പ്രീമിയർ ലീഗ് കബഡി 2026: മാഞ്ചസ്റ്റർ ക്വാളിഫയറിൽ ശ്രദ്ധേയ സാന്നിധ്യമായി മലയാളി താരങ്ങൾ

മാഞ്ചസ്റ്റർ : പ്രീമിയർ ലീഗ് കബഡി 2026-ന്റെ മാഞ്ചസ്റ്റർ ക്വാളിഫയറിൽ ഹാർടിൽപൂൾ ഗ്രിസ്‌ലീസ് ക്ലബ്ബിനെ പ്രതിനിധീകരിച്ച് മലയാളി താരങ്ങൾ ശ്രദ്ധേയ പ്രകടനം കാഴ്ചവെച്ചു. മാഞ്ചസ്റ്ററിലെ നാഷണൽ ബാസ്‌കറ്റ്ബോൾ പെർഫോമൻസ് സെന്ററിൽ നടന്ന ക്വാളിഫയർ മത്സരങ്ങളിലാണ് മലയാളി താരങ്ങൾ കളത്തിലിറങ്ങിയത്. യുകെയിൽ കബഡിയെ കൂടുതൽ ജനകീയമാക്കുകയും വിവിധ സമൂഹങ്ങളിൽ നിന്നുള്ള കായിക പ്രതിഭകൾക്ക് അവസരമൊരുക്കുകയും ചെയ്യുക എന്ന ലക്ഷ്യത്തോടെയാണ് പ്രീമിയർ ലീഗ് കബഡി സംഘടിപ്പിക്കുന്നത്.

കമ്മ്യൂണിറ്റി അധിഷ്ഠിതവും സെമി-പ്രൊഫഷണൽ സ്വഭാവമുള്ളതുമായ ഈ ലീഗ് സമത്വം, വൈവിധ്യം, സാമൂഹിക ഐക്യം എന്നിവ മുൻനിർത്തിയാണ് പ്രവർത്തിക്കുന്നത്. ഈ വർഷത്തെ ലീഗിൽ മൊത്തം ഒൻപത് ടീമുകളാണ് പങ്കെടുക്കുന്നത്. അതിൽ മൂന്ന് സ്കോട്ടിഷ് ടീമുകളും ആറ് ഇംഗ്ലീഷ് ടീമുകളും ഉൾപ്പെടുന്നു. ഹാർടിൽപൂൾ ഗ്രിസ്‌ലീസ്, ഗ്ലാസ്‌ഗോ യൂണികോൺസ്, എഡിൻബർഗ് ഈഗിൾസ്, കോവൻട്രി ചാർജേഴ്സ് തുടങ്ങിയ ടീമുകൾ ലീഗിന്റെ ഭാഗമാണ്. ആദ്യ ക്വാളിഫയർ മാഞ്ചസ്റ്ററിലും രണ്ടാം ക്വാളിഫയർ കോവൻട്രിയിലും നടക്കും. യോഗ്യത നേടുന്ന ടീമുകൾ ഏറ്റുമുട്ടുന്ന ഗ്രാൻഡ് ഫിനാലെ സ്കോട്‌ലൻഡിലെ ഗ്ലാസ്‌ഗോയിൽ അരങ്ങേറും.

കബഡി സ്കോട്ട്ലൻഡ്, കോമൺവെൽത്ത് ഗെയിംസ് ‘ഓൾ ഇൻ’ സംരംഭം, സ്പോർട്‌സ് സ്കോട്ട്ലൻഡ് എന്നിവയുടെ പിന്തുണയോടെയാണ് ലീഗും അനുബന്ധ പ്രവർത്തനങ്ങളും മുന്നോട്ട് പോകുന്നത്. ഹാർടിൽപൂൾ കൗൺസിലറും അവാർഡ് നേടിയ മാരിനേഴ്സ് യൂണൈറ്റഡ് സ്പോർട്ടിംഗ് ക്ലബ് സി.ഐ.സി.യുടെ സ്ഥാപകനുമായ ആരോൺ റോയ് ആണ് ഹാർടിൽപൂൾ ഗ്രിസ്‌ലീസ് ടീമിനെ ഒരുമിച്ച് കൊണ്ടുവന്നത്. മാഞ്ചസ്റ്റർ ക്വാളിഫയറിൽ ഹാർടിൽപൂൾ ഗ്രിസ്‌ലീസിനായി മലയാളി താരങ്ങൾ നടത്തിയ പ്രകടനം, യുകെയിൽ വളർന്നുവരുന്ന കബഡി രംഗത്ത് മലയാളി സമൂഹത്തിന്റെ സാന്നിധ്യം കൂടുതൽ ശക്തമാകുന്നതിന്റെ തെളിവുകൂടിയായി വിലയിരുത്തപ്പെടുന്നു. English Summary: Malayali players made a notable appearance for Hartlepool Grizzlies at the Premier League Kabaddi 2026 Manchester qualifier.