സഫോക്കിലെ ഇസ്ലാമിക സമ്മേളനത്തിന് തീവ്രവലതുപക്ഷ ഭീകരഭീഷണി; 12 പേർ അറസ്റ്റിൽ

ലണ്ടൻ : സഫോക്കിലെ ബാർഹാമിലുള്ള ശ്രബ്‌ലാൻഡ് ഹാളിൽ നടന്ന ഇസ്ലാമിക സമ്മേളനത്തിന് നേരെയുണ്ടായതായി സംശയിക്കുന്ന തീവ്രവലതുപക്ഷ ഭീകരഭീഷണിയുമായി ബന്ധപ്പെട്ട് 12 പേരെ പോലീസ് അറസ്റ്റ് ചെയ്തു. യുകെ ഇജ്തിമാ എന്ന പേരിൽ നടന്ന പരിപാടിയിൽ ഏകദേശം 10,000 പേർ പ്രാർത്ഥനയ്ക്കും മതപ്രഭാഷണങ്ങൾക്കുമായി പങ്കെടുത്തിരുന്നു. വിശ്വസനീയമായ ഭീഷണിവിവരം ലഭിച്ചതിനെ തുടർന്ന് പോലീസ് സംഘാടകരുമായി ചേർന്ന് ഞായറാഴ്ച രാവിലെ പരിപാടി നേരത്തെ അവസാനിപ്പിച്ചു.

സംഭവവുമായി ബന്ധപ്പെട്ട് 11 പുരുഷന്മാരെയും ഒരു സ്ത്രീയെയും അറസ്റ്റ് ചെയ്തതായും, ഇവരുമായി ബന്ധമുള്ള രാജ്യത്തിന്റെ വിവിധ ഭാഗങ്ങളിലെ വിലാസങ്ങളിൽ ഭീകരവിരുദ്ധ പോലീസ് പരിശോധന നടത്തിയതായും അധികൃതർ അറിയിച്ചു. ഗ്രാമത്തിലെ നിരവധി റോഡുകൾ അടച്ചിടുകയും സായുധ പോലീസിനെയും പ്രത്യേക സുരക്ഷാസേനയെയും വിന്യസിക്കുകയും ചെയ്തു. വൻ പോലീസ് നടപടിയിൽ ഗ്രാമവാസികൾ ഞെട്ടിയെങ്കിലും, ക്രമബദ്ധമായാണ് സാഹചര്യം കൈകാര്യം ചെയ്തതെന്ന് അവർ പ്രശംസിച്ചു.

പോലീസിന്റെ അതിവേഗ ഇടപെടൽ നിരവധി ജീവനുകൾ രക്ഷിച്ചിരിക്കാമെന്ന് മുസ്ലിം കൗൺസിൽ ഓഫ് ബ്രിട്ടൻ പറഞ്ഞു. മുസ്ലിം സമൂഹങ്ങൾ നേരിടുന്ന ഭീഷണി യാഥാർഥ്യമാണെന്നും സംഭവം ഒറ്റപ്പെട്ടതായി കാണരുതെന്നും സംഘടന മുന്നറിയിപ്പ് നൽകി. മുസ്ലിം സമൂഹങ്ങൾക്കെതിരായ ആക്രമണങ്ങളോ വിദ്വേഷമോ സഹിക്കില്ലെന്ന് സർക്കാർ വ്യക്തമാക്കി.

English Summary: Twelve people were arrested over an alleged right-wing terror threat to a large Islamic gathering in Suffolk.