പ്രതിരോധ ചെലവിന് പണം കണ്ടെത്താൻ യുകെയിൽ നികുതി കൂടുമോ? ആശങ്ക ശക്തമാകുന്നു

ലണ്ടൻ : യുകെയിൽ പ്രതിരോധ മേഖലയ്ക്കുള്ള ബജറ്റ് കണ്ടെത്താനായി വീണ്ടും നികുതി കൂട്ടേണ്ടി വരുമോ എന്ന ആശങ്ക ശക്തമാകുന്നു. പ്രതിരോധ സെക്രട്ടറി ജോൺ ഹീലി രാജിവെച്ചതോടെ, ഈ വിഷയത്തിൽ സർക്കാരിനുള്ളിലെ ഭിന്നതകൾ കൂടുതൽ പരസ്യമായിരിക്കുകയാണ്. റഷ്യ ഉൾപ്പെടെയുള്ള രാജ്യങ്ങളിൽ നിന്നുള്ള സുരക്ഷാ ഭീഷണികൾ നേരിടാൻ പ്രതിരോധ ചെലവ് വൻതോതിൽ കൂട്ടണമെന്ന ആവശ്യം ശക്തമാകുമ്പോൾ, വരും വർഷങ്ങളിൽ പ്രതിരോധ ചെലവ് ജിഡിപിയുടെ 3.5 ശതമാനമാക്കുകയാണ് ലേബർ സർക്കാരിന്റെ ലക്ഷ്യം.

ഇതിന് ആവശ്യമായ ഭീമമായ തുക കണ്ടെത്താൻ ചെലവ് ചുരുക്കുക, കൂടുതൽ കടമെടുക്കുക അല്ലെങ്കിൽ നികുതി വർധിപ്പിക്കുക എന്നീ വഴികളാണ് സർക്കാരിന് മുന്നിലുള്ളത്. ആദായ നികുതി കൂട്ടുന്നതടക്കമുള്ള കടുത്ത തീരുമാനങ്ങൾ ചാൻസലർ റേച്ചൽ റീവ്സിന് എടുക്കേണ്ടി വരുമെന്നാണ് സാമ്പത്തിക വിദഗ്ധരുടെ വിലയിരുത്തൽ. എന്നാൽ വാറ്റ്, ഇൻകം ടാക്സ്, നാഷണൽ ഇൻഷുറൻസ് എന്നിവ കൂട്ടില്ലെന്നായിരുന്നു ലേബർ പാർട്ടിയുടെ തിരഞ്ഞെടുപ്പ് വാഗ്ദാനം. അതിനാൽ തന്നെ നികുതി വർധനവ് സർക്കാരിന് വലിയ രാഷ്ട്രീയ തിരിച്ചടിയാകാൻ സാധ്യതയുണ്ട്. പ്രതിരോധ ആവശ്യങ്ങൾക്കായി മാത്രമായി പ്രത്യേക ‘ഡിഫൻസ് ലെവി’ കൊണ്ടുവരുന്നതും പരിഗണനയിലുണ്ടെന്നാണ് റിപ്പോർട്ടുകൾ.

ക്യാപിറ്റൽ ഗെയിൻസ് ടാക്സ്, ഇൻഹെറിറ്റൻസ് ടാക്സ് എന്നീ മേഖലകളിലും മാറ്റങ്ങൾ വന്നേക്കാമെന്നാണ് വിലയിരുത്തൽ. ക്യാപിറ്റൽ ഗെയിൻസ് ടാക്സ് നിരക്കുകൾ സാധാരണ ഇൻകം ടാക്സ് നിരക്കുകൾക്ക് തുല്യമാക്കുക, സമ്മാനങ്ങൾ നൽകി പാരമ്പര്യ നികുതിയിൽ നിന്ന് ഒഴിഞ്ഞുമാറാനുള്ള കാലാവധി 7 വർഷത്തിൽ നിന്ന് 10 വർഷമാക്കുക തുടങ്ങിയ നിർദേശങ്ങളും ചർച്ചയിലുണ്ട്. പഴയ യുദ്ധകാലത്തെപ്പോലെ ജനങ്ങളിൽ നിന്ന് പണം സമാഹരിക്കാൻ ‘വാർ ബോണ്ടുകൾ’ ഇറക്കുന്ന കാര്യവും പരിഗണനയിൽ വരാം. ജനങ്ങളെയും നിക്ഷേപകരെയും ഒരുപോലെ തൃപ്തിപ്പെടുത്തി പ്രതിരോധ ചെലവിനുള്ള പണം കണ്ടെത്തുക എന്നത് സർക്കാരിന് കടുത്ത വെല്ലുവിളിയായി മാറുകയാണ്.

Concerns are growing that the UK may need to raise taxes or introduce new levies to fund rising defence spending.