മാഞ്ചസ്റ്റർ-മുംബൈ നേരിട്ടുള്ള ഇൻഡിഗോ സർവീസ് ജൂലായിൽ തുടങ്ങും; ടിക്കറ്റുകൾ ഇപ്പോൾ തന്നെ ബുക്ക് ചെയ്യാം
മാഞ്ചസ്റ്റർ: യുകെയുടെ വടക്കൻ മേഖലയെ നേരിട്ട് മുംബൈയുമായി ബന്ധിപ്പിക്കുന്ന പുതിയ വിമാന സർവീസ് മാഞ്ചസ്റ്റർ വിമാനത്താവളം പ്രഖ്യാപിച്ചു. ഇന്ത്യൻ ഓഹരി വിപണിയുടെ ഹൃദയമായ മുംബൈയിലേക്കുള്ള ഈ പുതിയ നേരിട്ടുള്ള സർവീസ് 2025 ജൂലൈയിൽ ആരംഭിക്കും. ആഴ്ചയിൽ മൂന്ന് വിമാനങ്ങൾ പറക്കും, ടിക്കറ്റുകൾ ഇതിനകം തന്നെ ബുക്കിംഗിന് ലഭ്യമാണ്.
ഇന്ത്യയിലെ ഏറ്റവും വലിയ ലോ-കോസ്റ്റ് എയർലൈൻ ആയ ഇൻഡിഗോയാണ് ഈ സർവീസ് നടത്തുക. വടക്കൻ ഇംഗ്ലണ്ടിൽ നിന്ന് മുംബൈയിലേക്കുള്ള ആദ്യത്തെ നേരിട്ടുള്ള സർവീസെന്ന പ്രത്യേകതയും ഇതിന് ഉണ്ട്. ബിസിനസ്, സംസ്കാരം, വിശിഷ്ട ഭക്ഷണശൈലി എന്നിവ കൊണ്ട് പ്രസിദ്ധമായ മുംബൈ ഇന്ത്യയുടെ സാമ്പത്തിക തലസ്ഥാനമാണ്.
മാഞ്ചസ്റ്റർ മേഖലയിൽ താമസിക്കുന്ന മലയാളികൾക്കു പ്രത്യേകിച്ച് ഈ സർവീസ് വലിയ അനുഗ്രഹമായി മാറും. മുംബൈ വഴി കൊച്ചി, തിരുവനന്തപുരം, കോഴിക്കോട്, കണ്ണൂർ തുടങ്ങിയ കേരളത്തിലെ പ്രധാന വിമാനത്താവളങ്ങളിലേക്ക് ഇൻഡിഗോയുടെ ആഭ്യന്തര സർവീസുകൾ വഴി എളുപ്പത്തിൽ യാത്ര ചെയ്യാം. സമയം ലാഭിക്കുന്നതോടൊപ്പം യാത്രാനുഭവം മെച്ചപ്പെടുകയും ചെയ്യും.
മാഞ്ചസ്റ്റർ വിമാനത്താവളത്തിന്റെ മാനേജിംഗ് ഡയറക്ടർ ക്രിസ് വുഡ്‌റൂഫ് പറഞ്ഞു:
“മാഞ്ചസ്റ്ററിൽ നിന്നുള്ള ഈ പുതിയ സർവീസ് വടക്കൻ പ്രദേശത്തെ ഇന്ത്യയുമായി നേരിട്ട് ബന്ധിപ്പിക്കുന്നു. നമ്മളെ ഇന്ത്യയുമായി നേരിട്ട് ബന്ധമുള്ള ഏക വടക്കൻ വിമാനത്താവളമാക്കി മാറ്റുന്ന ഈ റൂട്ടിലൂടെ ഇന്ത്യയിലേക്കും ഇന്ത്യയിൽ നിന്നുമുള്ള വ്യാപാര, നിക്ഷേപ, കുടുംബബന്ധങ്ങൾ കൂടുതൽ ശക്തമാകും. മാഞ്ചസ്റ്റർ വിമാനത്താവള പരിധിയിൽ താമസിക്കുന്ന 5 ലക്ഷത്തോളം ഇന്ത്യൻ വംശജർക്കാണ് ഇതിന്റെ ഏറ്റവും കൂടുതൽ ലാഭം ലഭിക്കുന്നത്.”
ഇൻഡിഗോ സിഇഒ പീറ്റർ എൽബേഴ്സ് പ്രതികരിച്ചു:
“മാഞ്ചസ്റ്ററിലേക്കുള്ള ഈ ആദ്യ ലോങ്ങ്-ഹൗൾ സർവീസ് ഇന്ത്യയെ ആഗോള വ്യോമയാന ഭൂപടത്തിൽ ഉയർത്താനുള്ള നമ്മുടെ ശ്രമത്തിൽ നിർണായക ഘട്ടമാണ്. 90-ലധികം ഇന്ത്യൻ നഗരങ്ങളിലേക്ക് ഇൻഡിഗോ നടത്തുന്ന ആഭ്യന്തര സർവീസുകൾ വഴി മുംബൈയിൽ നിന്ന് seamless കണക്ഷനുകൾ ലഭ്യമാകും. നമ്മുടെ കസ്റ്റമർമാർക്ക് മികച്ച സേവനം നൽകാൻ മാഞ്ചസ്റ്റർ വിമാനത്താവളവുമായി പങ്കാളിത്തം വളർത്താൻ ആഗ്രഹിക്കുന്നു.”
മാഞ്ചസ്റ്റർ - മുംബൈ പുതിയ വിമാന സർവീസിന്റെ ടിക്കറ്റുകൾ ഇപ്പോൾ തന്നെ www.indigo.in അല്ലെങ്കിൽ മാഞ്ചസ്റ്റർ വിമാനത്താവളത്തിന്റെ ഔദ്യോഗിക വെബ്സൈറ്റ് വഴി ബുക്ക് ചെയ്യാം.
