യുകെയിൽ വീണ്ടും ഹീറ്റ് വേവ് സാധ്യത; ഫാനും എയർ കണ്ടീഷണറും കിട്ടാൻ ക്ഷാമമെന്ന് കറീസ്

ലണ്ടൻ : യുകെയിൽ അടുത്ത ആഴ്ച വീണ്ടും ഹീറ്റ് വേവ് ഉണ്ടാകാൻ സാധ്യതയെന്ന മുന്നറിയിപ്പുകൾക്കിടെ ഫാനുകളും എയർ കണ്ടീഷണറുകളും കിട്ടാൻ ക്ഷാമം നേരിടുന്നുണ്ടെന്ന് പ്രമുഖ ഇലക്ട്രോണിക്സ് റീട്ടെയിലറായ കറീസ്. കഴിഞ്ഞ മാസം ഇംഗ്ലണ്ടിൽ റെക്കോർഡ് ചൂട് രേഖപ്പെടുത്തിയ ദിവസങ്ങളിൽ തണുപ്പിക്കൽ ഉപകരണങ്ങളുടെ വിൽപ്പന കുത്തനെ ഉയർന്നതോടെയാണ് കടകൾക്ക് പുതിയ സ്റ്റോക്ക് കണ്ടെത്താൻ ബുദ്ധിമുട്ട് തുടങ്ങിയത്. ഏറ്റവും പുതിയ ഹീറ്റ് വേവ് വാരാന്ത്യത്തിൽ ഫാനുകളുടെ വിൽപ്പന മുൻ ആഴ്ചയുമായി താരതമ്യം ചെയ്യുമ്പോൾ ഏകദേശം 3,000 ശതമാനം ഉയർന്നപ്പോൾ, എയർ കണ്ടീഷണറുകളുടെ വിൽപ്പന 330 ശതമാനം വർധിച്ചതായി കറീസ് ചീഫ് എക്സിക്യൂട്ടീവ് അലക്സ് ബാൾഡോക്ക് പറഞ്ഞു.

യുകെയിലും നോർഡിക് മേഖലയിലുമായി 691 സ്റ്റോറുകൾ പ്രവർത്തിപ്പിക്കുന്ന കറീസ്, ആവശ്യത്തിന് സ്റ്റോക്ക് ഉറപ്പാക്കാൻ ശക്തമായി ശ്രമിക്കുന്നുണ്ടെങ്കിലും വിതരണ സ്ഥിതി ഇപ്പോഴും കടുത്തതാണെന്ന് ബാൾഡോക്ക് വ്യക്തമാക്കി. കഴിഞ്ഞ ചൂടുകാലത്ത് തണുപ്പിക്കൽ ഉപകരണങ്ങൾ ഷെൽഫുകളിൽ നിന്ന് വേഗത്തിൽ വിറ്റഴിഞ്ഞതായി അദ്ദേഹം പറഞ്ഞു. അതേസമയം കമ്പനിയുടെ വാർഷിക വിൽപ്പന 6 ശതമാനം ഉയർന്ന് 9.2 ബില്യൺ പൗണ്ടായും നികുതിക്ക് മുമ്പുള്ള ലാഭം 23 ശതമാനം ഉയർന്ന് 153 മില്യൺ പൗണ്ടായും കറീസ് അറിയിച്ചു. കോഫി മെഷീനുകൾ, കൃത്രിമബുദ്ധി ഉപയോഗിക്കുന്ന ലാപ്ടോപ്പുകൾ, റിപെയർ-ഇൻസ്റ്റലേഷൻ സേവനങ്ങൾ, ചെറുകിട ബിസിനസുകൾക്കുള്ള വിൽപ്പന എന്നിവ വളർച്ചയ്ക്ക് സഹായകമായതായി കമ്പനി പറയുന്നു.

മെയ് മാസത്തിനുശേഷവും വിൽപ്പന ശക്തമായി തുടരുകയാണെന്നും ഫുട്ബോൾ ലോകകപ്പ് വലിയ ടിവികൾ, ബാർബിക്യു ഉപകരണങ്ങൾ, ബിയർ പമ്പുകൾ, ഹോട്ട് ടബുകൾ എന്നിവയുടെ വിൽപ്പനയ്ക്ക് കരുത്തായെന്നും ബാൾഡോക്ക് പറഞ്ഞു. 90 ഇഞ്ച് ടിവികളുടെ വിൽപ്പന ഇരട്ടിയിലധികം ഉയർന്നതായും അദ്ദേഹം വ്യക്തമാക്കി. അതേസമയം, ആഗോള സിലിക്കൺ ചിപ്പ് ക്ഷാമം മൂലം ചില ഇലക്ട്രോണിക് ഉൽപ്പന്നങ്ങൾക്ക് വിലക്കയറ്റം ഒഴിവാക്കാനാകില്ലെന്നും കറീസ് മുന്നറിയിപ്പ് നൽകി. തൊഴിലാളികളെ നിയമിക്കുന്ന ചെലവ് കുറയ്ക്കാനും ഹൈ സ്ട്രീറ്റ് കടകൾക്കും ഓൺലൈൻ വിൽപ്പനക്കാർക്കും ഒരേ തരത്തിലുള്ള നികുതി സാഹചര്യങ്ങൾ ഉറപ്പാക്കാനും സർക്കാർ ഇടപെടണമെന്നും കറീസ് ആവശ്യപ്പെട്ടു.

English Summary: Currys says fan and air conditioner supplies are tight as the UK faces the possibility of another heatwave next week.