെക്കോർഡ്" ആപ്പിലൂടെയാണ് ഈ സേവനം ലഭ്യമാകുക. കഴിഞ്ഞ വർഷം മാഞ്ചസ്റ്ററിലും വെസ്റ്റ് മിഡ്‌ലാൻഡ്‌സിലുമായി 95,000 വിദ്യാർത്ഥികളിൽ നടത്തിയ പരീക്ഷണാടിസ്ഥാനത്തിലുള്ള പദ്ധതി വിജയകരമായതിനെ തുടർന്നാണ് ഇത് രാജ്യം മുഴുവൻ നടപ്പിലാക്കാൻ തീരുമാനിച്ചത്. ഭാവിയിൽ ജോലിക്കോ ഉന്നത വിദ്യാഭ്യാസത്തിനോ അപേക്ഷിക്കുമ്പോൾ ഈ ഡിജിറ്റൽ സർട്ടിഫിക്കറ്റുകൾ ഔദ്യോഗിക രേഖയായി ഉപയോഗിക്കാമെന്നത് വിദ്യാർത്ഥികൾക്ക് വലിയ സൗകര്യമാകും.

പരീക്ഷാഫലം ആപ്പിൽ ലഭ്യമാകുമെങ്കിലും ഫലപ്രഖ്യാപന ദിവസം വിദ്യാർത്ഥികൾ സ്കൂളുകളിൽ നേരിട്ടെത്തണമെന്നാണ് അധികൃതർ നൽകുന്ന നിർദ്ദേശം. ഫലത്തിന് പിന്നാലെ അധ്യാപകരിൽ നിന്ന് ആവശ്യമായ ഉപദേശങ്ങളും തുടർപഠനത്തിനുള്ള പിന്തുണയും ഉറപ്പാക്കാനാണ് ഈ നിർദ്ദേശം നൽകിയിരിക്കുന്നത്. ഫലപ്രഖ്യാപന ദിവസം രാവിലെ 8 മണി മുതൽ സ്കൂളുകളിൽ നിന്ന് നേരിട്ട് ഗ്രേഡ് ഷീറ്റുകൾ അടങ്ങിയ കവറുകൾ വാങ്ങാം. എന്നാൽ ആപ്പിൽ ഫലങ്ങൾ അപ്‌ഡേറ്റ് ചെയ്യപ്പെടുക രാവിലെ 11 മണിയോടെ മാത്രമായിരിക്കും. സ്കൂളുകൾ വഴി മുൻകൂട്ടി രജിസ്റ്റർ ചെയ്യുന്ന വിദ്യാർത്ഥികൾക്ക് മാത്രമേ ഈ സൗകര്യം പ്രയോജനപ്പെടുത്താൻ സാധിക്കൂ.

പുതിയ ഡിജിറ്റൽ സംവിധാനം വഴി സ്കൂളുകൾക്കും കോളേജുകൾക്കുമായി പ്രതിവർഷം 30 മില്യൺ പൗണ്ട് വരെ ലാഭിക്കാൻ സാധിക്കുമെന്നാണ് വിദ്യാഭ്യാസ വകുപ്പിന്റെ കണക്കുകൂട്ടൽ. രേഖകൾ കൈമാറുന്നതിനും പകർപ്പുകൾ എടുക്കുന്നതിനുമുള്ള അമിത ജോലിഭാരത്തിൽ നിന്ന് അധ്യാപകരെയും ജീവനക്കാരെയും മോചിപ്പിക്കാൻ ഇതിലൂടെ സാധിക്കുമെന്ന് സ്കിൽസ് മന്ത്രി ബറോണസ് ജാക്വി സ്മിത്ത് പറഞ്ഞു. സർട്ടിഫിക്കറ്റുകൾ നഷ്ടപ്പെടുമെന്ന ഭീതിയില്ലാതെ വിദ്യാർത്ഥികൾക്ക് എപ്പോഴും തങ്ങളുടെ ഫലങ്ങൾ ആക്സസ് ചെയ്യാൻ ഈ ആപ്പ് സഹായിക്കും. ഇംഗ്ലീഷ്, കണക്ക് തുടങ്ങിയ വിഷയങ്ങളിൽ അധിക പിന്തുണ ആവശ്യമുള്ള കുട്ടികളെയും സൗജന്യ ഭക്ഷണത്തിന് അർഹതയുള്ളവരെയും ആപ്പ് വഴി എളുപ്പത്തിൽ തിരിച്ചറിയാൻ സ്ഥാപനങ്ങൾക്കും സാധിക്കും.

English Summary: GCSE students in England can access their exam results via the "Education Record" app starting this summer, though results will appear on the app at 11 AM following the 8 AM school release.