ഇന്ത്യ–സ്കോട്ട്ലൻഡ് ബന്ധം കൂടുതൽ ശക്തിപ്പെടുത്തുന്നു; സ്കോട്ടിഷ് പാർലമെന്റിൽ പ്രത്യേക യോഗം
ലണ്ടൻ : ഇന്ത്യയും സ്കോട്ട്ലൻഡും തമ്മിലുള്ള ഉഭയകക്ഷി ബന്ധങ്ങൾ കൂടുതൽ ദൃഢമാക്കുന്നതിന്റെ ഭാഗമായി സ്കോട്ടിഷ് പാർലമെന്റിൽ പ്രത്യേക യോഗം ചേർന്നു. ക്രോസ് പാർട്ടി ഗ്രൂപ്പ് ഓൺ ഇന്ത്യയുടെ പുനഃസംഘടനയ്ക്ക് ശേഷമുള്ള ആദ്യ യോഗമാണ് സ്കോട്ടിഷ് പാർലമെന്റിൽ നടന്നത്. എഡിൻബറയിലെ ഇന്ത്യൻ കോൺസൽ ജനറൽ പങ്കെടുത്ത യോഗത്തിന് ക്രോസ് പാർട്ടി ഗ്രൂപ്പ് കൺവീനറും സ്കോട്ടിഷ് പാർലമെന്റ് അംഗവുമായ മാർട്ടിൻ ഡേ നേതൃത്വം നൽകി. ഇരു രാജ്യങ്ങളും തമ്മിലുള്ള വ്യാപാരം, വിദ്യാഭ്യാസം, സംസ്കാരം, സമൂഹ പങ്കാളിത്തം തുടങ്ങിയ വിവിധ മേഖലകളിലെ സഹകരണം പുതിയ തലങ്ങളിലേക്ക് എത്തിക്കുകയാണ് ഈ കൂട്ടായ്മയിലൂടെ ലക്ഷ്യമിടുന്നത്.
സ്കോട്ട്ലൻഡിലെ ഇന്ത്യൻ സമൂഹത്തിനും പ്രത്യേകിച്ച് മലയാളികൾക്കും ശ്രദ്ധേയമായ യോഗമായിരുന്നു ഇത്. യോഗത്തിന് നേതൃത്വം നൽകിയ ഫാൽക്കിർക്ക് ഈസ്റ്റ് ആൻഡ് ലിൻലിത്ത്ഗോ മണ്ഡലത്തിലെ ജനപ്രതിനിധിയായ മാർട്ടിൻ ഡേയ്ക്ക് കേരളവുമായി അടുത്ത കുടുംബബന്ധമുണ്ട്. എറണാകുളം ജില്ലയിലെ പാമ്പാക്കുട സ്വദേശിനിയായ നിധിൻ ചന്ദാണ് അദ്ദേഹത്തിന്റെ ഭാര്യ. ഇന്ത്യൻ സമൂഹവുമായി അടുത്ത ബന്ധം പുലർത്തുന്ന രാഷ്ട്രീയ നേതാവെന്ന നിലയിൽ, സ്കോട്ട്ലൻഡിലെ ഇന്ത്യൻ വിദ്യാർത്ഥികൾക്കും സംരംഭകർക്കും സാംസ്കാരിക സംഘടനകൾക്കും ഭാവിയിൽ കൂടുതൽ അവസരങ്ങൾ തുറന്നുനൽകാൻ ഇത്തരം ഇടപെടലുകൾ സഹായകരമാകുമെന്നാണ് വിലയിരുത്തപ്പെടുന്നത്.
വിവരസാങ്കേതികവിദ്യ, ആരോഗ്യരംഗം, പുനരുപയോഗ ഊർജം, നിക്ഷേപം തുടങ്ങിയ മേഖലകളിൽ ഇന്ത്യയും സ്കോട്ട്ലൻഡും തമ്മിലുള്ള സഹകരണം നിലവിൽ ശക്തമാണ്. ഈ സാഹചര്യത്തിൽ ക്രോസ് പാർട്ടി ഗ്രൂപ്പ് ഓൺ ഇന്ത്യയുടെ പ്രവർത്തനം വീണ്ടും സജീവമാകുന്നത് ഇരു ഭാഗങ്ങൾക്കും ഗുണകരമായ നീക്കമായി കാണപ്പെടുന്നു. ഔദ്യോഗിക നയതന്ത്ര ബന്ധങ്ങൾക്കപ്പുറം ഇരു രാജ്യങ്ങളിലെയും ജനങ്ങൾ തമ്മിലുള്ള സാംസ്കാരികവും സാമൂഹികവുമായ സൗഹൃദം കൂടുതൽ ആഴത്തിലാക്കാൻ ഇത്തരം പാർലമെന്ററി ഇടപെടലുകൾ വഴിയൊരുക്കുമെന്നാണ് വിലയിരുത്തൽ.
English Summary: A special meeting at the Scottish Parliament focused on strengthening India–Scotland ties across trade, education, culture and community engagement.
