ഫ്രാൻസിലും സ്പെയിനിലും കാട്ടുതീ രൂക്ഷം; പതിനായിരക്കണക്കിന് ആളുകളെ ഒഴിപ്പിച്ചു

 ഫ്രാൻസിന്റെ തെക്കുപടിഞ്ഞാറൻ തീരത്തെ പ്രമുഖ വിനോദസഞ്ചാരകേന്ദ്രമായ ക്യാപ് ഫെററ്റ് ഉപദ്വീപിൽ കാട്ടുതീ പടർന്നതിനെ തുടർന്ന് പതിനായിരക്കണക്കിന് ആളുകളെ ഒഴിപ്പിച്ചു. അറ്റ്ലാന്റിക് സമുദ്രത്തിനും ആർക്കഷോൺ ഉൾക്കടലിനുമിടയിലുള്ള ഉപദ്വീപിൽ നിന്ന് ഏകദേശം 40,000 പേരെ റോഡിലൂടെയും ബോട്ടുകളിലൂടെയും സുരക്ഷിത കേന്ദ്രങ്ങളിലേക്ക് മാറ്റിയതായി ഫ്രഞ്ച് ആഭ്യന്തരമന്ത്രി അറിയിച്ചു. ചൊവ്വാഴ്ച ആരംഭിച്ച തീയിൽ ജിറോണ്ട് മേഖലയിൽ 10,000 ഹെക്ടറോളം പ്രദേശം കത്തിനശിക്കുകയും 53 വീടുകളും ഒരു ക്യാമ്പ് കേന്ദ്രവും നശിക്കുകയും ചെയ്തു.

ബിസ്കറോസ്, പാരന്റിസ്-എൻ-ബോൺ മേഖലകളിൽ നിന്ന് 23,000ത്തിലധികം പേരെയും ഒഴിപ്പിച്ചു. വീടുകൾ, ക്യാമ്പ് കേന്ദ്രങ്ങൾ, വയോജന പരിചരണകേന്ദ്രം, വേനൽക്കാല ക്യാമ്പ് എന്നിവിടങ്ങളിൽ നിന്നാണ് ആളുകളെ മാറ്റിയത്. മണിക്കൂറിൽ 50 കിലോമീറ്റർ വരെ വേഗമുള്ള കാറ്റും 36 മുതൽ 37 ഡിഗ്രി സെൽഷ്യസ് വരെയുള്ള ചൂടും തീ നിയന്ത്രിക്കുന്നതിന് തടസ്സമാകുന്നുണ്ട്. ഫ്രാൻസിൽ ഇതുവരെ നൂറിലധികം വീടുകളും മറ്റ് കെട്ടിടങ്ങളും ഭാഗികമായോ പൂർണമായോ നശിച്ചതായി അധികൃതർ അറിയിച്ചു. തീ അണയ്ക്കുന്നതിനിടെ രണ്ട് അഗ്നിരക്ഷാസേനാംഗങ്ങൾ മരിച്ചിരുന്നു.

അതേസമയം, മാഡ്രിഡിന് സമീപമുള്ള വിവിധ പ്രദേശങ്ങളിൽ കാട്ടുതീ നിയന്ത്രണാതീതമായി പടർന്നതോടെ സ്പെയിൻ സർക്കാർ ദേശീയ അടിയന്തരാവസ്ഥ പ്രഖ്യാപിച്ചു. വില്ല ഡെൽ പ്രാഡോ, സാൻ മാർട്ടിൻ ഡെ വാൽഡെയ്ഗ്ലെസിയാസ്, ബുർഗോഹോണ്ടോ മേഖലകളിൽ നിന്ന് 10,000ത്തിലധികം പേരെ ഒഴിപ്പിച്ചു. തീ നിയന്ത്രിക്കാൻ യൂറോപ്യൻ യൂണിയൻ ഫ്രാൻസിലേക്ക് വിമാനങ്ങളും ഹെലികോപ്റ്ററുകളും സ്പെയിനിലേക്ക് അധിക വിമാനങ്ങളും അയച്ചു. കനത്ത ചൂടും വരണ്ട കാലാവസ്ഥയും ശക്തമായ കാറ്റും യൂറോപ്പിലെ കാട്ടുതീ ഭീഷണി വർധിപ്പിക്കുന്നതായി കാലാവസ്ഥാ വിദഗ്ധർ മുന്നറിയിപ്പ് നൽകി.