വത്തിക്കാനിൽ പോപ്പ് ഫ്രാൻസിസിന്റെ അന്ത്യശുശ്രൂഷ ശനിയാഴ്ച; വില്യം രാജകുമാരനും ലോകനേതാക്കളും പങ്കെടുക്കും
ലണ്ടൽ : പോപ്പ് ഫ്രാൻസിസിന്റെ അന്ത്യശുശ്രൂഷ 2025 ഏപ്രിൽ 26 ശനിയാഴ്ച രാവിലെ 10 മണിക്ക് സെന്റ് പീറ്റേഴ്സ് സ്ക്വയറിൽ നടക്കുമെന്ന് വത്തിക്കാൻ പ്രഖ്യാപിച്ചു. ബ്രിട്ടന്റെ വില്യം രാജകുമാരൻ ചാൾസ് രാജാവിനെ പ്രതിനിധീകരിച്ച് ചടങ്ങിൽ പങ്കെടുക്കുമെന്ന് കെൻസിങ്ടൺ കൊട്ടാരം അറിയിച്ചു. യുകെ പ്രധാനമന്ത്രി സർ കീർ സ്റ്റാർമർ, യുഎസ് പ്രസിഡന്റ് ഡൊണാൾഡ് ട്രംപ്, ഫ്രാൻസ് പ്രസിഡന്റ് ഇമ്മാനുവൽ മാക്രോൺ, ഉക്രെയ്ൻ പ്രസിഡന്റ് വൊളോദിമിർ സെലെൻസ്കി, അർജന്റീന പ്രസിഡന്റ് ഹവിയർ മിലേയ് തുടങ്ങിയ ലോകനേതാക്കളും ചടങ്ങിൽ സന്നിഹിതരാകും.
ചാൾസ് രാജാവിന്റെ ഇറ്റലി സന്ദർശനവേളയിൽ, രണ്ടാഴ്ച മുമ്പ് നടന്ന 20 മിനിറ്റ് നീണ്ട സ്വകാര്യ കൂടിക്കാഴ്ച രാജദമ്പതികളുടെ 20-ാം വിവാഹവാർഷിക ദിനത്തിൽ ആയിരുന്നു. “വളരെ ഹൃദയസ്പർശിയായ” മുഹൂർത്തമായി കൊട്ടാരം ഉദ്യോഗസ്ഥർ വിശേഷിപ്പിച്ച ഈ കൂടിക്കാഴ്ചയിൽ പോപ്പ് രാജദമ്പതികൾക്ക് ആശംസകൾ നേർന്നിരുന്നു. പോപ്പിന്റെ വിയോഗത്തെ “നികത്താനാവാത്ത നഷ്ടം” എന്ന് വിശേഷിപ്പിച്ച ചാൾസ് രാജാവ്, അദ്ദേഹത്തിന്റെ കാരുണ്യപൂർണമായ പ്രവർത്തനങ്ങളെ പ്രശംസിച്ചു. ബുധനാഴ്ച (ഏപ്രിൽ 23) മുതൽ വെള്ളിയാഴ്ച വരെ പോപ്പിന്റെ ഭൗതികശരീരം സെന്റ് പീറ്റേഴ്സ് ബസലിക്കയിൽ പൊതുദർശനത്തിന് വയ്ക്കും.
വിവിധ മതങ്ങൾ തമ്മിലുള്ള ബന്ധം ശക്തിപ്പെടുത്തുന്നതിന്റെ വക്താവായ ചാൾസ് രാജാവ്, വത്തിക്കാനിൽ സിസ്റ്റൈൻ ചാപ്പലിൽ ഒരു എക്യുമെനിക്കൽ സർവീസ് നടത്താൻ പദ്ധതിയിട്ടിരുന്നു. പോപ്പിനോടുള്ള ആദരസൂചകമായി, ചൊവ്വാഴ്ച ന്യൂസിലൻഡ് പ്രധാനമന്ത്രിയെ കണ്ടപ്പോൾ രാജാവ് കറുത്ത ടൈ ധരിച്ചു. യുകെ പ്രധാനമന്ത്രി സർ കീർ സ്റ്റാർമർ, സങ്കീർണവും വെല്ലുവിളി നിറഞ്ഞതുമായ കാലഘട്ടത്തിൽ പോപ്പിന്റെ നേതൃത്വത്തെ പ്രശംസിച്ച്, അദ്ദേഹത്തിന്റെ ജീവിതത്തിന് ആദരാഞ്ജലി അർപ്പിക്കാൻ ചടങ്ങിൽ പങ്കെടുക്കുമെന്ന് ഡൗണിങ് സ്ട്രീറ്റ് സ്ഥിരീകരിച്ചു. പോപ്പിന്റെ അന്ത്യശുശ്രൂഷയ്ക്ക് ശേഷം, അദ്ദേഹത്തിന്റെ ഭൗതികശരീരം റോമിലെ ബസലിക്ക ഓഫ് സെന്റ് മേരി മേജറിൽ സംസ്കരിക്കും, ഇത് അദ്ദേഹത്തിന്റെ വ്യക്തിപരമായ ആഗ്രഹപ്രകാരമാണ്.
