ബെഡ്ഫോർഡിന് സമീപം ട്രെയിനുകൾ കൂട്ടിയിടിച്ച് ഡ്രൈവർ മരിച്ചു; 89 പേർക്ക് പരിക്ക്

ലണ്ടൻ : ബെഡ്ഫോർഡിന് സമീപം രണ്ട് പാസഞ്ചർ ട്രെയിനുകൾ കൂട്ടിയിടിച്ച് ട്രെയിൻ ഡ്രൈവർ മരിക്കുകയും 89 പേർക്ക് പരിക്കേൽക്കുകയും ചെയ്തു. പരിക്കേറ്റവരിൽ 11 പേരുടെ നില അതീവ ഗുരുതരമാണെന്നും 22 പേർക്ക് ഗുരുതര പരിക്കുകളുണ്ടെന്നും ഈസ്റ്റ് ഓഫ് ഇംഗ്ലണ്ട് ആംബുലൻസ് സർവീസ് അറിയിച്ചു. മറ്റുള്ള 56 പേർക്ക് ചെറിയ പരിക്കുകളാണ് ഉണ്ടായത്. ഇവരിൽ ചിലർക്ക് സംഭവസ്ഥലത്ത് തന്നെ ചികിത്സ നൽകി, ചിലരെ ആശുപത്രികളിലേക്ക് മാറ്റി. വെള്ളിയാഴ്ച വൈകുന്നേരം നടന്ന അപകടത്തെ തുടർന്ന് അടിയന്തര സേവനങ്ങൾ രാത്രി വൈകിയും സ്ഥലത്ത് രക്ഷാപ്രവർത്തനം തുടർന്നു.

ഈസ്റ്റ് മിഡ്‌ലാൻഡ്സ് റെയിൽവേയുടെ രണ്ട് സർവീസുകളാണ് അപകടത്തിൽപ്പെട്ടത്. കോർബിയിൽ നിന്ന് ലണ്ടൻ സെന്റ് പാൻക്രാസിലേക്കുള്ള വൈകിട്ട് 4.40-ന്റെ സർവീസും നോട്ടിംഗ്ഹാമിൽ നിന്ന് ലണ്ടൻ സെന്റ് പാൻക്രാസിലേക്കുള്ള 3.50-ന്റെ സർവീസുമാണ് കൂട്ടിയിടിച്ചതെന്ന് റെയിൽവേ ഓപ്പറേറ്റർ അറിയിച്ചു. എ421, എ6 റോഡുകൾക്കിടയിലുള്ള എൽസ്റ്റോ ഇന്റർചേഞ്ചിന് തെക്കുഭാഗത്താണ് അപകടം നടന്നത്. അപകടത്തെ തുടർന്ന് എയർ ആംബുലൻസ് ഹെലികോപ്റ്ററുകളും പൊലീസ്, ഫയർ സർവീസ്, ആംബുലൻസ് സംഘങ്ങളും സ്ഥലത്തെത്തി. പ്രദേശത്തെ ആശുപത്രികളുടെ അടിയന്തര വിഭാഗങ്ങളിലേക്ക് യഥാർത്ഥ അടിയന്തരാവസ്ഥയുള്ളവർ മാത്രമേ എത്താവൂ എന്ന് പൊതുജനങ്ങൾക്ക് നിർദ്ദേശം നൽകി.

അപകടത്തിൽ മരിച്ച ട്രെയിൻ ഡ്രൈവർ മുൻ ആർഎംടി പ്രതിനിധിയാണെന്ന് ആർഎംടി യൂണിയൻ അറിയിച്ചു. പ്രധാനമന്ത്രി കിയർ സ്റ്റാർമർ അപകടത്തിൽ മരിച്ചയാളുടെ കുടുംബത്തിനും ഗുരുതരമായി പരിക്കേറ്റവർക്കും അനുശോചനം രേഖപ്പെടുത്തി. ഗതാഗത സെക്രട്ടറി ഹൈഡി അലക്‌സാണ്ടറും സംഭവത്തിൽ ദുഃഖം രേഖപ്പെടുത്തി. പൊലീസ് മേജർ ഇൻസിഡന്റ് പ്രഖ്യാപിച്ചിട്ടുണ്ടെന്നും റെയിൽ ആക്‌സിഡന്റ് ഇൻവെസ്റ്റിഗേഷൻ ബ്രാഞ്ച് അന്വേഷണം ആരംഭിച്ചിട്ടുണ്ടെന്നും അധികൃതർ വ്യക്തമാക്കി. അപകടത്തിന്റെ കാരണം ഇതുവരെ വ്യക്തമല്ല. പുതിയ ട്രെയിനുകളും നവീകരിച്ച മിഡ്‌ലാൻഡ് മെയിൻലൈൻ പാതയും ഉൾപ്പെട്ട അപകടമായതിനാൽ റെയിൽ വ്യവസായത്തിന് വലിയ ഞെട്ടലായാണ് സംഭവം വിലയിരുത്തപ്പെടുന്നത്.

English summary: One train driver died and 89 people were injured after two East Midlands Railway trains collided near Bedford.