ഹെൻറി നൊവാക് കൊലപാതകം: ഇത് സിഖ് മതവുമായി ബന്ധപ്പെട്ടതല്ലെന്ന് ബ്രിട്ടീഷ് എംപിമാർ

ലണ്ടൻ : ബ്രിട്ടനെ നടുക്കിയ ഹെൻറി നൊവാക് കൊലപാതക കേസ് സിഖ് മതവുമായി ബന്ധപ്പെട്ടതല്ലെന്ന് വ്യക്തമാക്കി യുകെയിലെ 11 സിഖ് പാർലമെന്റ് അംഗങ്ങൾ സംയുക്ത പ്രസ്താവന പുറത്തിറക്കി. കേസിൽ പ്രതിയായ വിക്രം ദിഗ്വയ്ക്ക് കോടതി ഈ ആഴ്ച ശിക്ഷ വിധിച്ച പശ്ചാത്തലത്തിലാണ് എംപിമാരുടെ വിശദീകരണം. ആക്രമണത്തിനായി പ്രതി ഉപയോഗിച്ച ആയുധം സിഖ് മതവിശ്വാസവുമായി ബന്ധമുള്ളതല്ലെന്നും ഒരു വ്യക്തി നടത്തിയ ക്രൂരമായ കുറ്റകൃത്യത്തെ മതവുമായി കൂട്ടിക്കെട്ടരുതെന്നും ജനപ്രതിനിധികൾ സംയുക്ത പ്രസ്താവനയിലൂടെ ആവശ്യപ്പെട്ടു.

ചരിത്രപരമായി യുദ്ധങ്ങളിൽ കവചങ്ങൾ തുളച്ചുകയറാൻ ഉപയോഗിച്ചിരുന്ന പേഷ് കബ്‌സ് എന്ന 21 സെന്റിമീറ്റർ നീളമുള്ള ഇൻഡോ-പേർഷ്യൻ കത്തി ഉപയോഗിച്ചാണ് വിക്രം ദിഗ്വ ഹെൻറി നൊവാക്കിനെ കുത്തിക്കൊലപ്പെടുത്തിയത്. ഈ ആയുധം മതപരമായ കാരണങ്ങളാലാണ് താൻ കൈവശം വച്ചിരുന്നതെന്ന പ്രതിയുടെ വാദം കോടതി തള്ളിയിരുന്നു. ഇത് മതപരമായി അംഗീകരിക്കപ്പെട്ട ഒന്നല്ലെന്നും വെറുമൊരു ആക്രമണ ആയുധം മാത്രമാണെന്നുമാണ് കോടതി കണ്ടെത്തിയത്. സംഭവസമയത്ത് പ്രതിയുടെ പക്കൽ സിഖ് മതവിശ്വാസികൾ ധരിക്കുന്ന കിർപാൻ എന്ന ചെറിയ കത്തിയും ഉണ്ടായിരുന്നെങ്കിലും കൊലപാതകത്തിന് ഉപയോഗിച്ചത് ഇതല്ലെന്ന് എംപിമാർ ചൂണ്ടിക്കാണിച്ചു.

ഹെൻറി നൊവാക്കിന്റെ കൊലപാതകം അത്യന്തം ദാരുണവും അർഥശൂന്യവുമായ കുറ്റകൃത്യമാണെന്ന് വിശേഷിപ്പിച്ച എംപിമാർ അദ്ദേഹത്തിന്റെ കുടുംബത്തിന്റെ ദുഃഖത്തിൽ പങ്കുചേരുന്നതായും അറിയിച്ചു. രാജ്യത്ത് വർധിച്ചുവരുന്ന കത്തി ആക്രമണങ്ങൾക്കെതിരെയുള്ള പോരാട്ടം ശക്തമാക്കണമെന്ന് ഒപ്പുവെച്ചവർ ഓർമ്മിപ്പിച്ചു. ഓൾ-പാർട്ടി പാർലമെന്ററി ഗ്രൂപ്പ് ചെയർമാൻ ജസ് അത്വാൽ, ആരോഗ്യ മന്ത്രി പ്രീത് കൗർ ഗിൽ, പ്രതിരോധ സെലക്ട് കമ്മിറ്റി അധ്യക്ഷൻ ടാൻ ധേസി എന്നിവരുൾപ്പെടെയുള്ള പ്രമുഖരാണ് ഈ സംയുക്ത പ്രസ്താവനയിൽ ഒപ്പുവെച്ചിരിക്കുന്നത്.

Eleven British Sikh MPs have issued a joint statement clarifying that the murder of Henry Nowak by Vikram Digva is not related to the Sikh religion, as the weapon used was an offensive knife and not a religious Kirpan.