ഇടിമിന്നൽ മഴയിൽ ഹീത്രൂ, ഗാറ്റ്‌വിക് വിമാന സർവീസുകൾ തടസ്സപ്പെട്ടു

ലണ്ടൻ : യുകെയിൽ കടുത്ത ചൂടിന് പിന്നാലെ ശക്തമായ ഇടിമിന്നലോടു കൂടിയ മഴ എത്തിയതോടെ ലണ്ടനിലെ പ്രധാന വിമാനത്താവളങ്ങളായ ഹീത്രൂയിലും ഗാറ്റ്‌വിക്കിലും നൂറുകണക്കിന് വിമാന സർവീസുകൾ തടസ്സപ്പെട്ടു. ശനിയാഴ്ച മാത്രം അറുനൂറിലധികം സർവീസുകൾ മണിക്കൂറുകളോളം വൈകിയതായി റിപ്പോർട്ടുകൾ പറയുന്നു. മോശം കാലാവസ്ഥയെ തുടർന്ന് വ്യോമഗതാഗത നിയന്ത്രണം ഏർപ്പെടുത്തിയതിനാൽ നിരവധി വിമാനങ്ങൾ റദ്ദാക്കേണ്ടിയും വന്നു. നിയന്ത്രണങ്ങൾ രാത്രി വൈകും വരെ തുടരുമെന്നാണ് അധികൃതർ നൽകിയ സൂചന.

ബ്രിട്ടീഷ് എയർവേസ്, ഈസിജെറ്റ് ഉൾപ്പെടെയുള്ള പ്രധാന വിമാനക്കമ്പനികളെയാണ് പ്രതിസന്ധി കൂടുതലായി ബാധിച്ചത്. യാത്രക്കാർ മണിക്കൂറുകളോളം വിമാനങ്ങൾക്കുള്ളിലും വിമാനത്താവളങ്ങളിലും കാത്തിരിക്കേണ്ടി വന്നു. ചില വിമാനങ്ങൾ പുറപ്പെടാൻ ആറ് മണിക്കൂർ വരെ വൈകിയതായി അധികൃതർ അറിയിച്ചു. കടുത്ത ചൂടിനെ തുടർന്ന് യുകെയുടെ തെക്കും കിഴക്കും ഭാഗങ്ങളിൽ കാലാവസ്ഥാ വകുപ്പ് ഓറഞ്ച് മുന്നറിയിപ്പ് നൽകിയിരുന്ന സാഹചര്യത്തിലാണ് അപ്രതീക്ഷിതമായി ശക്തമായ ഇടിമിന്നലും മഴയും എത്തിയത്.

വിമാനത്താവള നിയന്ത്രണങ്ങൾ മൂലമുള്ള താമസം ആയതിനാൽ യാത്രക്കാർക്ക് നിയമപരമായ നഷ്ടപരിഹാരം ലഭിക്കണമെന്നില്ലെന്ന സൂചനയും പുറത്തുവന്നിട്ടുണ്ട്. കാലാവസ്ഥയെ തുടർന്ന് ഉണ്ടായ ബുദ്ധിമുട്ടുകൾക്ക് വിമാനക്കമ്പനികൾ യാത്രക്കാരോട് ക്ഷമാപണം നടത്തി. യാത്ര തിരിക്കുന്നതിന് മുമ്പ് അതത് വിമാനക്കമ്പനികളുമായി ബന്ധപ്പെട്ട് സർവീസുകളുടെ സമയം ഉറപ്പാക്കണമെന്ന് ഹീത്രൂ അധികൃതർ നിർദേശിച്ചു. വരും മണിക്കൂറുകളിൽ കൂടുതൽ താമസവും റദ്ദാക്കലുകളും ഉണ്ടാകാമെന്നതിനാൽ യാത്രക്കാർ മുൻകരുതൽ പാലിക്കണമെന്നും മുന്നറിയിപ്പുണ്ട്.

English Summary: Thunderstorms after the UK heatwave caused major delays and cancellations at Heathrow and Gatwick airports.