ബ്രെക്‌സിറ്റിന് ശേഷം ബ്രിട്ടൻ–ഇയു ബന്ധം പുതുക്കുന്നു: തൊഴിൽവായ്പകൾക്കും വിലക്കുറവുകൾക്കുമായി പുതിയ ധാരണ
ലണ്ടൻ; പ്രധാനമന്ത്രി കെയർ സ്റ്റാർമറിന്റെ നേതൃത്വത്തിൽ യുകെ, യൂറോപ്യൻ യൂണിയനുമായി പുതിയ കരാർ ഒപ്പുവച്ചു. ബ്രിട്ടീഷ് ബിസിനസുകളെ പിന്തുണയ്ക്കുക, തൊഴിലവസരങ്ങൾ വർധിപ്പിക്കുക, ജനങ്ങളുടെ കൈയിൽ കൂടുതൽ പണം എത്തിക്കുക എന്നിവയാണ് ഈ കരാറിന്റെ ലക്ഷ്യം. 2040-ഓടെ യുകെ സമ്പദ്‌വ്യവസ്ഥയിൽ ഏകദേശം 9 ബില്യൺ പൗണ്ടിന്റെ വളർച്ച ഈ കരാർ ഉറപ്പാക്കുമെന്നാണ് പ്രതീക്ഷ.
ഭക്ഷ്യ-പാനീയ വ്യവസായത്തിന് ഗുണകരമായ എസ്‌പി‌എസ് കരാർ ഉൾപ്പെടെ, ചരക്കുകളുടെ ഇറക്കുമതി-കയറ്റുമതിയിലെ ബ്യൂറോക്രസി കുറയ്ക്കുന്നതാണ് ഈ കരാറിന്റെ പ്രധാന സവിശേഷത. ഇത് ഭക്ഷ്യവില കുറയ്ക്കുകയും സൂപ്പർമാർക്കറ്റുകളിൽ ഉൽപ്പന്നങ്ങളുടെ ലഭ്യത വർധിപ്പിക്കുകയും ചെയ്യും. കൂടാതെ, യുകെ-ഇയു എമിഷൻ ട്രേഡിംഗ് സിസ്റ്റം ലിങ്കിംഗ്, ബ്രിട്ടീഷ് സ്റ്റീൽ വ്യവസായത്തിന് 25 മില്യൺ പൗണ്ട് പ്രതിവർഷം ലാഭം നേടിക്കൊടുക്കും.
നിയമവിരുദ്ധ കുടിയേറ്റം തടയുന്നതിനുള്ള പരിഹാരങ്ങൾ, യുവജനങ്ങൾക്കായുള്ള യാത്രാ-തൊഴിൽ പദ്ധതി, യൂറോപ്പിലെ ഇ-ഗേറ്റുകളുടെ ഉപയോഗം, വളർത്തുമൃഗങ്ങൾക്കുള്ള ‘പെറ്റ് പാസ്‌പോർട്ട്’ തുടങ്ങിയവയും കരാറിൽ ഉൾപ്പെടുന്നു. ബ്രിട്ടന്റെ മത്സ്യബന്ധന മേഖലയ്ക്ക് 360 മില്യൺ പൗണ്ടിന്റെ നിക്ഷേപവും 12 വർഷത്തെ സ്ഥിരതയും ഈ കരാർ വാഗ്ദാനം ചെയ്യുന്നു. സിംഗിൾ മാർക്കറ്റിലേക്കോ കസ്റ്റംസ് യൂണിയനിലേക്കോ മടങ്ങില്ലെന്ന ഗവൺമെന്റിന്റെ വാഗ്ദാനം ഈ കരാർ പാലിക്കുന്നു.
