ആൻഡി ബേൺഹാമിന്റെ പിൻഗാമിയായി ബെവ് ക്രെയ്ഗ്; ഗ്രേറ്റർ മാഞ്ചസ്റ്റർ മേയർ സ്ഥാനം ലേബർ നിലനിർത്തി

ലണ്ടൻ : ഗ്രേറ്റർ മാഞ്ചസ്റ്റർ മേയറായി ലേബർ പാർട്ടിയുടെ ബെവ് ക്രെയ്ഗ് തിരഞ്ഞെടുക്കപ്പെട്ടു. പാർലമെന്റിലേക്ക് മടങ്ങിയ ആൻഡി ബേൺഹാം മേയർ സ്ഥാനം ഒഴിഞ്ഞതിനെ തുടർന്നാണ് തിരഞ്ഞെടുപ്പ് നടന്നത്. മാഞ്ചസ്റ്റർ സിറ്റി കൗൺസിൽ നേതാവായ ക്രെയ്ഗിന് ആദ്യ റൗണ്ടിൽ 47.15 ശതമാനം വോട്ട് ലഭിച്ചെങ്കിലും നേരിട്ടുള്ള വിജയത്തിന് ആവശ്യമായ 50 ശതമാനം നേടാനായില്ല. തുടർന്ന് രണ്ടാം മുൻഗണനാ വോട്ടുകൾ കൂടി എണ്ണിയതോടെയാണ് അവർ വിജയം ഉറപ്പിച്ചത്.

ആദ്യ റൗണ്ടിൽ 21 ശതമാനം വോട്ടുമായി റിഫോം യുകെ രണ്ടാം സ്ഥാനത്തെത്തി. പുറത്തായ സ്ഥാനാർഥികളുടെ രണ്ടാം മുൻഗണനാ വോട്ടുകൾ എണ്ണിയപ്പോൾ ലേബറിന് 58,000ത്തിലേറെ അധിക വോട്ടുകളും റിഫോം യുകെയ്ക്ക് 45,250 വോട്ടുകളും ലഭിച്ചു. ഒടുവിൽ ക്രെയ്ഗിന് ആദ്യവും രണ്ടാം മുൻഗണനയും ചേർത്ത് 3,09,525 വോട്ടുകൾ ലഭിച്ചപ്പോൾ റിഫോം യുകെയുടെ സിയാൻ ആസ്‌റ്റ്ലിക്ക് 1,57,178 വോട്ടുകളാണ് നേടാനായത്. രണ്ട് ദശലക്ഷത്തിലേറെ പേർക്ക് വോട്ടവകാശമുണ്ടായിരുന്നെങ്കിലും പോളിങ് 25 ശതമാനത്തിൽ താഴെയായിരുന്നു.

2017 മുതൽ ഗ്രേറ്റർ മാഞ്ചസ്റ്റർ മേയറായിരുന്ന ബേൺഹാം രണ്ട് തവണ വീണ്ടും തിരഞ്ഞെടുക്കപ്പെടുകയും 2024ൽ 63 ശതമാനം വോട്ട് നേടുകയും ചെയ്തിരുന്നു. മേയ് മാസത്തിൽ മേക്കർഫീൽഡ് ഉപതിരഞ്ഞെടുപ്പിൽ മത്സരിക്കുമെന്ന് പ്രഖ്യാപിച്ച അദ്ദേഹം ജൂണിൽ വിജയിച്ച് പാർലമെന്റിലേക്ക് മടങ്ങി. തുടർന്ന് ലേബർ നേതൃത്വവും പ്രധാനമന്ത്രി സ്ഥാനവും സ്വന്തമാക്കിയ ബേൺഹാം, ലണ്ടനിൽ കേന്ദ്രീകരിച്ചിരിക്കുന്ന അധികാരങ്ങൾ പ്രദേശങ്ങളിലേക്ക് കൈമാറുന്നതിനുള്ള പദ്ധതികളും പ്രഖ്യാപിച്ചിരുന്നു. പുതിയ മേയർ ബെവ് ക്രെയ്ഗ് ഈ പ്രാദേശിക വികസന നയങ്ങൾ മുന്നോട്ട് കൊണ്ടുപോകുമെന്നാണ് പ്രതീക്ഷ.

English Summary: Labour’s Bev Craig has been elected Greater Manchester mayor, succeeding Andy Burnham after a second-round count.