യു.കെ. സ്ഥിരതാമസത്തിന് നിബന്ധനകൾ കടുപ്പിച്ചു: കുടിയേറ്റക്കാർക്ക് ഇനി 'സമൂഹത്തിന് സംഭാവന' തെളിയിക്കേണ്ടിവരും

ലണ്ടൻ : ബ്രിട്ടനിൽ നിയമപരമായി കുടിയേറിയവർക്ക് സ്ഥിരതാമസാനുമതി (Indefinite Leave to Remain- ILR) നേടുന്നതിന് പുതിയതും കർശനവുമായ നിബന്ധനകൾ ഏർപ്പെടുത്തുമെന്ന് ഹോം സെക്രട്ടറി ഷബാന മഹ്മൂദ് ലേബർ പാർട്ടി സമ്മേളനത്തിൽ പ്രഖ്യാപിച്ചു. രാജ്യത്തിന് സാമൂഹികമായി സംഭാവന ചെയ്യുന്നുണ്ടെന്ന് തെളിയിക്കുന്നവർക്ക് മാത്രമേ ഇനി സ്ഥിരതാമസത്തിന് അർഹതയുണ്ടാവുകയുള്ളൂ. നിലവിലെ അഞ്ചുവർഷത്തെ കാത്തിരിപ്പുകാലാവധി പത്തുവർഷമായി ഇരട്ടിയാക്കാനുള്ള പദ്ധതികളിലാണ് സർക്കാർ. ഇംഗ്ലീഷ് ഭാഷയിൽ ഉയർന്ന നിലവാരം, ക്രിമിനൽ റെക്കോർഡ് ഇല്ലായ്മ, സമൂഹസേവനത്തിൽ പങ്കാളിത്തം, നാഷണൽ ഇൻഷുറൻസ് അടയ്ക്കൽ, ആനുകൂല്യങ്ങൾ കൈപ്പറ്റാതിരിക്കുക തുടങ്ങിയ നിബന്ധനകൾ പാലിച്ചാൽ മാത്രമേ ഇനി കുടിയേറ്റക്കാർക്ക് യു.കെ.യിൽ സ്ഥിരമായി താമസിക്കാനാവൂ.

കുടിയേറ്റ നയങ്ങളിൽ കൂടുതൽ കടുപ്പമേറിയ നിലപാട് സ്വീകരിച്ചുകൊണ്ട്, രാജ്യത്ത് വർധിച്ചുവരുന്ന കുടിയേറ്റ പ്രശ്നങ്ങളെ അഭിമുഖീകരിക്കാനുള്ള ശ്രമത്തിലാണ് ഹോം സെക്രട്ടറി. ബ്രിട്ടന്റെ പുരോഗതിയുടെ കഥ ചോദ്യം ചെയ്യപ്പെടുകയാണെന്നും, രാജ്യത്തോടുള്ള ദേശസ്നേഹം 'വംശീയ ദേശീയത'യിലേക്ക് ചുരുങ്ങുന്നത് തടയാൻ കുടിയേറ്റത്തിൽ വ്യക്തമായ നിലപാടുകൾ വേണമെന്നും അവർ കൂട്ടിച്ചേർത്തു. കുടിയേറ്റം സംബന്ധിച്ച ആശങ്കകൾക്ക് ചെവികൊടുത്തില്ലെങ്കിൽ, തൊഴിലാളിവർഗ്ഗ വിഭാഗം നൈജൽ ഫരാജിന്റെ റിഫോം യുകെ പാർട്ടി പോലുള്ളവരുടെ 'തെറ്റായ വാഗ്ദാനങ്ങളിൽ' അഭയം തേടുമെന്നും അവർ മുന്നറിയിപ്പ് നൽകി. ബോർഡർ സുരക്ഷയ്ക്ക് എന്ത് വിലകൊടുത്തും ഉറപ്പുനൽകുമെന്നും മഹ്മൂദ് വ്യക്തമാക്കി.

ലേബർ സർക്കാർ കൊണ്ടുവരുന്ന ഈ പുതിയ നയം, സ്ഥിരതാമസം പൂർണ്ണമായും നിർത്തലാക്കണമെന്ന് ആവശ്യപ്പെടുന്ന റിഫോം യുകെയുമായി ഒരു വ്യക്തമായ വേർതിരിവ് സൃഷ്ടിക്കാനാണ് ലക്ഷ്യമിടുന്നത്. റിഫോം യുകെയുടെ നയം 'വംശീയവും അധാർമികവു'മാണെന്ന് പ്രധാനമന്ത്രി സർ കിയർ സ്റ്റാർമർ വിശേഷിപ്പിച്ചിരുന്നു. പുതിയ മാറ്റങ്ങൾ നടപ്പാക്കുമ്പോൾ 'തലമുറകളായി നിലനിൽക്കുന്ന ചില നിയമപരമായ പരിമിതികളെയും പൊതുവായ അനുമാനങ്ങളെയും ചോദ്യം ചെയ്യേണ്ടി വരുമെന്നും, അത് എല്ലാവർക്കും ഇഷ്ടപ്പെട്ടെന്നുവരില്ലെന്നും' ഹോം സെക്രട്ടറി പാർട്ടി പ്രതിനിധികളോട് പറഞ്ഞു. നിലവിൽ ഏകദേശം 4.5 ദശലക്ഷം പേർക്ക് യു.കെ.യിൽ സ്ഥിരതാമസാനുമതി ഉണ്ടെന്നാണ് കണക്കാക്കുന്നത്.

English Summary: UK Home Secretary Shabana Mahmood announced stricter conditions for migrants seeking indefinite leave to remain (ILR), requiring them to prove societal contribution, including high-standard English, a clean criminal record, and community volunteering, with the waiting period likely doubling from five to ten years.