യുകെയിൽ നഴ്സറി ഫീസുകളിൽ ഒളിഞ്ഞ ചെലവുകൾ; CMA അന്വേഷണം ആവശ്യപ്പെടാൻ വിദ്യാഭ്യാസ സെക്രട്ടറി

ലണ്ടൻ : യുകെയിലെ നഴ്സറികളിൽ മാതാപിതാക്കളിൽ നിന്ന് ഈടാക്കുന്ന ഒളിഞ്ഞ ഫീസുകളും നിർബന്ധിത അധിക ചെലവുകളും സംബന്ധിച്ച് അന്വേഷണം നടത്താൻ വിദ്യാഭ്യാസ സെക്രട്ടറി ബ്രിഡ്ജറ്റ് ഫിലിപ്സൺ കോംപറ്റീഷൻ ആൻഡ് മാർക്കറ്റ്സ് അതോറിറ്റിയോട് അന്വേഷണം ആവശ്യപ്പെടുമെന്ന് റിപ്പോർട്ട്. കുട്ടികളുടെ പരിചരണച്ചെലവ് ഇതിനകം തന്നെ കുടുംബങ്ങൾക്ക് വലിയ ഭാരമായിരിക്കുന്ന സാഹചര്യത്തിലാണ് സർക്കാർ തലത്തിൽ ഇടപെടൽ ശക്തമാകുന്നത്.

നാപ്പി, സൺ ക്രീം, ഭക്ഷണം തുടങ്ങിയ ദൈനംദിന ആവശ്യങ്ങൾക്കുള്ള ചെലവുകൾക്കൊപ്പം, ചില നഴ്സറികൾ വിവിധ പ്രവർത്തനങ്ങൾക്കും അഡ്മിനിസ്ട്രേഷൻ ഫീസിനും അധിക തുക ഈടാക്കുന്നതായി മാതാപിതാക്കൾ പരാതിപ്പെട്ടിട്ടുണ്ട്. സൗജന്യ ചൈൽഡ്‌കെയർ മണിക്കൂറുകൾ ലഭിക്കുന്നുണ്ടെങ്കിലും, അതിന് പുറമേ വരുന്ന ഇത്തരത്തിലുള്ള നിർബന്ധിത ചെലവുകൾ പല കുടുംബങ്ങൾക്കും സാമ്പത്തിക സമ്മർദ്ദം സൃഷ്ടിക്കുന്നുവെന്നാണ് പ്രധാന ആരോപണം.

നഴ്സറി ഫീസ് ഘടന കൂടുതൽ സുതാര്യമാക്കുകയും മാതാപിതാക്കൾക്ക് മുൻകൂട്ടി വ്യക്തമായ വിവരങ്ങൾ ലഭ്യമാക്കുകയും ചെയ്യുകയാണ് അന്വേഷണത്തിന്റെ പ്രധാന ലക്ഷ്യം. ഒളിഞ്ഞ ഫീസുകളും നിർബന്ധിത അധിക ചാർജുകളും ന്യായമാണോ എന്നതടക്കമുള്ള കാര്യങ്ങൾ കോംപറ്റീഷൻ ആൻഡ് മാർക്കറ്റ്സ് അതോറിറ്റി പരിശോധിക്കുമെന്നാണ് പ്രതീക്ഷിക്കുന്നത്.