പോളിങ് ഏജൻസിയിൽ നൈജൽ ഫെറാജിന്റെ ഉപദേശകന് നിർണായക ചുമതല; ബ്രിട്ടീഷ് രാഷ്ട്രീയത്തിൽ വിവാദം

ലണ്ടൻ : പ്രമുഖ ബ്രിട്ടീഷ് രാഷ്ട്രീയ നേതാവും റിഫോം യുകെ പാർട്ടി അധ്യക്ഷനുമായ നൈജൽ ഫെറാജിന്റെ ദീർഘകാല രാഷ്ട്രീയ ഉപദേശകൻ ക്രിസ് ബ്രൂണി-ലോവ് പ്രമുഖ പോളിങ് ഏജൻസിയായ 'റെഡ്ഫീൽഡ് ആൻഡ് വിൽട്ടൺ സ്ട്രാറ്റജീസ്'ൽ രഹസ്യമായി നിർണായക പദവി വഹിച്ചിരുന്നതായി വെളിപ്പെടുത്തൽ. ദി ഗാർഡിയൻ പുറത്തുവിട്ട അന്വേഷണ റിപ്പോർട്ടിലാണ് ഇക്കാര്യം വ്യക്തമാക്കുന്നത്. 2020-ൽ പ്രവർത്തനം ആരംഭിച്ച ഈ സർവേ ഏജൻസിയിൽ ഔദ്യോഗികമായി പേര് വെളിപ്പെടുത്താതെ പ്രവർത്തിച്ച ഇദ്ദേഹം, യുകെയിലെയും യുഎസിലെയും വോട്ടർമാരുടെ രാഷ്ട്രീയ ചായ്‌വ് സംബന്ധിച്ച സർവേകൾ ആസൂത്രണം ചെയ്യുന്നതിലും തിരഞ്ഞെടുപ്പ് തന്ത്രങ്ങൾ രൂപപ്പെടുത്തുന്നതിലും സുപ്രധാന പങ്കുവഹിച്ചതായി മുൻ ജീവനക്കാർ വെളിപ്പെടുത്തി.

ചില സന്ദർഭങ്ങളിൽ 'ക്രിസ് റെഡ്ഫീൽഡ്' എന്ന വ്യാജപ്പേരിൽ ഏജൻസിയുടെ പ്രവർത്തനങ്ങൾക്ക് നേതൃത്വം നൽകിയ ബ്രൂണി-ലോവ്, തദ്ദേശ സ്ഥാപനങ്ങളുടെ ചെലവുകൾ ഉൾപ്പെടെയുള്ള വിഷയങ്ങളിൽ പ്രത്യേക രേഖകൾ തയ്യാറാക്കാനും നിർദേശം നൽകിയിരുന്നു. സർവേ ഫലങ്ങൾ ഉപയോഗിച്ച് രാഷ്ട്രീയ പാർട്ടികൾക്ക് അനുകൂലമായ പൊതുവികാരം സൃഷ്ടിക്കാൻ ശ്രമിച്ചുവെന്ന ആരോപണങ്ങൾ നിലനിൽക്കെയാണ് പുതിയ വിവരങ്ങൾ പുറത്തുവരുന്നത്. ഫെറാജിന്റെ മറ്റൊരു സഹായിയായിരുന്ന ഡാൻ ജുക്സ് മുൻപ് ഈ കമ്പനിയുടെ സർവേകൾ മാധ്യമങ്ങളിലൂടെ പ്രചരിപ്പിക്കാൻ ശ്രമിച്ചതായും റിപ്പോർട്ടിൽ ചൂണ്ടിക്കാട്ടുന്നു.

അതേസമയം, റിഫോം യുകെ പാർട്ടിയുമായോ ഫെറാജുമായോ കമ്പനിക്ക് ഔദ്യോഗികമോ സാമ്പത്തികമോ ആയ യാതൊരു ബന്ധവുമില്ലെന്ന് റെഡ്ഫീൽഡ് ആൻഡ് വിൽട്ടൺ ഡയറക്ടർ ബ്രൂണോ റോഡ്രിഗസ് വിശദീകരിച്ചു. 2020 മുതൽ 2022 വരെ കൺസൾട്ടന്റായും തുടർന്ന് ഇന്റേണുകളെ പരിശീലിപ്പിക്കാനുമാണ് ബ്രൂണി-ലോവ് പ്രവർത്തിച്ചതെന്നും സ്ഥാപനത്തിന്റെ നിയന്ത്രണം അദ്ദേഹത്തിനല്ലായിരുന്നുവെന്നും അദ്ദേഹം വ്യക്തമാക്കി. എന്നാൽ, രാഷ്ട്രീയ താല്പര്യങ്ങൾ മുൻനിർത്തി പോളിങ് ഏജൻസികളെ ദുരുപയോഗം ചെയ്തുവെന്ന ആക്ഷേപം ബ്രിട്ടനിലെ തിരഞ്ഞെടുപ്പ് സർവേകളുടെ സുതാര്യതയെക്കുറിച്ചുള്ള ചർച്ചകൾക്ക് വീണ്ടും വഴിവെച്ചിരിക്കുകയാണ്.