യുകെ ഭരണപക്ഷത്ത് തർക്കം മുറുകുന്നു: കീയർ സ്റ്റാർമർ മാറിയാലും കസേരയുറപ്പിക്കാൻ നീക്കങ്ങളുമായി റേച്ചൽ റീവ്സ്
ലണ്ടൻ : യുകെയിൽ ഭരണകക്ഷിയായ ലേബർ പാർട്ടിക്കുള്ളിൽ രാഷ്ട്രീയ അട്ടിമറി സാധ്യതകൾ പ്രവചിച്ചുകൊണ്ട് നേതൃത്വമാറ്റ ചർച്ചകൾ പുതിയ തലത്തിലേക്ക്. പാർട്ടിയിൽ കടുത്ത ഭിന്നത നിലനിൽക്കെ പ്രധാനമന്ത്രി പദവിയിൽ നിന്നും താൻ പിന്മാറില്ലെന്ന് കീയർ സ്റ്റാർമർ ആവർത്തിച്ച് വ്യക്തമാക്കുമ്പോഴും അധികാരം നിലനിർത്താനുള്ള അണിയറ നീക്കങ്ങൾ ചാൻസലർ റേച്ചൽ റീവ്സ് ശക്തമാക്കി കഴിഞ്ഞു. പാർട്ടിയിൽ അടുത്ത കാലത്തുണ്ടായ ആഭ്യന്തര പ്രതിസന്ധികളെ തുടർന്ന് വെസ് സ്ട്രീറ്റിംഗ് ഉൾപ്പെടെയുള്ള പ്രമുഖർ മന്ത്രിസഭയിൽ നിന്നും രാജിവെച്ചതാണ് നിലവിലെ രാഷ്ട്രീയ അസ്ഥിരതയ്ക്ക് കാരണമായത്. ഈ സാഹചര്യത്തിൽ വരാനിരിക്കുന്ന മേക്കർഫീൽഡ് ഉപതെരഞ്ഞെടുപ്പിലൂടെ പാർലമെന്റിലേക്ക് തിരിച്ചെത്താൻ ശ്രമിക്കുന്ന ഗ്രേറ്റർ മാഞ്ചസ്റ്റർ മേയർ ആൻഡി ബേൺഹം പ്രധാനമന്ത്രി സ്ഥാനത്തേക്ക് എത്താനുള്ള സാധ്യതകളാണ് ഇപ്പോൾ സജീവമായി ചർച്ച ചെയ്യപ്പെടുന്നത്.
നേതൃത്വത്തിൽ ആര് വന്നാലും രാജ്യത്തിന്റെ സാമ്പത്തിക ഭദ്രത ഉറപ്പാക്കാൻ താൻ തന്നെ ചാൻസലർ പദവിയിൽ തുടരണമെന്ന നിലപാടിലാണ് റേച്ചൽ റീവ്സ്. കഴിഞ്ഞ സാമ്പത്തിക പാദത്തിൽ യുകെ കൈവരിച്ച ഉയർന്ന വളർച്ചാനിരക്കും പണപ്പെരുപ്പത്തിലുണ്ടായ കുറവും ഉയർത്തിക്കാട്ടിയാണ് റീവ്സിന്റെ അനുയായികൾ പ്രതിരോധം തീർക്കുന്നത്. എന്നാൽ ബേൺഹം പക്ഷം അധികാരത്തിലെത്തിയാൽ മുൻ ലേബർ പാർട്ടി നേതാവ് എഡ് മിലിബാൻഡിനെ പുതിയ ധനമന്ത്രിയാക്കാൻ നീക്കമുണ്ടെന്ന അഭ്യൂഹങ്ങൾ ശക്തമാണ്. മിലിബാൻഡ് വന്നാൽ അത് സാമ്പത്തിക വിപണികളിൽ വലിയ തിരിച്ചടിയുണ്ടാക്കുമെന്നാണ് റീവ്സിനെ പിന്തുണയ്ക്കുന്നവരുടെ പ്രധാന വാദം. ഇതിനിടെ വിപണിയിലെ ആശങ്കകൾ പരിഹരിക്കാനായി നിലവിലെ സാമ്പത്തിക നയങ്ങളെ പിന്തുണയ്ക്കുമെന്ന് ആൻഡി ബേൺഹവും വ്യക്തമാക്കിയിട്ടുണ്ട്.
അതേസമയം ഇറാൻ യുദ്ധ പശ്ചാത്തലത്തിൽ ജനങ്ങളുടെ വർദ്ധിച്ചുവരുന്ന ജീവിതച്ചെലവ് പരിഹരിക്കാൻ റേച്ചൽ റീവ്സ് പ്രഖ്യാപിച്ച പുതിയ നികുതിയിളവുകളും പാർട്ടിക്കുള്ളിലെ എതിർപ്പ് തണുപ്പിക്കാൻ ലക്ഷ്യമിട്ടുള്ളതാണെന്ന് വിലയിരുത്തപ്പെടുന്നു. ശൈത്യകാല ഇന്ധനസഹായം വെട്ടിക്കുറച്ചതുമായി ബന്ധപ്പെട്ട് റീവ്സിനെതിരെ ഉയർന്ന കടുത്ത അമർഷം ലേബർ പാർട്ടിക്കുള്ളിൽ ഇപ്പോഴും പുകയുകയാണ്. ഒരു വശത്ത് പ്രധാനമന്ത്രി സ്ഥാനത്തിനായി കീയർ സ്റ്റാർമറും ആൻഡി ബേൺഹവും നേർക്കുനേർ പോരാട്ടത്തിന് ഒരുങ്ങുമ്പോൾ മറുവശത്ത് ധനമന്ത്രി കസേരയ്ക്കായുള്ള പോരും മുറുകുന്നത് ബ്രിട്ടീഷ് രാഷ്ട്രീയത്തെ വരും ദിവസങ്ങളിൽ കൂടുതൽ നാടകീയമായ വഴിത്തിരിവുകളിലേക്ക് നയിക്കുമെന്നുറപ്പാണ്.
