ഗോപിനാഥ് മുതുകാടിനൊപ്പം 'തുവൽസ്പർശം'; നോട്ടിങ്ങാമിൽ കാരുണ്യത്തിന്റെ മഹാസംഗമം മാർച്ച് 14ന്

ലണ്ടൻ : യുകെയിലെ പ്രമുഖ വനിതാ കൂട്ടായ്മയായ മദേഴ്‌സ് ചാരിറ്റിയുടെ പന്ത്രണ്ടാമത് വാർഷികാഘോഷവും മദേഴ്‌സ് ഡേ സംഗമവും 'തുവൽസ്പർശം 2026' എന്ന പേരിൽ നോട്ടിങ്ങാമിൽ അരങ്ങേറുന്നു. മാർച്ച് 14 ശനിയാഴ്ച നോട്ടിങ്ങാമിലെ ആഷ്‌ഫീൽഡിലുള്ള കിർബി ലഷർ സെന്ററിൽ വെച്ചാണ് ഈ മെഗാ ഷോ നടക്കുന്നത്. ലോകപ്രശസ്ത മജീഷ്യൻ ഗോപിനാഥ് മുതുകാട് മുഖ്യാതിഥിയായി പങ്കെടുക്കുന്ന ചടങ്ങിൽ കലാകേരള ആർട്സ് ആൻഡ് സ്പോർട്സ് ക്ലബ് ആഷ്‌ഫീൽഡ് & മാൻസ്ഫീൽഡിന്റെ സഹകരണവുമുണ്ടാകും. രാവിലെ 11 മണി മുതൽ രാത്രി 8 മണി വരെ നീണ്ടുനിൽക്കുന്ന വിപുലമായ കലാപരിപാടികളാണ് അന്നേദിവസം ആസൂത്രണം ചെയ്തിരിക്കുന്നത്.

സൗതാംപ്ടണിൽ തുടക്കം കുറിച്ച മദേഴ്‌സ് ചാരിറ്റി ഇന്ന് യുകെയിലുടനീളം പടർന്നു പന്തലിച്ച വലിയൊരു സ്ത്രീ കൂട്ടായ്മയായി വളർന്നു കഴിഞ്ഞു. കേരളത്തിലെ നിരാലംബരായ അമ്മമാരെ സഹായിക്കുക എന്ന ലക്ഷ്യത്തോടെ പ്രവർത്തിക്കുന്ന ഈ സംഘടന ഇതുവരെ രണ്ട് കോടി മുപ്പത്തിമൂന്ന് ലക്ഷം രൂപയുടെ ധനസഹായം നൽകിയിട്ടുണ്ട്. കാരുണ്യവും മാനവികതയും കൈമുതലാക്കി പ്രവർത്തിക്കുന്ന ഈ സംഘടനയ്ക്ക് അവരുടെ ജീവിതപങ്കാളികളും പൂർണ്ണ പിന്തുണയുമായി ഒപ്പമുണ്ട്. മാതൃത്വത്തിന്റെ കരുത്തും കാരുണ്യവും വിളിച്ചോതുന്ന ഈ സംഗമം പ്രവാസലോകത്തെ വലിയൊരു ജീവകാരുണ്യ പ്രവർത്തനമായി മാറും.

പരിപാടിയിലേക്ക് പ്രവേശനം തികച്ചും സൗജന്യമാണ്. നൂറോളം വാഹനങ്ങൾക്ക് പാർക്ക് ചെയ്യാനുള്ള സൗകര്യവും സംഘാടകർ ഒരുക്കിയിട്ടുണ്ട്. വിവിധ പ്രശസ്ത റെസ്റ്റോറന്റുകൾ തയ്യാറാക്കുന്ന രുചികരമായ ഭക്ഷണശാലകൾ, ചാരിറ്റി ഷോപ്പ്, റാഫിൾ, ലേലം തുടങ്ങി ജീവകാരുണ്യ പ്രവർത്തനങ്ങൾക്കായി ഫണ്ട് ശേഖരിക്കുന്ന വിവിധ പരിപാടികളും ഇതിന്റെ ഭാഗമായി നടക്കും. ആഘോഷത്തോടൊപ്പം കാരുണ്യത്തിന്റെ കണികകൾ കൂടി പങ്കുവെക്കുന്ന ഈ മഹത്തായ സംഗമത്തിലേക്ക് ഏവരെയും ഹൃദയപൂർവ്വം ക്ഷണിക്കുന്നതായി സംഘാടകർ അറിയിച്ചു.

English Summary:

Mothers Charity UK is hosting 'Thuvalsparsham 2026' featuring Gopinath Muthukad on March 14 at Kirkby Leisure Centre, Nottingham.