ഇംഗ്ലണ്ടിൽ ആയുസ് ഉയർന്നിട്ടും വടക്ക്–തെക്ക് വ്യത്യാസം രൂക്ഷം

ലണ്ടൻ : ഇംഗ്ലണ്ടിലെ ശരാശരി ആയുസ് റെക്കോർഡ് ഉയരത്തിലെത്തിയിട്ടും വടക്കൻ മേഖലകളും തെക്കൻ മേഖലകളും തമ്മിലുള്ള വ്യത്യാസം കഴിഞ്ഞ പത്ത് വർഷത്തിനിടെ കൂടുതൽ വലുതായതായി കിംഗ്സ് ഫണ്ട് റിപ്പോർട്ട്. 2025ലെ പ്രാഥമിക കണക്കുകൾ പ്രകാരം ഇംഗ്ലണ്ടിലെ പുരുഷന്മാർ ശരാശരി 80 വർഷവും സ്ത്രീകൾ ഏകദേശം 84 വർഷവും ജീവിക്കുന്നുവെങ്കിലും, ഈ പുരോഗതിയുടെ ഭൂരിഭാഗവും ലണ്ടൻ ഉൾപ്പെടെയുള്ള തെക്കൻ മേഖലകളിലാണ് രേഖപ്പെടുത്തിയിരിക്കുന്നത്. ഹൃദ്രോഗം, കാൻസർ, ആത്മഹത്യ, മദ്യവും മയക്കുമരുന്നുമായി ബന്ധപ്പെട്ട മരണങ്ങൾ എന്നിവ വടക്കൻ പ്രദേശങ്ങളിൽ കൂടുതലാണെന്നും റിപ്പോർട്ട് ചൂണ്ടിക്കാട്ടുന്നു.

കോവിഡ് കാലത്ത് ആയുസിൽ ഏറ്റവും വലിയ ഇടിവ് നേരിട്ടിട്ടും 2023–25 കാലയളവിൽ ലണ്ടനിലെ ശരാശരി ആയുസ് ഏകദേശം ഒരു വർഷം വർധിച്ചു. സൗത്ത് ഈസ്റ്റ്, സൗത്ത് വെസ്റ്റ്, ഈസ്റ്റ് ഓഫ് ഇംഗ്ലണ്ട് മേഖലകളിലും വർധന രേഖപ്പെടുത്തി. എന്നാൽ നോർത്ത് വെസ്റ്റ്, നോർത്ത് ഈസ്റ്റ്, യോർക്‌ഷയർ ആൻഡ് ദ ഹംബർ, വെസ്റ്റ് മിഡ്‌ലാൻഡ്സ്, ഈസ്റ്റ് മിഡ്‌ലാൻഡ്സ് എന്നീ മേഖലകളിൽ വളരെ ചെറിയ വർധന മാത്രമോ യാതൊരു പുരോഗതിയും ഇല്ലാത്ത അവസ്ഥയോ ആണ്. ലണ്ടനിലെ ആളുകൾക്ക് നോർത്ത് ഈസ്റ്റിലുള്ളവരെക്കാൾ ശരാശരി മൂന്ന് വർഷം കൂടുതൽ ജീവിക്കാനാകുമ്പോൾ, ബ്ലാക്ക്പൂളിലെ പുരുഷന്മാരുടെ ആയുസ് ഹാംഷയറിലെ ഹാർട്ടിനേക്കാൾ പത്ത് വർഷവും സ്ത്രീകളുടെത് എട്ട് വർഷവും കുറവാണെന്നാണ് കണക്കുകൾ.

അതേസമയം, ആരോഗ്യത്തോടെ ജീവിക്കുന്ന വർഷങ്ങളുടെ എണ്ണം ഇംഗ്ലണ്ടിലെ എല്ലാ മേഖലകളിലും കുറഞ്ഞതായി റിപ്പോർട്ട് പറയുന്നു. ആളുകൾ ഇപ്പോൾ ശരാശരി രണ്ടര വർഷത്തോളം അധികം മോശം ആരോഗ്യാവസ്ഥയിൽ കഴിയുന്നുവെന്നും ഏറ്റവും സമ്പന്നവും ഏറ്റവും ദരിദ്രവുമായ പ്രദേശങ്ങൾ തമ്മിലുള്ള ആരോഗ്യകരമായ ആയുസ് വ്യത്യാസം ചിലപ്പോൾ 20 വർഷം വരെ എത്തുന്നുവെന്നും കണ്ടെത്തി. ആരോഗ്യ അസമത്വം പകുതിയായി കുറയ്ക്കുമെന്ന സർക്കാരിന്റെ പത്ത് വർഷത്തെ എൻഎച്ച്എസ് ലക്ഷ്യം നിലവിലെ സാഹചര്യത്തിൽ യാഥാർഥ്യമല്ലെന്നാണ് കിംഗ്സ് ഫണ്ടിന്റെ വിലയിരുത്തൽ. തൊഴിൽ സുരക്ഷ, ന്യായമായ വേതനം, ഭവനം, ശുദ്ധവായു, ഗതാഗതം, ആരോഗ്യകരമായ ഭക്ഷണം എന്നിവ മെച്ചപ്പെടുത്തുന്ന സമഗ്ര നടപടികളില്ലാതെ ഈ വ്യത്യാസം കുറയ്ക്കാനാകില്ലെന്നും റിപ്പോർട്ട് മുന്നറിയിപ്പ് നൽകുന്നു.

English summary: England’s life expectancy has reached a record high, but the north-south health gap continues to widen.