NEET റീടെസ്റ്റിന് മുൻപ് വിവാദം; നാഗ്പൂർ വിദ്യാർത്ഥിക്ക് അബുദാബി സെന്റർ, വിശദീകരണവുമായി NTA

ന്യൂഡൽഹി : രാജ്യത്തെ മെഡിക്കൽ പ്രവേശന പരീക്ഷയായ NEET-UG 2026 റീടെസ്റ്റിന് മണിക്കൂറുകൾ മാത്രം ബാക്കി നിൽക്കെ പരീക്ഷാകേന്ദ്രവുമായി ബന്ധപ്പെട്ട വിവാദം ചർച്ചയായി. മഹാരാഷ്ട്രയിലെ നാഗ്പൂരിൽ നിന്നുള്ള ഒരു വിദ്യാർത്ഥിയുടെ അഡ്മിറ്റ് കാർഡിൽ പരീക്ഷാകേന്ദ്രമായി യുഎഇയിലെ അബുദാബി രേഖപ്പെടുത്തിയതോടെയാണ് വിവാദം ഉയർന്നത്. സ്വന്തം സംസ്ഥാനത്ത് പരീക്ഷ എഴുതേണ്ട വിദ്യാർത്ഥിക്ക് വിദേശത്തെ കേന്ദ്രം അനുവദിച്ചെന്ന ആരോപണം സമൂഹമാധ്യമങ്ങളിലും ദേശീയ മാധ്യമങ്ങളിലും വലിയ ചർച്ചയായി.

എന്നാൽ സംഭവത്തിൽ വിശദീകരണവുമായി നാഷണൽ ടെസ്റ്റിംഗ് ഏജൻസി രംഗത്തെത്തി. പരീക്ഷാകേന്ദ്രം NTA ഏകപക്ഷീയമായി മാറ്റിയതല്ലെന്നും, വിദ്യാർത്ഥിയുടെ തന്നെ രജിസ്റ്റർ ചെയ്ത ലോഗിൻ വഴിയാണ് അബുദാബി കേന്ദ്രം തിരഞ്ഞെടുത്തതെന്നും ഏജൻസി വ്യക്തമാക്കി. NEET-UG റീടെസ്റ്റ് ജൂൺ 21-ലേക്ക് മാറ്റിയതിന് പിന്നാലെ, വിദ്യാർത്ഥികൾക്ക് പരീക്ഷാകേന്ദ്രം തിരുത്താനുള്ള സൗകര്യം നൽകിയിരുന്നെന്നും, അതിനിടെയാണ് കേന്ദ്രം മാറ്റം നടന്നതെന്നുമാണ് NTAയുടെ വിശദീകരണം.

വിവാദം ശക്തമായതിനെ തുടർന്ന് ബന്ധപ്പെട്ട വിദ്യാർത്ഥിയുടെ പരീക്ഷാകേന്ദ്രം പിന്നീട് നാഗ്പൂരിലേക്ക് മാറ്റി പുതിയ അഡ്മിറ്റ് കാർഡ് നൽകിയതായും റിപ്പോർട്ടുകളുണ്ട്. പേപ്പർ ചോർച്ചയും പരീക്ഷാ ക്രമക്കേടുകളും നേരത്തെ തന്നെ NEET പരീക്ഷയെ ദേശീയതലത്തിൽ വലിയ വിവാദത്തിലാക്കിയ സാഹചര്യത്തിലാണ് പുതിയ സംഭവം വീണ്ടും NTAയുടെ പരീക്ഷാ നടത്തിപ്പ് രീതിയെക്കുറിച്ചുള്ള ചോദ്യങ്ങൾ ഉയർത്തുന്നത്. അതേസമയം, റീടെസ്റ്റ് സുഗമമായും സുരക്ഷിതമായും നടത്താൻ ആവശ്യമായ ഒരുക്കങ്ങൾ പൂർത്തിയായതായി NTA അറിയിച്ചു.

The NEET-UG 2026 re-test has triggered fresh debate after a Nagpur student’s admit card showed Abu Dhabi as the exam centre, while NTA says the centre was selected through the candidate’s own login.