യുകെയിൽ രാഷ്ട്രീയ സംഭാവനകൾക്കും എംപിമാരുടെ സമ്മാനങ്ങൾക്കും കർശന നിയന്ത്രണം; സുതാര്യത ഉറപ്പാക്കാൻ നടപടികൾ

ലണ്ടൻ : യുകെയിൽ രാഷ്ട്രീയ പാർട്ടികൾക്കും തിരഞ്ഞെടുപ്പ് സ്ഥാനാർഥികൾക്കും വ്യക്തികളും കമ്പനികളും സംഘടനകളും നൽകുന്ന സാമ്പത്തിക സംഭാവനകൾക്ക് കർശനമായ നിയമവ്യവസ്ഥകളും സുതാര്യത ഉറപ്പാക്കുന്ന നിയന്ത്രണങ്ങളും നിലനിൽക്കുന്നു. വോട്ടർ പട്ടികയിലുള്ള വ്യക്തികൾ, യുകെയിൽ രജിസ്റ്റർ ചെയ്ത് നിയമാനുസൃതമായി പ്രവർത്തിക്കുന്ന കമ്പനികൾ, ട്രേഡ് യൂണിയനുകൾ, അംഗീകൃത സംഘടനകൾ എന്നിവയ്ക്കാണ് സാധാരണയായി സംഭാവന നൽകാൻ നിയമപരമായ അനുമതിയുള്ളത്. പാർട്ടികൾക്ക് ലഭിക്കുന്ന 500 പൗണ്ടിന് മുകളിലുള്ളതും സ്ഥാനാർഥികൾക്ക് ലഭിക്കുന്ന 50 പൗണ്ടിന് മുകളിലുള്ളതുമായ തുകകൾ അംഗീകൃത ഉറവിടങ്ങളിൽ നിന്നായിരിക്കണം.

രാഷ്ട്രീയ സംഭാവനകളുടെ സുതാര്യത ഉറപ്പാക്കുന്നതിനായി തുക നൽകിയ വ്യക്തിയുടെയോ സ്ഥാപനത്തിന്റെയോ പേര്, തുക, തീയതി എന്നിവ പൊതുജനങ്ങൾക്ക് പരിശോധിക്കാവുന്ന ഔദ്യോഗിക രജിസ്റ്ററിൽ രേഖപ്പെടുത്തേണ്ടതുണ്ട്. നിലവിലെ വ്യവസ്ഥ അനുസരിച്ച് ഒരു വർഷത്തിനിടെ 11,180 പൗണ്ടിന് മുകളിലുള്ള സംഭാവനകൾ ഔദ്യോഗികമായി റിപ്പോർട്ട് ചെയ്യണം. സമീപകാലത്ത് വൻതോതിലുള്ള സംഭാവനകൾ രാഷ്ട്രീയ പാർട്ടികളിലേക്ക് എത്തിയതോടെ പരമാവധി പരിധി നിശ്ചയിക്കണമെന്ന ആവശ്യം ശക്തമായിട്ടുണ്ട്.

എംപിമാർക്ക് പാർലമെന്ററി സ്ഥാനവുമായി ബന്ധപ്പെട്ടോ രാഷ്ട്രീയ ആവശ്യങ്ങൾക്കായോ ലഭിക്കുന്ന 300 പൗണ്ടിന് മുകളിലുള്ള സമ്മാനങ്ങളും ആനുകൂല്യങ്ങളും രജിസ്റ്ററിൽ രേഖപ്പെടുത്തണം. സമ്മാനത്തിന്റെ മൂല്യം 500 പൗണ്ടിന് മുകളിലാണെങ്കിൽ അത് നൽകുന്ന വ്യക്തിയോ സ്ഥാപനമോ അംഗീകൃത ഉറവിടമായിരിക്കണം. നൈജൽ ഫറാജിന് ലഭിച്ച അഞ്ച് മില്യൺ പൗണ്ടിന്റെ സമ്മാനം വ്യക്തിപരമാണോ രാഷ്ട്രീയ സ്വഭാവമുള്ളതാണോ എന്ന വിഷയത്തിൽ അന്വേഷണം പുരോഗമിക്കുകയാണ്.

English Summary: UK political donations and MPs’ gifts are subject to strict disclosure rules amid growing calls for tighter limits.