ആൻഡി ബേൺഹാമിന് സ്റ്റാർമറുടെ മുന്നറിയിപ്പ്; നേതൃത്വ വെല്ലുവിളി രാജ്യത്തിന് നല്ലതല്ലെന്ന് പ്രതികരണം

ലണ്ടൻ : ലേബർ പാർട്ടിയിലെ ആഭ്യന്തര തർക്കങ്ങൾ രൂക്ഷമാകുന്നതിനിടെ ഗ്രേറ്റർ മാഞ്ചസ്റ്റർ മേയർ ആൻഡി ബേൺഹാമിന് ശക്തമായ മുന്നറിയിപ്പുമായി ബ്രിട്ടീഷ് പ്രധാനമന്ത്രി സർ കിയർ സ്റ്റാർമർ രംഗത്ത്. വരാനിരിക്കുന്ന മേക്കർഫീൽഡ് ഉപതിരഞ്ഞെടുപ്പിൽ വിജയിച്ച് പാർലമെന്റിലെത്തിയാലും ഉടൻ തന്നെ ലേബർ പാർട്ടി നേതൃത്വത്തിനെതിരെ നീക്കങ്ങൾ ആരംഭിക്കരുതെന്നാണ് സ്റ്റാർമറുടെ മുന്നറിയിപ്പ്. ജി7 ഉച്ചകോടിക്കിടെ മാധ്യമങ്ങളോട് സംസാരിക്കവെ നേതൃത്വം സംബന്ധിച്ച അനിശ്ചിതത്വങ്ങൾ രാജ്യത്തിന് ഒട്ടും നല്ലതല്ലെന്ന് പ്രധാനമന്ത്രി വ്യക്തമാക്കി.

മേക്കർഫീൽഡ് ഉപതിരഞ്ഞെടുപ്പിൽ ആൻഡി ബേൺഹാം വിജയിക്കുകയാണെങ്കിൽ അദ്ദേഹം നിലവിലെ ഗ്രേറ്റർ മാഞ്ചസ്റ്റർ മേയർ സ്ഥാനം രാജിവെക്കേണ്ടി വരും. ഇതോടെ പുതിയ മേയറെ കണ്ടെത്തുന്നതിനുള്ള ഉപതിരഞ്ഞെടുപ്പ് വരും ഓഗസ്റ്റ് 6നകം നടക്കാനാണ് സാധ്യത. ഈ സാഹചര്യത്തിൽ പാർട്ടിയുടെ പൂർണ്ണ ശ്രദ്ധ അടുത്ത ലേബർ വിജയത്തിലായിരിക്കണമെന്നാണ് സ്റ്റാർമർ ആവശ്യപ്പെടുന്നത്. അതേസമയം, ബേൺഹാം വിജയിച്ച് പാർലമെന്റിലെത്തുകയാണെങ്കിൽ ലേബർ സർക്കാരിൽ അദ്ദേഹത്തിന് പ്രധാന പങ്ക് വഹിക്കാനാകുമെന്നും മന്ത്രിസഭയിൽ അനുയോജ്യമായ സ്ഥാനം നൽകാൻ തയ്യാറാണെന്ന സൂചനയും പ്രധാനമന്ത്രി നൽകിയിട്ടുണ്ട്.

എന്നാൽ മുൻ ആരോഗ്യ സെക്രട്ടറി വെസ് സ്ട്രീറ്റിംഗ് അടുത്ത ആഴ്ച തന്നെ പാർട്ടിയിലെ നേതൃത്വമത്സരത്തിന് തയ്യാറാണെന്ന് വ്യക്തമാക്കിയതോടെ ലേബർ പാർട്ടിയിലെ ആഭ്യന്തര സമ്മർദ്ദം കൂടുതൽ ശക്തമായിരിക്കുകയാണ്. കഴിഞ്ഞ ആഴ്ചകളിൽ ജോൺ ഹീലിയും അൽ കാർൺസും മന്ത്രിസഭയിൽ നിന്ന് രാജിവെച്ചത് സ്റ്റാർമറുടെ നേതൃത്വത്തെ നേരത്തെ തന്നെ സമ്മർദ്ദത്തിലാക്കിയിരുന്നു. പ്രതിരോധ ഫണ്ടിംഗുമായി ബന്ധപ്പെട്ട തർക്കങ്ങളും പാർട്ടിക്കുള്ളിലെ അധികാര പോരാട്ടവും തുടരുന്ന പശ്ചാത്തലത്തിൽ മേക്കർഫീൽഡ് ഉപതിരഞ്ഞെടുപ്പും അതിന് പിന്നാലെയുള്ള മാഞ്ചസ്റ്റർ മേയർ തെരഞ്ഞെടുപ്പും ലേബർ പാർട്ടിയുടെ ഭാവി രാഷ്ട്രീയ ദിശ നിർണ്ണയിക്കുന്നതിൽ നിർണായകമാകുമെന്നാണു വിലയിരുത്തൽ.

Prime Minister Keir Starmer has warned Andy Burnham against launching an immediate Labour leadership challenge if he enters Parliament.