യുകെയിലെ ലിവർപൂളിൽ മലയാളി യുവാവിനെ മരിച്ച നിലയിൽ കണ്ടെത്തി

ലണ്ടൻ : ഉപരിപഠനത്തിനായി യുകെയിലെത്തിയ കൊല്ലം സ്വദേശിയായ യുവാവിനെ ലിവർപൂളിലെ താമസസ്ഥലത്ത് മരിച്ച നിലയിൽ കണ്ടെത്തി. കൊല്ലം കൊട്ടിയം സ്വദേശിയായ ശ്രീരാജ് (26) ആണ് മരിച്ചത്. ലിവർപൂൾ യൂണിവേഴ്സിറ്റിയിൽ മെക്കാനിക്കൽ എൻജിനീയറിംഗ് വിദ്യാർത്ഥിയായ ഇദ്ദേഹം പഠനത്തോടൊപ്പം ലിവർപൂൾ വിമൻസ് ഹോസ്പിറ്റലിൽ താൽക്കാലിക ജീവനക്കാരനായും പ്രവർത്തിച്ചു വരികയായിരുന്നു. കഴിഞ്ഞ രണ്ട് ദിവസമായി ഇദ്ദേഹത്തെക്കുറിച്ച് വിവരങ്ങൾ ഒന്നും ലഭ്യമല്ലാത്തതിനെ തുടർന്ന് സുഹൃത്തുക്കൾ പോലീസിനെ വിവരം അറിയിക്കുകയായിരുന്നു. തുടർന്ന് പോലീസ് നടത്തിയ പരിശോധനയിലാണ് അപ്പാർട്ട്മെന്റിനുള്ളിൽ മൃതദേഹം കണ്ടെത്തിയത്.

മേഴ്സിസൈഡ് പോലീസ് സ്ഥലത്തെത്തി ഇൻക്വസ്റ്റ് നടപടികൾ പൂർത്തിയാക്കി മൃതദേഹം മോർച്ചറിയിലേക്ക് മാറ്റിയിട്ടുണ്ട്. മരണകാരണം സംബന്ധിച്ച കൂടുതൽ വിവരങ്ങൾ നിലവിൽ ലഭ്യമായിട്ടില്ല. രണ്ട് വർഷം മുൻപാണ് ശ്രീരാജ് ഉപരിപഠനത്തിനായി ലണ്ടനിലെത്തിയത്. അപ്രതീക്ഷിതമായി ഉണ്ടായ ഈ വേർപാടിന്റെ ഞെട്ടലിലാണ് ലിവർപൂളിലെ മലയാളി സമൂഹം. പരേതന്റെ വിയോഗത്തിൽ യുകെ മലയാളി ന്യൂസ് ആഴത്തിലുള്ള ദുഃഖവും ആദരാഞ്ജലികളും രേഖപ്പെടുത്തുന്നു.

English Summary

A 26-year-old Malayali student from Kollam was found deceased in his residence in Liverpool, UK.