ആൻഡി ബേൺഹാം അടുത്ത ബ്രിട്ടീഷ് പ്രധാനമന്ത്രിയായേക്കും; സൂചന നൽകി ചാൻസലർ റേച്ചൽ റീവ്സ്

ബ്രിട്ടീഷ് രാഷ്ട്രീയത്തിൽ അധികാരമാറ്റം അടുത്തുവരുമ്പോൾ, ആൻഡി ബേൺഹാം അടുത്ത പ്രധാനമന്ത്രിയാകുമെന്ന് ചാൻസലർ റേച്ചൽ റീവ്സ് പറഞ്ഞു. ലണ്ടനിൽ നടന്ന ബ്രിട്ടീഷ് ചേംബർ ഓഫ് കൊമേഴ്സ് പരിപാടിയിലാണ് റീവ്സ് ഇക്കാര്യം വ്യക്തമാക്കിയത്. ബേൺഹാം പ്രധാനമന്ത്രിയായാൽ താൻ ചാൻസലറായി തുടരുമോ എന്ന ചോദ്യത്തിന്, അത് തീരുമാനിക്കേണ്ടത് ബേൺഹാമാണെന്നും ഇപ്പോൾ അതിനെക്കുറിച്ച് പറയാൻ താൽപര്യമില്ലെന്നും അവർ മറുപടി നൽകി.
രാജ്യത്തിന്റെ സമ്പദ്‌വ്യവസ്ഥയ്ക്ക് സ്ഥിരത കൊണ്ടുവരാൻ തന്റെ കാലത്ത് കഴിഞ്ഞുവെന്ന് റീവ്സ് പറഞ്ഞു. ബേൺഹാമുമായി തനിക്ക് വർഷങ്ങളായുള്ള ബന്ധമുണ്ടെന്നും, 2015-ൽ ലേബർ നേതൃസ്ഥാനത്തേക്ക് അദ്ദേഹം മത്സരിച്ചപ്പോൾ താൻ പിന്തുണച്ചിരുന്നുവെന്നും അവർ വ്യക്തമാക്കി. ഗ്രേറ്റർ മാഞ്ചസ്റ്ററിലെ ഗതാഗത വികസന പദ്ധതികളിലും മറ്റ് മേഖലകളിലും താനും ബേൺഹാമും ഒരുമിച്ച് പ്രവർത്തിച്ചിട്ടുണ്ടെന്നും റീവ്സ് പറഞ്ഞു. അടുത്ത ചാൻസലർ ആരായാലും ഇപ്പോൾ തുടങ്ങിയ സാമ്പത്തിക നിലപാടുകൾ തുടരുമെന്നാണ് തന്റെ പ്രതീക്ഷയെന്നും അവർ കൂട്ടിച്ചേർത്തു.അതേസമയം, സ്ഥാനമൊഴിയുന്ന പ്രധാനമന്ത്രി സർ കീർ സ്റ്റാർമർ അധികാരമാറ്റം ക്രമമായി നടക്കുമെന്ന് ഉറപ്പ് നൽകി. നല്ല മനസ്സോടെയാണ് താൻ സ്ഥാനമൊഴിയുന്നതെന്നും, പുതിയ പ്രധാനമന്ത്രിക്ക് ചുമതല കൈമാറുന്ന ദിവസം വരെയും രാജ്യത്തിനായി പ്രവർത്തിക്കുമെന്നും സ്റ്റാർമർ പറഞ്ഞു. അധികാരമാറ്റം കാരണം ഭരണത്തിൽ വലിയ തടസ്സമുണ്ടാകാതിരിക്കാൻ ശ്രദ്ധിക്കുമെന്നും അദ്ദേഹം വ്യക്തമാക്കി. ബ്രിട്ടനെ സേവിക്കാൻ കഴിഞ്ഞത് ജീവിതത്തിലെ വലിയ ബഹുമതിയാണെന്നും രാജ്യം മുന്നോട്ട് പോകാൻ താൻ അവസാനംവരെ സഹായിക്കുമെന്നും സ്റ്റാർമർ പറഞ്ഞു.