സിയോണിസം വിവാദം: ഗ്രീൻ പാർട്ടിയിൽ അഴിച്ചുപണിക്ക് സൂചന നൽകി സാക്ക് പൊളാൻസ്കി

ലണ്ടൻ : പാർട്ടി കോൺഫറൻസിൽ സിയോണിസത്തിനെതിരായ പ്രമേയം പാസാക്കിയതിനെ തുടർന്നുണ്ടായ രൂക്ഷമായ വിവാദങ്ങൾക്കും ഉപതെരഞ്ഞെടുപ്പിലെ പരാജയത്തിനും പിന്നാലെ, യുകെയിലെ ഗ്രീൻ പാർട്ടിയിൽ സമഗ്രമായ സംഘടനാ അഴിച്ചുപണിക്ക് പാർട്ടി നേതാവ് സാക്ക് പൊളാൻസ്കി സൂചന നൽകി. പാർട്ടിയുടെ അസാധാരണമായ അംഗത്വ വർധനവിന്റെ പശ്ചാത്തലത്തിൽ നിലവിലെ ഭരണഘടനാ ഘടനകളിൽ കാതലായ മാറ്റം അനിവാര്യമാണെന്നും പാർട്ടി നേതൃത്വത്തിന് കൂടുതൽ നിയന്ത്രണവും അധികാരവും ലഭിക്കേണ്ടതുണ്ടെന്നും 'ദ ഗാർഡിയനിൽ' എഴുതിയ ലേഖനത്തിൽ അദ്ദേഹം വ്യക്തമാക്കി.

ബ്രൈറ്റണിൽ നടന്ന വാർഷിക കോൺഫറൻസിൽ സിയോണിസത്തെ വർണവിവേചനത്തോടും വംശീയതയോടും തുല്യപ്പെടുത്തുന്ന പ്രമേയം പാസാക്കിയത് ഗ്രീൻ പാർട്ടിക്കുള്ളിലും പൊതുസമൂഹത്തിലും വലിയ കോളിളക്കമാണ് സൃഷ്ടിച്ചത്. യഹൂദ വിഭാഗങ്ങൾക്കിടയിൽ അതൃപ്തി പടർത്താൻ ഇടയാക്കിയ ഈ പ്രമേയ ചർച്ച നടക്കുന്ന സമയത്ത് പൊളാൻസ്കി സന്നിഹിതനല്ലായിരുന്നുവെന്നും ഇത്തരം വിനാശകരമായ നീക്കങ്ങളെ തടയാൻ അദ്ദേഹത്തിനായില്ലെന്നും ചൂണ്ടിക്കാട്ടി മുൻ നേതാവ് കരോലിൻ ലൂക്കാസും പാർട്ടിയിലെ ജൂത വിഭാഗവും പൊളാൻസ്കിയുടെ രാജി ആവശ്യപ്പെട്ടിരുന്നു. ഇതോടൊപ്പം ഹോൾബോൺ ആൻഡ് സെന്റ് പാൻക്രാസ് ഉപതെരഞ്ഞെടുപ്പിൽ ലേബർ പാർട്ടി സ്ഥാനാർത്ഥിയോട് പൊളാൻസ്കി പരാജയപ്പെടുകയും ചെയ്തതോടെയാണ് അദ്ദേഹത്തിന് മേൽ സമ്മർദം ശക്തമായത്.

പ്രതിസന്ധികൾക്കിടയിലും താൻ നേതൃസ്ഥാനത്ത് തുടരുമെന്ന് വ്യക്തമാക്കിയ പൊളാൻസ്കി, പാർട്ടിയിലെ ആഭ്യന്തര ജനാധിപത്യം ദുരുപയോഗം ചെയ്യുന്നത് തടയാൻ സംഘടനാ ചട്ടങ്ങൾ ഉടൻ പരിഷ്കരിക്കുമെന്ന് വ്യക്തമാക്കി. രണ്ടുലക്ഷത്തിലധികം അംഗങ്ങളുള്ള വലിയ രാഷ്ട്രീയ പ്രസ്ഥാനമായി പാർട്ടി വളർന്നതിനാൽ, വിവാദപരമായ തീരുമാനങ്ങൾ നിയന്ത്രിക്കാനും പാർട്ടിയുടെ പ്രതിച്ഛായ സംരക്ഷിക്കാനും നേതൃത്വത്തിന് കൂടുതൽ ഇടപെടൽ ശേഷി നൽകുന്ന മാറ്റങ്ങൾ അടുത്ത ഘട്ടത്തിൽ നടപ്പാക്കാനാണ് ഗ്രീൻ പാർട്ടിയുടെ തീരുമാനം.