യൂറോപ്യൻ യാത്രകൾക്ക് പുതിയ അതിർത്തി പരിശോധന; വേനൽ അവധിക്കാലത്ത് നീണ്ട ക്യൂവും വിമാനങ്ങൾ നഷ്ടമാകാനും സാധ്യത

ലണ്ടൻ : യൂറോപ്യൻ യൂണിയനിലേക്കുള്ള യാത്രക്കാർക്ക് പുതിയ ഡിജിറ്റൽ എൻട്രി ആൻഡ് എക്സിറ്റ് സംവിധാനം മൂലം അതിർത്തി പരിശോധനകൾ കൂടുതൽ കർശനമായതോടെ വേനൽ അവധിക്കാല യാത്രകളിൽ വലിയ കാലതാമസത്തിന് സാധ്യത. കഴിഞ്ഞ ഒക്ടോബറിൽ ആരംഭിച്ച ഈ സംവിധാനം ഏപ്രിൽ മുതൽ പൂർണമായി നടപ്പിലായതോടെ, യുകെ ഉൾപ്പെടെ യൂറോപ്യൻ യൂണിയൻ അംഗരാജ്യങ്ങൾക്കു പുറത്തുള്ള മിക്ക യാത്രക്കാരും അതിർത്തിയിൽ ബയോമെട്രിക് വിവരങ്ങൾ രജിസ്റ്റർ ചെയ്യേണ്ടിവരുന്നു. മുഖചിത്രം എടുക്കുകയും വിരലടയാളം സ്കാൻ ചെയ്യുകയും ചെയ്യുന്ന ഈ നടപടികൾ ചില വിമാനത്താവളങ്ങളിൽ മണിക്കൂറുകൾ നീണ്ട ക്യൂവിനും യാത്രക്കാർക്ക് വിമാനങ്ങൾ നഷ്ടമാകുന്നതിനും കാരണമായതായി യാത്രാ മേഖല ചൂണ്ടിക്കാട്ടുന്നു.

ഷെൻഗൻ മേഖലയിലേക്കുള്ള പ്രവേശനവും പുറത്തുപോക്കും കൂടുതൽ സുരക്ഷിതവും കാര്യക്ഷമവുമാക്കുക എന്ന ലക്ഷ്യത്തോടെയാണ് പുതിയ സംവിധാനം കൊണ്ടുവന്നത്. ഷെൻഗൻ മേഖലയിലെ 29 രാജ്യങ്ങളിൽ പൗരന്മാരല്ലാത്തവർ, അയർലൻഡ് അല്ലെങ്കിൽ സൈപ്രസ് പൗരന്മാരല്ലാത്തവർ തുടങ്ങിയവർക്ക് ഈ പരിശോധന ബാധകമാണ്. യാത്രക്കാർ സ്വയം സേവന യന്ത്രങ്ങൾ ഉപയോഗിച്ച് പേര്, പാസ്‌പോർട്ട് വിവരങ്ങൾ, വിരലടയാളം, പ്രവേശിക്കുന്നതും പുറത്തുപോകുന്നതുമായ തീയതിയും സ്ഥലവും രജിസ്റ്റർ ചെയ്യേണ്ടിവരും. ഡോവർ പോർട്ട്, ഫോക്സ്റ്റണിലെ യൂറോടണൽ ലെഷട്ടിൽ, സെന്റ് പാൻക്രസ് ഇന്റർനാഷണലിലെ യൂറോസ്റ്റാർ യാത്രകൾ എന്നിവയിൽ യൂറോപ്പിലേക്ക് പുറപ്പെടുന്നതിന് മുമ്പ് തന്നെ ഈ പരിശോധനകൾ യുകെയിൽ പൂർത്തിയാക്കേണ്ടിവരും.

പുതിയ സംവിധാനം നടപ്പിലാക്കിയതിനു പിന്നാലെ ലിസ്ബൺ, മിലാൻ, ഏഥൻസ് തുടങ്ങിയ സ്ഥലങ്ങളിൽ യാത്രക്കാർക്ക് വലിയ ബുദ്ധിമുട്ടുകൾ നേരിട്ടതായി റിപ്പോർട്ടുകളുണ്ട്. ചില സമയങ്ങളിൽ കാത്തിരിപ്പ് അഞ്ച് മുതൽ ഏഴ് മണിക്കൂർ വരെ നീണ്ടതായും, അതിർത്തി പരിശോധന വൈകിയതിനെ തുടർന്ന് യാത്രക്കാർക്ക് വിമാനങ്ങൾ നഷ്ടമായതായും യാത്രാ സംഘടനകൾ പറയുന്നു. വേനൽക്കാല തിരക്കിനിടെ സംവിധാനം താൽക്കാലികമായി നിർത്തിവയ്ക്കണമെന്ന് വിമാനത്താവളങ്ങളും എയർലൈൻ സംഘടനകളും യൂറോപ്യൻ കമ്മിഷനോട് ആവശ്യപ്പെട്ടിട്ടുണ്ട്. യാത്രക്കാർ വിമാനത്താവളത്തിൽ കുറഞ്ഞത് മൂന്ന് മണിക്കൂർ മുമ്പെങ്കിലും എത്തണമെന്ന് നിർദേശിച്ചിട്ടുണ്ടെങ്കിലും, ബാഗേജ് ചെക്ക്-ഇൻ വൈകിയാണ് തുറക്കുന്നതെങ്കിൽ അതുകൊണ്ട് മാത്രം പ്രശ്നം പരിഹരിക്കണമെന്നില്ല. അതിനാൽ കഴിയുന്നവർ കൈബാഗേജ് മാത്രം ഉപയോഗിക്കുന്നത് യാത്രാ താമസം കുറയ്ക്കാൻ സഹായിക്കുമെന്ന നിർദേശവും ഉയരുന്നുണ്ട്.

English Summary: New EU entry and exit checks are causing long border delays and could affect UK travellers during the summer holiday season.