നികുതി ഭാരവും വേതന വർധനയും തിരിച്ചടിയായി; യുകെയിലെ പ്രമുഖ റീട്ടെയിലർമാർ 18,000 ജോലികൾ കുറച്ചു

ലണ്ടൻ : യുകെയിലെ റീട്ടെയിൽ മേഖലയിൽ തൊഴിൽ പ്രതിസന്ധി രൂക്ഷമാകുന്നു. സർക്കാർ നടപ്പാക്കിയ തൊഴിലുടമകളുടെ നികുതി വർധനയും മിനിമം വേതന ഉയർച്ചയും ചെലവ് സമ്മർദ്ദം കൂട്ടിയതോടെ രാജ്യത്തെ വലിയ സൂപ്പർമാർക്കറ്റ് ശൃംഖലകളും റീട്ടെയിൽ കമ്പനികളും ജീവനക്കാരുടെ എണ്ണം കുറയ്ക്കുകയാണ്. കഴിഞ്ഞ ഒരു വർഷത്തിനിടെ ബ്രിട്ടനിലെ പ്രമുഖ റീട്ടെയിലർമാർ ഏകദേശം 18,000 തൊഴിലുകൾ കുറച്ചതായാണ് പുതിയ വിശകലനത്തിൽ വ്യക്തമാകുന്നത്. മലയാളികൾ ഉൾപ്പെടെ നിരവധി പ്രവാസികൾ ജോലി ചെയ്യുന്ന സൂപ്പർമാർക്കറ്റ്, ഫാഷൻ, സ്പോർട്സ് റീട്ടെയിൽ മേഖലകളിലാണ് ഇതിന്റെ ആഘാതം കൂടുതൽ അനുഭവപ്പെടുന്നത്.

യുകെയിലെ ഏറ്റവും വലിയ സൂപ്പർമാർക്കറ്റ് ശൃംഖലയായ ടെസ്‌കോയിൽ മാത്രം യുകെ, അയർലണ്ട് പ്രവർത്തനങ്ങളിലായി ഏകദേശം 5,000 ജീവനക്കാരുടെ കുറവ് രേഖപ്പെടുത്തിയിട്ടുണ്ട്. സെയിൻസ്‌ബറീസ്, വെയ്റ്റ്‌റോസ് തുടങ്ങിയ പ്രമുഖ സ്ഥാപനങ്ങളിലും ജോലിക്കാരുടെ എണ്ണം കുറഞ്ഞിട്ടുണ്ട്. ചില സ്ഥാപനങ്ങൾ നേരിട്ടുള്ള പിരിച്ചുവിടലുകളിലൂടെയും ചിലത് ഒഴിവുകൾ വന്ന സ്ഥാനങ്ങളിൽ പുതിയ നിയമനം നടത്താതെയും ജീവനക്കാരുടെ എണ്ണം കുറയ്ക്കുന്നുവെന്നാണ് റിപ്പോർട്ടുകൾ സൂചിപ്പിക്കുന്നത്. ഉപഭോക്തൃ ചെലവ് മന്ദഗതിയിലായതും കടുത്ത മത്സരവും ഉയർന്ന പ്രവർത്തനച്ചെലവും റീട്ടെയിൽ മേഖലയെ കൂടുതൽ സമ്മർദ്ദത്തിലാക്കുകയാണ്.

ഫാഷൻ, സ്പോർട്സ് റീട്ടെയിൽ രംഗത്തും സമാന സാഹചര്യം തുടരുകയാണ്. നെക്സ്റ്റ്, ജെഡി സ്പോർട്സ് തുടങ്ങിയ കമ്പനികളിലും ജീവനക്കാരുടെ എണ്ണം കുറഞ്ഞതായി റിപ്പോർട്ടുകൾ പറയുന്നു. തൊഴിലുടമകളുടെ നാഷണൽ ഇൻഷുറൻസ് വിഹിതം ഉയർന്നതും കുറഞ്ഞ വേതനക്കാരെ കൂടുതലായി ആശ്രയിക്കുന്ന മേഖലകളിൽ മിനിമം വേതന വർധന ചെലവ് കൂട്ടിയതുമാണ് നിയമനങ്ങളെ ബാധിക്കുന്ന പ്രധാന കാരണങ്ങളായി ചൂണ്ടിക്കാണിക്കുന്നത്. അതേസമയം, 2026ൽ യുകെയിലെ തൊഴിലില്ലായ്മ കൂടുതൽ ഉയരാമെന്ന സാമ്പത്തിക വിദഗ്ധരുടെ മുന്നറിയിപ്പും പുറത്തുവന്നിട്ടുണ്ട്. റീട്ടെയിൽ മേഖലയിലെ ഈ കണക്കുകൾ, ബ്രിട്ടനിലെ തൊഴിൽ വിപണി കൂടുതൽ ദുർബലമാകുന്നതിന്റെ സൂചനയായാണ് വിലയിരുത്തപ്പെടുന്നത്.

English Summary: Major UK retailers have cut around 18,000 jobs as higher employment costs and weak consumer spending put pressure on the sector.