ഇംഗ്ലണ്ടിൽ ചരിത്രത്തിലെ ഏറ്റവും ചൂടേറിയ ജൂൺ; യുകെയിലും വെയിൽസിലും റെക്കോർഡ് താപനില

ലണ്ടൻ : ഇംഗ്ലണ്ടിന്റെ ചരിത്രത്തിൽ രേഖപ്പെടുത്തപ്പെട്ടതിൽ വച്ച് ഏറ്റവും ഉയർന്ന ചൂട് അനുഭവപ്പെട്ട ജൂൺ മാസമായി 2026 ജൂൺ മാറിയെന്ന് മെറ്റ് ഓഫിസിന്റെ പ്രാഥമിക കണക്കുകൾ വ്യക്തമാക്കുന്നു. യുകെയിലും വെയിൽസിലും 1884 മുതലുള്ള ചരിത്രരേഖകൾ പ്രകാരം രണ്ടാമത്തെ ഏറ്റവും ചൂടേറിയ ജൂൺ മാസമാണ് കടന്നുപോയത്. മാസത്തിന്റെ ആദ്യ പകുതിയിൽ തണുപ്പും മഴയും നിറഞ്ഞ കാലാവസ്ഥയായിരുന്നെങ്കിലും അവസാന ആഴ്ചകളിൽ അനുഭവപ്പെട്ട കടുത്ത ഹീറ്റ് വേവാണ് ശരാശരി താപനില കുത്തനെ ഉയർത്തിയത്. ഇംഗ്ലണ്ടിലെ ശരാശരി താപനില 17.1 ഡിഗ്രി സെൽഷ്യസായി ഉയർന്നതോടെ 2025ൽ ഉണ്ടായ മുൻ റെക്കോർഡാണ് തകർന്നത്.

പകൽ സമയത്തെക്കാൾ രാത്രികാലങ്ങളിൽ അനുഭവപ്പെട്ട അസാധാരണമായ ഉയർന്ന ചൂടാണ് ഈ വർഷത്തെ ജൂണിന്റെ പ്രധാന പ്രത്യേകത. ട്രോപ്പിക്കൽ നൈറ്റ്സ് എന്ന് വിളിക്കുന്ന ഇത്തരം ചൂടേറിയ രാത്രികൾ ആവർത്തിച്ചതോടെ യുകെ, ഇംഗ്ലണ്ട്, വെയിൽസ് എന്നിവിടങ്ങളിലെ ശരാശരി കുറഞ്ഞ താപനിലയും എക്കാലത്തെയും ഉയർന്ന നിരക്കിലെത്തി. ജൂൺ പകുതിയോടെ യൂറോപ്പിൽ രൂപപ്പെട്ട ഉയർന്ന മർദ്ദ സംവിധാനം മൂലം ചൂടേറിയ വായു യുകെയിലേക്ക് എത്തിയതാണ് കാലാവസ്ഥാ വ്യതിയാനത്തിന് കാരണമായത്. ഇതേതുടർന്ന് യുകെയിലെ കാലാവസ്ഥാ മുന്നറിയിപ്പ് സംവിധാനത്തിന്റെ ചരിത്രത്തിൽ ആദ്യമായി തുടർച്ചയായ മൂന്ന് ദിവസങ്ങളിൽ റെക്കോർഡ് ചൂട് പ്രമാണിച്ച് റെഡ് അലർട്ട് പ്രഖ്യാപിക്കേണ്ടി വന്നു.

ആഗോള കാലാവസ്ഥാ വ്യതിയാനം ഇത്തരം ഹീറ്റ് വേവുകളുടെ തീവ്രതയും സാധ്യതയും വർധിപ്പിക്കുകയാണെന്ന് മെറ്റ് ഓഫിസ് ചീഫ് സയന്റിസ്റ്റ് പ്രൊഫസർ സ്റ്റീഫൻ ബെൽച്ചർ വ്യക്തമാക്കി. കടുത്ത ചൂടും ഉയർന്ന അന്തരീക്ഷ ഈർപ്പവും ജനങ്ങളുടെ ആരോഗ്യത്തെയും ഒപ്പം ഗതാഗതം, ഊർജം, ജലവിതരണം തുടങ്ങിയ അവശ്യ മേഖലകളെയും സാരമായി ബാധിക്കാമെന്ന് വിദഗ്ധർ മുന്നറിയിപ്പ് നൽകുന്നുണ്ട്. അതേസമയം കടുത്ത ചൂടിനിടയിലും യുകെയിലാകെ ജൂൺ മാസത്തിൽ ലഭിച്ച മഴയുടെ അളവ് ശരാശരിയേക്കാൾ കൂടുതലായിരുന്നുവെന്നും വടക്കൻ അയർലൻഡിൽ മാത്രം 67 ശതമാനം അധികം മഴ രേഖപ്പെടുത്തിയെന്നും മെറ്റ് ഓഫിസ് റിപ്പോർട്ടിൽ പറയുന്നു.

English Summary: England recorded its warmest June on record, while the UK and Wales saw one of their hottest June months since 1884.