ലണ്ടൻ സൗത്തെൻഡ് വിമാനത്താവളത്തിൽ ചെറുവിമാനം തകർന്നുവീണ് ഗുരുതര അപകടം

എസെക്സിലെ ലണ്ടൻ സൗത്തെൻഡ് വിമാനത്താവളത്തിൽ നിന്ന് പറന്നുയർന്ന ഉടൻ ഒരു ചെറു വിമാനം തകർന്നുവീണ് ഗുരുതര അപകടം ഉണ്ടായതായി പോലീസ് അറിയിച്ചു. ബീച്ച്ക്രാഫ്റ്റ് ബി200 വിമാനം ഞായറാഴ്ച വൈകുന്നേരം 4 മണിയോടെ പറന്നുയർന്ന ശേഷം തീഗോളമായി മാറുകയും കനത്ത പുക ഉയരുകയും ചെയ്തതായി സോഷ്യൽ മീഡിയയിൽ പ്രചരിക്കുന്ന ചിത്രങ്ങൾ വ്യക്തമാക്കുന്നു. എസെക്സ് പോലീസും അടിയന്തര സേവന വിഭാഗങ്ങളും സംഭവസ്ഥലത്ത് പ്രവർത്തനങ്ങൾ തുടരുകയാണ്. പൊതുജനങ്ങളോട് ഈ പ്രദേശം ഒഴിവാക്കണമെന്ന് പോലീസ് അഭ്യർത്ഥിച്ചിട്ടുണ്ട്.

നാല് ഫയർ ബ്രിഗേഡ് യൂണിറ്റുകളും ഓഫ്-റോഡ് വാഹനങ്ങളും ഉൾപ്പെടെ എസെക്സ് കൗണ്ടി ഫയർ ആൻഡ് റെസ്ക്യൂ സർവീസ് സംഭവസ്ഥലത്ത് പ്രവർത്തിക്കുന്നുണ്ട്. കൂടാതെ, ഈസ്റ്റ് ഓഫ് ഇംഗ്ലണ്ട് ആംബുലൻസ് സർവീസിന്റെ നാല് ആംബുലൻസുകളും നാല് ഹസാർഡസ് ഏരിയ റെസ്പോൺസ് ടീം വാഹനങ്ങളും എയർ ആംബുലൻസും രക്ഷാപ്രവർത്തനത്തിനായി എത്തിയിട്ടുണ്ട്. അപകടത്തിന്റെ കാരണം ഇതുവരെ വ്യക്തമല്ല. സൗത്തെൻഡ് വിമാനത്താവളം തിങ്കളാഴ്ച വരെ അടച്ചിടുമെന്ന് അധികൃതർ അറിയിച്ചു.

നെതർലാൻഡ്സിലെ ലേലിസ്റ്റാഡിലേക്ക് പുറപ്പെട്ട വിമാനം സ്യൂഷ് ഏവിയേഷൻ എന്ന ഡച്ച് കമ്പനിയുടെ ഉടമസ്ഥതയിലുള്ളതാണ്. മെഡിക്കൽ ഒഴിപ്പിക്കലിനും ട്രാൻസ്പ്ലാന്റ് ഫ്ലൈറ്റുകൾക്കും പ്രത്യേകം സജ്ജീകരിച്ച വിമാനമാണിത്. എന്നാൽ, അപകടസമയത്ത് ഈ വിമാനം മെഡിക്കൽ ഒഴിപ്പിക്കലിനായിരുന്നോ അല്ലെങ്കിൽ രോഗികൾ ഉണ്ടായിരുന്നോ എന്നതിനെക്കുറിച്ച് വിവരങ്ങൾ ലഭ്യമല്ല. സംഭവസ്ഥലത്തിനടുത്തുള്ള റോച്ച്ഫോർഡ് ഹണ്ട്രഡ് ഗോൾഫ് ക്ലബ് മുൻകരുതലിന്റെ ഭാഗമായി ഒഴിപ്പിച്ചതായി പോലീസ് അറിയിച്ചു.

സംഭവത്തിന് ദൃക്സാക്ഷിയായ ജോൺ ജോൺസൺ എന്നയാൾ, വിമാനം പറന്നുയർന്ന് നിമിഷങ്ങൾക്കകം ഇടതുവശത്തേക്ക് ചെരിഞ്ഞ് താഴേക്ക് തലകുത്തി വീണ് തീഗോളമായി മാറിയതായി വിവരിച്ചു. ഗതാഗത സെക്രട്ടറി ഹെയ്ഡി അലക്സാണ്ടർ, അപകടത്തിൽ ഉൾപ്പെട്ടവർക്ക് വേണ്ടി പ്രാർത്ഥിക്കുന്നുവെന്നും സ്ഥിതിഗതികൾ നിരീക്ഷിക്കുന്നുണ്ടെന്നും എക്സിൽ കുറിച്ചു. സ്യൂഷ് ഏവിയേഷൻ അധികൃതർ, അന്വേഷണത്തിന് പിന്തുണ നൽകുന്നുണ്ടെന്നും കൂടുതൽ വിവരങ്ങൾ ലഭ്യമാകുന്ന മുറയ്ക്ക് അപ്ഡേറ്റ് ചെയ്യുമെന്നും അറിയിച്ചു.

English Summary: A Beechcraft B200 plane crashed shortly after takeoff from London Southend Airport, prompting a major emergency response and airport closure.