യുവാക്കളുടെ മിനിമം വേജ് ഏകീകരണം വൈകിയേക്കും: ബ്രിട്ടീഷ് സർക്കാർ പ്രതിസന്ധിയിൽ

ലണ്ടൻ : ബ്രിട്ടനിൽ 18 മുതൽ 20 വയസ്സുവരെയുള്ള യുവാക്കളുടെ മിനിമം വേജ് മുതിർന്നവർക്ക് തുല്യമായി വർദ്ധിപ്പിക്കുമെന്ന ലേബർ പാർട്ടി വാഗ്ദാനം നടപ്പിലാക്കുന്നത് വൈകിയേക്കുമെന്ന് റിപ്പോർട്ടുകൾ. തിരഞ്ഞെടുപ്പ് പ്രകടനപത്രികയിലെ പ്രധാന വാഗ്ദാനങ്ങളിൽ ഒന്നായിരുന്ന 'ഏകീകൃത വേതന വ്യവസ്ഥ' നടപ്പിലാക്കുന്നത് നിലവിലെ സാമ്പത്തിക സാഹചര്യം പരിഗണിച്ച് നീട്ടിവെക്കാനാണ് സർക്കാർ ആലോചിക്കുന്നത്. യുവാക്കളെ ജോലിക്കെടുക്കുന്നതിൽ തൊഴിലുടമകൾക്കുണ്ടാകുന്ന അധിക സാമ്പത്തിക ബാധ്യതയും, അത് വഴി യുവാക്കൾക്കിടയിൽ തൊഴിലില്ലായ്മ വർദ്ധിക്കാനുള്ള സാധ്യതയുമാണ് സർക്കാരിനെ ഈ പിൻമാറ്റത്തിന് പ്രേരിപ്പിക്കുന്നത്.

രാജ്യത്തെ തൊഴിലില്ലായ്മ നിരക്ക് അഞ്ച് വർഷത്തിനിടയിലെ ഏറ്റവും ഉയർന്ന നിലയിലാണെന്ന് പുതിയ കണക്കുകൾ വ്യക്തമാക്കുന്നു. 16 മുതൽ 24 വയസ്സുവരെയുള്ളവർക്കിടയിൽ തൊഴിലില്ലായ്മ 16.1 ശതമാനമായി ഉയർന്നത് വലിയ ആശങ്കയാണ് സൃഷ്ടിക്കുന്നത്. ഹോസ്പിറ്റാലിറ്റി മേഖലയുൾപ്പെടെയുള്ള ഇടങ്ങളിൽ നാഷണൽ ഇൻഷുറൻസ് വിഹിതം വർദ്ധിപ്പിച്ചത് കമ്പനികൾക്ക് വലിയ ഭാരമായിട്ടുണ്ട്. ഈ സാഹചര്യത്തിൽ മിനിമം വേജ് കൂടി വർദ്ധിപ്പിച്ചാൽ ചെറുകിട സംരംഭങ്ങൾ യുവാക്കളെ ജോലിക്കെടുക്കുന്നത് കുറയ്ക്കുമെന്ന് ഫെഡറേഷൻ ഓഫ് സ്മോൾ ബിസിനസ് മുന്നറിയിപ്പ് നൽകി.

എന്നാൽ സർക്കാരിന്റെ ഈ നീക്കത്തിനെതിരെ ട്രേഡ് യൂണിയനുകൾ ശക്തമായ പ്രതിഷേധവുമായി രംഗത്തെത്തി. പ്രായത്തിന്റെ പേരിൽ വേതനത്തിൽ വിവേചനം കാണിക്കുന്നത് അംഗീകരിക്കാനാവില്ലെന്നും, വാഗ്ദാനത്തിൽ നിന്ന് സർക്കാർ പിന്നോട്ട് പോകുന്നത് തൊഴിലാളികളോടുള്ള വഞ്ചനയാണെന്നും ടി.യു.സി (TUC) ജനറൽ സെക്രട്ടറി പോൾ നൗവാക്ക് പറഞ്ഞു. നിലവിൽ 18-20 പ്രായക്കാർക്ക് മണിക്കൂറിന് 10 പൗണ്ടാണ് മിനിമം വേജ്. ഇത് ഏപ്രിൽ മാസത്തോടെ 10.85 ആയി ഉയരുമെങ്കിലും, 21 വയസ്സിന് മുകളിലുള്ളവരുടെ വേതനമായ 12.21 പൗണ്ടിലേക്ക് ഉടൻ എത്തിക്കില്ലെന്നാണ് സൂചന.

English Summary: The UK government is reportedly considering a delay in equalizing the minimum wage for 18-20 year olds due to concerns over rising youth unemployment and increased costs for businesses.