യുക്രെയ്ൻ പിന്തുണ ആവർത്തിച്ച് ബേൺഹാം; സെലൻസ്കിയുമായി നാവിക താവളത്തിൽ കൂടിക്കാഴ്ച

ലണ്ടൻ : യുക്രെയ്‌നോടുള്ള ബ്രിട്ടന്റെ പിന്തുണ മാറ്റമില്ലാതെ തുടരുമെന്ന സന്ദേശവുമായി പ്രധാനമന്ത്രി ആൻഡി ബേൺഹാം, യുക്രെയ്ൻ പ്രസിഡന്റ് വൊളോഡിമിർ സെലൻസ്കിയുമായി യുകെയിലെ ഒരു നാവിക താവളത്തിൽ കൂടിക്കാഴ്ച നടത്തും. പ്രധാനമന്ത്രിയായ ശേഷം ബേൺഹാമിനെ സന്ദർശിക്കുന്ന ആദ്യ വിദേശ രാഷ്ട്രത്തലവനാണ് സെലൻസ്കി. റഷ്യയുടെ അധിനിവേശത്തിനെതിരായ യുക്രെയ്ൻ പോരാട്ടത്തിന് മുൻ പ്രധാനമന്ത്രി കിയർ സ്റ്റാർമർ നൽകിയ പിന്തുണ അതേ ശക്തിയിൽ തുടരുമെന്ന് ബേൺഹാം നേരത്തേ വ്യക്തമാക്കിയിരുന്നു.

യുക്രെയ്ൻ സൈനികർ പരിശീലനം നേടിയ നാവിക താവളത്തിലാണ് ഇരുവരുടെയും കൂടിക്കാഴ്ച. ബ്ലാക്ക് സീ മേഖലയിലെ മൈൻ നീക്കം ചെയ്യൽ ഉൾപ്പെടെയുള്ള സമുദ്രസുരക്ഷാ പ്രവർത്തനങ്ങളെ കേന്ദ്രീകരിച്ച ‘എക്സർസൈസ് സീ ബ്രീസിൽ’ പങ്കെടുത്ത ബ്രിട്ടീഷ്, യുക്രെയ്ൻ സൈനികരുമായി ഇരുവരും സംസാരിക്കും. 15 രാജ്യങ്ങൾ പങ്കെടുത്ത പരിശീലനത്തിന്റെ രണ്ടാം ഘട്ടം ഡോർസെറ്റിലെ പോർട്ട്ലൻഡിൽ അടുത്തിടെ പൂർത്തിയായതായും ഇതിൽ 200ലധികം യുക്രെയ്ൻ സൈനികർ പങ്കെടുത്തതായും റിപ്പോർട്ടിൽ പറയുന്നു.

‘സ്റ്റോൺ ക്ലോക്ക്’ എന്ന ഇലക്ട്രോണിക് ജാമർ ഉൾപ്പെടെയുള്ള സംയുക്ത പ്രതിരോധ പദ്ധതികളും കൂടിക്കാഴ്ചയിൽ ചർച്ചയാകും. ടാബ്ലറ്റ് കംപ്യൂട്ടറിന്റെ വലിപ്പമുള്ള ഈ ഉപകരണങ്ങൾ ഡ്രോണുകളിൽ ഘടിപ്പിച്ച് റഷ്യൻ വ്യോമപ്രതിരോധ സംവിധാനങ്ങളുടെ നിരീക്ഷണവും ലക്ഷ്യംവയ്ക്കലും തടയാനാണ് ഉപയോഗിക്കുന്നത്. ഇതിന്റെ സാങ്കേതിക അവകാശങ്ങൾ ബ്രിട്ടൻ യുക്രെയ്‌നുമായി പങ്കിട്ടതിനാൽ അവിടെ വൻതോതിൽ നിർമ്മാണം ആരംഭിച്ചിട്ടുണ്ട്. യുക്രെയ്‌നുമായി തോളോട് തോൾ ചേർന്ന് ബ്രിട്ടൻ നിലകൊള്ളുമെന്നും നീതിയുക്തവും ദീർഘകാലവുമായ സമാധാനം ഉറപ്പാകുന്നതുവരെ പിന്തുണ പിൻവലിക്കില്ലെന്നും ബേൺഹാം വ്യക്തമാക്കി.

English summary: Andy Burnham will meet Volodymyr Zelenskyy at a UK naval base to reaffirm Britain’s unwavering support for Ukraine.