ബ്രിട്ടീഷ് സൈനികരുടെ എൻഎച്ച്എസ് ചികിത്സാ കാത്തിരിപ്പ് സമയം ഒരു മാസത്തിലേറെ കുറച്ചു
The NHS has reduced treatment waiting times for UK armed forces personnel by more than four weeks through the targeted 'Further Faster Armed Forces' initiative to boost military readiness.
ലണ്ടൻ : യുകെയിലെ സൈനികർക്ക് മികച്ച ചികിത്സ വേഗത്തിൽ ഉറപ്പാക്കുന്നതിനായുള്ള പ്രത്യേക പദ്ധതിയിലൂടെ എൻഎച്ച്എസ് (NHS) ചികിത്സാ കാത്തിരിപ്പ് സമയം നാലാഴ്ചയിലധികം കുറച്ചു. പരിക്കേറ്റ സൈനികരെ വേഗത്തിൽ സുഖപ്പെടുത്തി സേവനസജ്ജരാക്കുക എന്ന ലക്ഷ്യത്തോടെ നടപ്പിലാക്കിയ ‘ഫർദർ ഫാസ്റ്റർ ആംഡ് ഫോഴ്സസ്’ (FF-AF) പദ്ധതിയിലൂടെയാണ് ഈ നേട്ടം കൈവരിച്ചത്. ആദ്യ ആറുമാസത്തിനുള്ളിൽ തന്നെ വലിയ സൈനിക കേന്ദ്രങ്ങളുള്ള 20 എൻഎച്ച്എസ് ട്രസ്റ്റുകളിൽ കാത്തിരിപ്പ് സമയം ഗണ്യമായി കുറയ്ക്കാൻ പ്രത്യേക കേന്ദ്ര സംഘത്തിന് സാധിച്ചു.
സൈനികർക്കിടയിൽ ഏറ്റവും കൂടുതൽ ചികിത്സാ കാത്തിരിപ്പുള്ള ഇഎൻടി (ചെവി, മൂക്ക്, തൊണ്ട), ട്രോമ ആൻഡ് ഓർത്തോപീഡിക്സ് എന്നീ വിഭാഗങ്ങളിലാണ് ആദ്യഘട്ടത്തിൽ ശ്രദ്ധ കേന്ദ്രീകരിച്ചത്. ചെവി, സൈനസ് ശസ്ത്രക്രിയകൾ മുതൽ തോളുകൾ, ഇടുപ്പ്, കാൽമുട്ട് എന്നിവയുടെ പരിക്കുകൾ വരെയുള്ള ചികിത്സകൾ ഇതിൽ ഉൾപ്പെടുന്നു. പദ്ധതി നിലവിൽ വന്നതോടെ ഇഎൻടി വിഭാഗത്തിലെ കാത്തിരിപ്പ് സമയം 16.9 ആഴ്ചയിൽ നിന്ന് 11.8 ആഴ്ചയായും, ഓർത്തോപീഡിക് വിഭാഗത്തിൽ 13.9 ആഴ്ചയിൽ നിന്ന് 9.7 ആഴ്ചയായും കുറഞ്ഞു; ശരാശരി 4 ആഴ്ചയും 4 ദിവസവുമാണ് കുറവുണ്ടായത്.
പതിവ് സ്ഥലംമാറ്റങ്ങൾ കാരണം ചികിത്സാ ഘട്ടങ്ങളിൽ പ്രയാസം നേരിടുന്ന സൈനികർക്ക് തടസ്സമില്ലാത്ത പരിചരണം ഉറപ്പാക്കാൻ എൻഎച്ച്എസും ഡിഫൻസ് മെഡിക്കൽ സർവീസസും സംയുക്തമായാണ് ഈ പദ്ധതി മുന്നോട്ട് കൊണ്ടുപോകുന്നത്. രാജ്യത്തെ സേവിക്കുന്ന ധീരരായ സൈനികർ ചികിത്സയ്ക്കായി ദീർഘകാലം കാത്തിരിക്കേണ്ടി വരരുതെന്നും, പദ്ധതി വരുംദിവസങ്ങളിൽ മറ്റ് വിഭാഗങ്ങളിലേക്കും വ്യാപിപ്പിക്കാൻ ആലോചിക്കുന്നുണ്ടെന്നും ആരോഗ്യ വകുപ്പ് മന്ത്രി ജെയിംസ് ഫ്രിത്തും മറ്റ് ഉദ്യോഗസ്ഥരും വ്യക്തമാക്കി.
