വംശീയ പരാമർശങ്ങൾ പുറത്തുവന്നു; യുകെയിൽ റിഫോം കൗൺസിലർ അലൻ ഫീനി രാജിവച്ചു

ലണ്ടൻ : ഏഷ്യൻ വംശജർക്കെതിരായ വംശീയ പരാമർശങ്ങൾ രഹസ്യക്യാമറ അന്വേഷണത്തിലൂടെ പുറത്തുവന്നതിനെത്തുടർന്ന് റിഫോം യുകെ കൗൺസിലറായിരുന്ന അലൻ ഫീനി രാജിവച്ചു. സോളിഹൾ ബറോ കൗൺസിലിലും ബർമിങ്ങാം സിറ്റി കൗൺസിലിലും വഹിച്ചിരുന്ന എല്ലാ പദവികളും ഒഴിഞ്ഞതായി വെള്ളിയാഴ്ച ഫെയ്സ്ബുക്കിലൂടെ അദ്ദേഹം അറിയിച്ചു. തന്റെ പരാമർശങ്ങൾക്ക് ന്യായീകരണമില്ലെന്നും ഉത്തരവാദിത്വം ഏറ്റെടുക്കുകയാണെന്നും ഫീനി വ്യക്തമാക്കി. മേയിലെ തദ്ദേശ തിരഞ്ഞെടുപ്പ് പ്രചാരണത്തിനിടെ ഏഷ്യൻ വീട്ടുടമകളെ അധിക്ഷേപിക്കുന്നതും ബ്രിട്ടനിലെ വെള്ളക്കാരല്ലാത്ത ജനങ്ങളുടെ എണ്ണം ഒരുശതമാനത്തിൽ കൂടരുതെന്ന് പറയുന്നതുമായ ദൃശ്യങ്ങളാണ് ഐടിവിയുടെ അന്വേഷണത്തിൽ പുറത്തുവന്നത്.

ഈ വർഷം ബർമിങ്ങാമിലെ ഷാർഡ് എൻഡ് വാർഡിലും സോളിഹളിലെ കാസിൽ ബ്രോംവിച്ച് വാർഡിലും വിജയിച്ച ഫീനി പിന്നീട് സോളിഹളിന്റെ ഡെപ്യൂട്ടി മേയറായും നിയമിതനായിരുന്നു. ദൃശ്യങ്ങൾ പുറത്തുവന്നതിന് പിന്നാലെ ‘വ്യക്തിപരമായ കാരണങ്ങളാൽ’ റിഫോം വിടുകയാണെന്ന് പ്രഖ്യാപിച്ചെങ്കിലും കൗൺസിലർ സ്ഥാനങ്ങൾ നിലനിർത്തി സ്വതന്ത്രനായി തുടരുകയായിരുന്നു. വിമർശനം ശക്തമായതോടെയാണ് എല്ലാ പദവികളും രാജിവച്ചത്. പരാമർശങ്ങൾ തെറ്റായതും അധിക്ഷേപകരവും പൂർണമായും അംഗീകരിക്കാനാവാത്തതുമാണെന്ന് അദ്ദേഹം ക്ഷമാപണത്തിൽ പറഞ്ഞു. താൻ പ്രതിനിധീകരിക്കുന്ന സമൂഹങ്ങൾക്കുണ്ടായ വേദനയും രോഷവും മനസ്സിലാക്കുന്നുവെന്നും അതിൽ ഖേദിക്കുന്നുവെന്നും ഫീനി അറിയിച്ചു. ഒഴിവുവരുന്ന സീറ്റുകളിലെ ഉപതിരഞ്ഞെടുപ്പ് സംബന്ധിച്ച സമയക്രമം അതത് കൗൺസിലുകൾ അറിയിക്കും.

റിഫോം യുകെയെക്കുറിച്ച് ഐടിവി ഒരുവർഷമായി നടത്തിയ രഹസ്യാന്വേഷണത്തിന്റെ ഭാഗമായാണ് ദൃശ്യങ്ങൾ പുറത്തുവന്നത്. ഫീനിക്കൊപ്പം തിരഞ്ഞെടുപ്പ് പ്രചാരണത്തിൽ പങ്കെടുത്ത ജെയ്മി ക്യാംപ്ബെൽ, ക്രിസ് വീലൻ എന്നിവരുടെ വംശീയ പരാമർശങ്ങളും അന്വേഷണത്തിൽ ഉൾപ്പെട്ടിരുന്നു. പിന്നീട് കൗൺസിലർമാരായ ഇരുവരും വിവാദത്തെത്തുടർന്ന് രാജിവച്ചു. തീവ്രനിലപാടുകാരെയും വിദ്വേഷം പ്രചരിപ്പിക്കുന്നവരെയും പാർട്ടിയിൽനിന്ന് ഒഴിവാക്കുമെന്ന് റിഫോം നേതാവ് നൈജൽ ഫറാജ് ആവർത്തിച്ച് പ്രഖ്യാപിച്ച പശ്ചാത്തലത്തിലാണ് സംഭവം. തിരഞ്ഞെടുപ്പിൽ മത്സരിക്കാൻ ആഗ്രഹിക്കുന്ന എല്ലാവരുടെയും പശ്ചാത്തലം പരിശോധിക്കുന്നുണ്ടെന്നാണ് പാർട്ടിയുടെ നിലപാട്.

English Summary: Former Reform UK councillor Alan Feeney resigned from both councils after an ITV undercover investigation exposed his racist remarks.