ലിവർപൂളിൽ അഞ്ചാംപനി ബാധിച്ച് കുട്ടി മരിച്ചു; ആൽഡർ ഹേയിൽ രോഗികൾ വർധിക്കുന്നു

ലിവർപൂൾ: ലിവർപൂളിലെ ആൽഡർ ഹേ ചിൽഡ്രൻസ് ഹോസ്പിറ്റലിൽ അഞ്ചാംപനി (മീസൽസ്) ബാധിച്ച് ചികിത്സയിലായിരുന്ന ഒരു കുട്ടി മരണപ്പെട്ടതായി വാർത്തകൾ. ജൂൺ മുതൽ 17 കുട്ടികൾ ഈ പകർച്ചവ്യാധിയായ വൈറസ് ബാധയെ തുടർന്ന് ആശുപത്രിയിൽ ചികിത്സ തേടിയതായി അറിയുന്നു. ഗുരുതരമായി രോഗബാധിതരായ കുട്ടികളുടെ എണ്ണം വർധിക്കുന്നത് ആശുപത്രി അധികൃതർക്ക് ആശങ്കയുണ്ടാക്കുന്നു. മരണപ്പെട്ട കുട്ടിയുടെ മറ്റ് ആരോഗ്യപ്രശ്നങ്ങളോ വാക്സിനേഷൻ വിവരങ്ങളോ പുറത്തുവിട്ടിട്ടില്ല.

ആൽഡർ ഹേ ചിൽഡ്രൻസ് എൻഎച്ച്എസ് ഫൗണ്ടേഷൻ ട്രസ്റ്റ്, രോഗിയുടെ സ്വകാര്യത മാനിച്ച് വ്യക്തിഗത കേസുകളെക്കുറിച്ച് ഔദ്യോഗിക പ്രസ്താവന നൽകുന്നില്ല. എന്നാൽ, അഞ്ചാംപനി കേസുകളുടെ വർധന ഗുരുതരമായ പ്രശ്നമാണെന്ന് അവർ വ്യക്തമാക്കി. “അഞ്ചാംപനി അതിതീവ്രമായി പകരുന്ന വൈറൽ രോഗമാണ്, ഇത് കുട്ടികളെ ഗുരുതരമായി ബാധിക്കുകയും ആശുപത്രി ചികിത്സ ആവശ്യമാക്കുകയും അപൂർവ സന്ദർഭങ്ങളിൽ മരണത്തിന് കാരണമാവുകയും ചെയ്യും,” ആശുപത്രി വക്താവ് അറിയിച്ചു. മേഴ്സിസൈഡ് പ്രദേശത്ത് എംഎംആർ (അഞ്ചാംപനി, മുണ്ടിനനീര്, റുബെല്ല) വാക്സിൻ സ്വീകരിക്കുന്നവരുടെ എണ്ണം കുറഞ്ഞതാണ് രോഗവ്യാപനത്തിന്റെ പ്രധാന കാരണമെന്ന് ആശുപത്രി മുന്നറിയിപ്പ് നൽകി.

ആശുപത്രിയിലെ ചീഫ് നഴ്സ് നഥാൻ ആസ്കോ, വാക്സിനെക്കുറിച്ചുള്ള തെറ്റിദ്ധാരണകൾ രോഗവർധനവിന് കാരണമായതായി ചൂണ്ടിക്കാട്ടി. “50 വർഷത്തിലേറെയായി ഉപയോഗത്തിലുള്ള ഈ വാക്സിൻ സുരക്ഷിതവും പരീക്ഷണം വഴി തെളിയിക്കപ്പെട്ടതുമാണ്,” അദ്ദേഹം പറഞ്ഞു. 12 മാസവും മൂന്നര വയസ്സിനും ഇടയിൽ എംഎംആർ വാക്സിന്റെ രണ്ട് ഡോസുകൾ കുട്ടികൾക്ക് നൽകണമെന്ന് ആശുപത്രി ശുപാർശ ചെയ്തു. മറ്റ് ആരോഗ്യപ്രശ്നങ്ങൾ മൂലം രോഗപ്രതിരോധ ശേഷി കുറഞ്ഞ കുട്ടികൾക്ക് അഞ്ചാംപനി ബാധിക്കാനുള്ള സാധ്യത കൂടുതലാണെന്നും അധികൃതർ ഓർമിപ്പിച്ചു.

കഴിഞ്ഞ ദശകത്തിനിടെ യുകെയിൽ അഞ്ചാംപനി ബാധിച്ച് മരണപ്പെടുന്ന രണ്ടാമത്തെ കുട്ടിയാണ് ഇതെന്നാണ് വിവരം. 2023-ൽ സാൽഫോർഡിൽ 10 വയസ്സുകാരി റെനേ ആർച്ചർ അഞ്ചാംപനി ബാധിച്ച് മരണപ്പെട്ടിരുന്നു. രോഗപ്രതിരോധ ശേഷി കുറഞ്ഞ കുട്ടികൾക്ക് ആശുപത്രിയിൽ പ്രത്യേക പരിചരണം ആവശ്യമാണെന്നും വാക്സിനേഷൻ വഴി രോഗം തടയാമെന്നും ആരോഗ്യ വിദഗ്ധർ ജനങ്ങളോട് അഭ്യർഥിച്ചു.

English Summary: A child died of measles at Alder Hey Children’s Hospital in Liverpool, where 17 children have been treated for the disease since June.