പൊതുഗതാഗതം ഭിന്നശേഷി സൗഹൃദമാക്കിയാൽ യുകെക്ക് 176 ബില്യൺ പൗണ്ടിന്റെ സാമ്പത്തിക നേട്ടം; നിർണായക റിപ്പോർട്ട്

ലണ്ടൻ : ഭിന്നശേഷിക്കാർക്കും പ്രായമായവർക്കും ഉൾപ്പെടെ എല്ലാവർക്കും ഒരുപോലെ ഉപയോഗിക്കാൻ കഴിയുന്ന രീതിയിൽ പൊതുഗതാഗത സംവിധാനം പരിഷ്കരിച്ചാൽ യുകെ സമ്പദ്‌വ്യവസ്ഥയ്ക്ക് പ്രതിവർഷം 176 ബില്യൺ പൗണ്ടിന്റെ അധിക നേട്ടമുണ്ടാകുമെന്ന് റിപ്പോർട്ട്.

ഇൻസ്റ്റിറ്റ്യൂഷൻ ഓഫ് മെക്കാനിക്കൽ എൻജിനീയേഴ്സ് പുറത്തുവിട്ട ഏറ്റവും പുതിയ പഠനത്തിലാണ് ഈ വിലയിരുത്തൽ. നിലവിലെ ബസ്, ട്രെയിൻ സർവീസുകളിലെയും സ്റ്റേഷനുകളിലെയും അടിസ്ഥാന സൗകര്യങ്ങളുടെ കുറവ് മൂലം വലിയൊരു വിഭാഗം ജനങ്ങൾക്ക് തൊഴിൽ, വിദ്യാഭ്യാസം തുടങ്ങിയ ദിനചര്യകളിൽ പങ്കാളികളാകാൻ കഴിയുന്നില്ലെന്നും റിപ്പോർട്ട് ചൂണ്ടിക്കാട്ടുന്നു. സ്റ്റേഷനുകളിൽ ലിഫ്റ്റുകളും റാമ്പുകളും ഇല്ലാത്തതും പ്ലാറ്റ്‌ഫോമുകളിലെ വലിയ വിടവുകളും കാഴ്ച വൈകല്യമുള്ളവർക്കുള്ള പ്രത്യേക യാത്രാ അടയാളങ്ങളുടെ കുറവുമൊക്കെയാണ് യാത്രക്കാർ നേരിടുന്ന പ്രധാന വെല്ലുവിളികൾ.

 യാത്രാ സൗകര്യങ്ങളുടെ കുറവ് കാരണം ഭിന്നശേഷിക്കാരായ പ്രൊഫഷണലുകളിൽ പകുതിയോളം പേർക്ക് മികച്ച ജോലി അവസരങ്ങൾ വേണ്ടെന്നുവെക്കേണ്ടി വന്നിട്ടുണ്ട്. ഏകദേശം 28 ലക്ഷത്തോളം പേരാണ് യുകെയിൽ യാത്രാ തടസ്സങ്ങൾ കാരണം തൊഴിൽ വിപണിക്ക് പുറത്തുനിൽക്കുന്നത്. ഈ പ്രശ്നങ്ങൾ പരിഹരിച്ച് ഇവരെക്കൂടി തൊഴിൽ മേഖലയിലേക്ക് എത്തിക്കാൻ കഴിഞ്ഞാൽ രാജ്യത്തിന് പ്രതിവർഷം വലിയ തോതിലുള്ള സാമ്പത്തിക വളർച്ച കൈവരിക്കാനാകുമെന്നാണ് കണക്കുകൂട്ടൽ. രാജ്യത്തെ റെയിൽവേ സംവിധാനം പൂർണമായും ഭിന്നശേഷി സൗഹൃദമാക്കാൻ 20 മുതൽ 24 ബില്യൺ പൗണ്ട് വരെ നിക്ഷേപം ആവശ്യമായി വരും. ഇത്തരം വികസന പ്രവർത്തനങ്ങൾക്കായി സ്വകാര്യ നിക്ഷേപകരെ ആകർഷിക്കാൻ നികുതി ഇളവുകൾ നൽകണമെന്നും റിപ്പോർട്ടിൽ ശുപാർശയുണ്ട്. ഗതാഗത സൗകര്യങ്ങൾ മെച്ചപ്പെടുന്നതോടെ റീട്ടെയിൽ, ടൂറിസം മേഖലകളിൽ വലിയ മുന്നേറ്റമുണ്ടാകും. യാത്രാ തടസ്സങ്ങൾ നീക്കുന്നത് സാമൂഹിക നീതി ഉറപ്പാക്കാൻ മാത്രമല്ല, രാജ്യത്തിന്റെ സാമ്പത്തിക പുരോഗതിക്കും അനിവാര്യമാണെന്നാണ് വിദഗ്ധർ വ്യക്തമാക്കുന്നത്.

 English Summary: Making UK public transport fully accessible could boost the economy by £176 billion a year, according to a new report.