യുകെയിൽ 16 വയസ്സിൽ താഴെയുള്ളവർക്ക് സോഷ്യൽ മീഡിയ നിരോധിക്കാനുള്ള നീക്കത്തിനെതിരെ അമേരിക്ക

ലണ്ടൻ : കുട്ടികളുടെ സുരക്ഷ മുൻനിർത്തി 16 വയസ്സിൽ താഴെയുള്ളവർക്ക് സോഷ്യൽ മീഡിയ വിലക്കാനുള്ള ബ്രിട്ടന്റെ നീക്കത്തിനെതിരെ കടുത്ത എതിർപ്പുമായി അമേരിക്ക രംഗത്ത്. ഇത്തരം കർശനമായ നിയന്ത്രണങ്ങൾ അമേരിക്കൻ സാങ്കേതികവിദ്യാ കമ്പനികൾക്ക് മേൽ വലിയ സാമ്പത്തിക ബാധ്യതയും അനാവശ്യ സമ്മർദ്ദവും ഉണ്ടാക്കുമെന്ന് ട്രംപ് ഭരണകൂടം വ്യക്തമാക്കി. ഓൺലൈൻ സുരക്ഷയുമായി ബന്ധപ്പെട്ട് ബ്രിട്ടീഷ് സർക്കാർ നടത്തുന്ന ചർച്ചകളിലാണ് ലണ്ടനിലെ യുഎസ് എംബസി വഴി അമേരിക്ക തങ്ങളുടെ വിയോജിപ്പ് അറിയിച്ചത്. ഒരു പൊതു മാനദണ്ഡം ഉപയോഗിച്ച് എല്ലാ പ്ലാറ്റ്‌ഫോമുകളെയും പൂർണ്ണമായി നിരോധിക്കുന്നത് പ്രായോഗികമല്ലെന്നാണ് യുഎസിന്റെ നിലപാട്.
പ്രായപൂർത്തിയാകാത്തവരെ തിരിച്ചറിയാൻ നിലവിലുള്ള സാങ്കേതിക വിദ്യകൾ കൃത്യമായി ഉപയോഗിക്കാൻ കഴിയില്ലെന്നും യുഎസ് എംബസി ചൂണ്ടിക്കാട്ടി. സോഷ്യൽ മീഡിയ ആപ്പുകൾ പൂർണ്ണമായി നിരോധിക്കുന്നതിന് പകരം മാതാപിതാക്കൾക്ക് കുട്ടികളുടെ അക്കൗണ്ടുകൾ നിയന്ത്രിക്കാനും സ്വകാര്യത ഉറപ്പാക്കാനുമുള്ള മികച്ച സംവിധാനങ്ങൾ ഒരുക്കുകയാണ് ചെയ്യേണ്ടത്. ലണ്ടനും വാഷിംഗ്ടണും തമ്മിൽ ഓൺലൈൻ സുരക്ഷാ നിയമങ്ങളെ ചൊല്ലി നേരത്തെയും അഭിപ്രായവ്യത്യാസങ്ങൾ ഉണ്ടായിരുന്നു. ബ്രിട്ടനിലെ പുതിയ നിയമങ്ങൾ അഭിപ്രായസ്വാതന്ത്ര്യത്തെ തടസ്സപ്പെടുത്തുന്നതാണെന്ന് അമേരിക്കൻ വൈസ് പ്രസിഡന്റ് ജെഡി വാൻസ് ഉൾപ്പെടെയുള്ള പ്രമുഖ നേതാക്കൾ മുൻപ് വിമർശിച്ചിരുന്നു.

അതേസമയം ദോഷകരമായ സോഷ്യൽ മീഡിയ ആപ്പുകൾ നിരോധിക്കുന്ന കാര്യത്തിൽ അടുത്ത ആഴ്ച തന്നെ യുകെ പ്രധാനമന്ത്രി കീർ സ്റ്റാർമർ നിർണ്ണായക പ്രഖ്യാപനം നടത്തുമെന്നാണ് സൂചന. ഗെയിമിംഗ് പ്ലാറ്റ്‌ഫോമുകളിൽ അപരിചിതരുമായി സംസാരിക്കുന്നതിന് നിയന്ത്രണം ഏർപ്പെടുത്തുന്നതും എഐ ചാറ്റ്ബോട്ടുകളുടെ ഉപയോഗം പരിമിതപ്പെടുത്തുന്നതും ബ്രിട്ടന്റെ പരിഗണനയിലുണ്ട്. ഓസ്‌ട്രേലിയ ഇതിനകം തന്നെ 16 വയസ്സിൽ താഴെയുള്ളവർക്ക് സോഷ്യൽ മീഡിയ പൂർണ്ണമായി നിരോധിച്ചിട്ടുണ്ട്. എന്നാൽ കുട്ടികളുടെ സുരക്ഷ ഉറപ്പാക്കുന്നതിനൊപ്പം നിയമങ്ങൾ ഫലപ്രദമായി നടപ്പിലാക്കാനാണ് തങ്ങൾ ശ്രമിക്കുന്നതെന്ന് യുകെ സർക്കാർ വക്താവ് വ്യക്തമാക്കി.

English Summary: The US government has urged the UK to reconsider its proposed social media ban for under-16s, citing heavy compliance burdens on American tech firms.