സ്കോട്ട്ലൻഡ് മലയാളി അസോസിയേഷൻ പുതിയ ഭാരവാഹികൾ ചുമതലയേറ്റു; വിപുലമായ കർമ്മപദ്ധതികളുമായി മുന്നോട്ട്
ലണ്ടൻ : സ്കോട്ട്ലൻഡിലെ പ്രവാസി മലയാളി സമൂഹത്തിന്റെ ഉന്നമനത്തിനായി കഴിഞ്ഞ 16 വർഷമായി മാതൃകാപരമായ പ്രവർത്തനങ്ങൾ കാഴ്ചവെക്കുന്ന സ്കോട്ട്ലൻഡ് മലയാളി അസോസിയേഷന്റെ (SMA) 2026-27 പ്രവർത്തന വർഷത്തേക്കുള്ള പുതിയ എക്സിക്യൂട്ടീവ് കമ്മിറ്റി നിലവിൽ വന്നു. സിന്റോ പാപ്പച്ചൻ പ്രസിഡന്റായും അമർനാഥ് ടി. എസ് സെക്രട്ടറിയായും തിരഞ്ഞെടുക്കപ്പെട്ടു. ഡെലീന ഡേവിസ് ആണ് ട്രഷറർ. ജനറൽ കൺവീനറായി അരുൺ ദേവസിക്കുട്ടിയും വൈസ് പ്രസിഡന്റുമാരായി ഉദയ ഒ. കെ, സുബിത്ത് ജയകുമാർ എന്നിവരും ചുമതലയേറ്റു. വിവിധ മേഖലകളിൽ പ്രാവീണ്യം തെളിയിച്ച വ്യക്തികളുൾപ്പെടുന്ന വിപുലമായ കമ്മിറ്റിയാണ് ഇത്തവണ സംഘടനയെ നയിക്കുന്നത്.
പുതിയതായി സ്കോട്ട്ലൻഡിലെത്തുന്ന വിദ്യാർത്ഥികൾക്കും ഉദ്യോഗാർത്ഥികൾക്കും ആവശ്യമായ സഹായങ്ങൾ നൽകുന്നതിനായി പ്രത്യേക മുൻഗണന നൽകുമെന്ന് പുതിയ ഭാരവാഹികൾ അറിയിച്ചു. ഇതിനായി യൂത്ത്, യൂണിവേഴ്സിറ്റി കോർഡിനേറ്റർമാരുടെ സേവനം ഉറപ്പാക്കും. സംഘടനയെ ഒരു രജിസ്റ്റേഡ് ചാരിറ്റിയായി ഉയർത്തുന്നതിനുള്ള നടപടികൾ പുരോഗമിക്കുകയാണ്. ആരോഗ്യ മേഖലയിലെ പ്രവർത്തനങ്ങൾക്കും ജീവകാരുണ്യ പ്രവർത്തനങ്ങൾക്കും വരും വർഷങ്ങളിൽ കൂടുതൽ ഊന്നൽ നൽകാനാണ് കമ്മിറ്റി തീരുമാനിച്ചിരിക്കുന്നത്. ഹിമ ഷെമീം, വിഘ്നേഷ് കുമാർ (ജോയിന്റ് സെക്രട്ടറിമാർ), ജീജോ റോയ്സ് അക്കര (PRO) എന്നിവരടക്കം പതിനാലോളം ഭാരവാഹികളാണ് പുതിയ ടീമിലുള്ളത്.
വരാനിരിക്കുന്ന മാസങ്ങളിൽ വിപുലമായ പരിപാടികളാണ് അസോസിയേഷൻ ആസൂത്രണം ചെയ്തിരിക്കുന്നത്. മാർച്ച് മാസത്തിൽ വനിതാദിനത്തോടും മാതൃദിനത്തോടും അനുബന്ധിച്ച് അമ്മമാർക്കും കുട്ടികൾക്കുമായി പ്രത്യേക മത്സരങ്ങൾ സംഘടിപ്പിക്കും. ഏപ്രിൽ 11-ന് ഈസ്റ്റർ - വിഷു - ഈദ് സംയുക്ത ആഘോഷങ്ങളും കായിക പ്രേമികൾക്കായി അഖില യുകെ ക്രിക്കറ്റ് ടൂർണമെന്റും നടക്കും. സ്കോട്ട്ലൻഡിലെ മുഴുവൻ മലയാളികളെയും ഈ പരിപാടികളിലേക്ക് സ്വാഗതം ചെയ്യുന്നതായി ഔദ്യോഗിക ഭാരവാഹികൾ അറിയിച്ചു.
English Summary:
The Scotland Malayali Association has elected its new executive committee for 2026-27 with Sinto Pappachan as President and Amarnath T.S. as Secretary.
