ബ്രിട്ടനിലെ വിദേശകാര്യ മന്ത്രാലയത്തിന് മുന്നിലെ ക്ലൈവ് പ്രതിമ: നീക്കം ചെയ്യണമെന്ന് ലേബർ പീർ; ഇന്ത്യൻ സന്ദർശകർക്ക് അപമാനമെന്ന് ആരോപണം

ലണ്ടൻ: ബ്രിട്ടന്റെ കൊളോണിയൽ കൊള്ളയുടെ പ്രതീകമായ റോബർട്ട് ക്ലൈവിന്റെ പ്രതിമ ഫോറിൻ ഓഫീസിന് മുന്നിൽ നിന്നും ഉടൻ നീക്കം ചെയ്യണം എന്ന് ലേബർ പീർ തങ്കം ദേബോണെയർ ശക്തമായി ആവശ്യപ്പെട്ടു. ഇന്ത്യൻ പൗരന്മാരും ഉന്നതരും ഈ ‘ചരിത്രവിരുദ്ധ’ വെങ്കൽ പ്രതിമക്ക് മുന്നിലൂടെ കടന്നുപോകേണ്ടി വരുന്നത് 21-ാം നൂറ്റാണ്ടിലെ ബ്രിട്ടന്റെ മൂഖം മോശമാക്കുന്നതാണെന്ന് അവർ തുറന്നടിച്ചു. ക്ലൈവിനെ വിജയിയായി ചിത്രീകരിക്കുന്ന ഈ പ്രതിമ കൊളോണിയൽ ക്രൂരതകളെ മറച്ചുവെക്കുന്നതാണെന്ന് ദേബോണെയർ കുറ്റപ്പെടുത്തി.

ബ്രിട്ടന്റെ കൊളോണിയൽ ചരിത്രത്തിലെ ഏറ്റവും വിവാദകരനായ വ്യക്തിയാണ് ക്ലൈവ്. ചരിത്രകാരൻ വില്യം ഡാൽറിംപിൾ അദ്ദേഹത്തെ ‘അസ്ഥിരമായ സോഷ്യോപാത്ത്’ എന്നും ‘അക്രമാസക്തനായ കൊള്ളക്കാരൻ’ എന്നും വിശേഷിപ്പിച്ചു. 1912-ൽ ശില്പി ജോൺ ട്വീഡ് നിർമ്മിച്ച ഈ പ്രതിമയിൽ ക്ലൈവ് ഔദ്യോഗിക വേഷത്തിൽ, വാളും രേഖകളും കൈയിൽ പിടിച്ച് നിൽക്കുന്നു. പീഠത്തിൽ ‘ക്ലൈവ്’ എന്ന് മാത്രം രേഖപ്പെടുത്തിയിട്ടുണ്ടെങ്കിലും, ഇന്ത്യയിൽ നിന്ന് വൻതുക കൊള്ളയടിച്ച് വെയിൽസിലെ പോവിസ് കാസിൽ-ൽ ആയിരക്കണക്കിന് വസ്തുക്കൾ സൂക്ഷിച്ച ക്രൂരനാണ് അദ്ദേഹം

.

പ്രതിമയും ചുറ്റുമുള്ള പാനലുകളും തെറ്റായ ചരിത്രം പ്രചരിപ്പിക്കുന്നുവെന്ന് ദേബോണെയർ വിമർശിച്ചു. കൊളോണിയൽ ഭരണത്തിന് മുമ്പ് ഇന്ത്യ വികസിതമായ രാജ്യം ആയിരുന്നുവെന്നും, സ്വതന്ത്ര വ്യാപാരം നടത്തിയിരുന്നുവെന്നും അവർ പറഞ്ഞു. എന്നാൽ ഈസ്റ്റ് ഇന്ത്യാ കമ്പനി അത് എല്ലാം തകർത്തുവെന്നും, സ്വാതന്ത്ര്യത്തിനുശേഷം ഇന്ത്യ സാമ്പത്തിക-ശാസ്ത്ര-സാങ്കേതിക മേഖലകളിൽ വൻ വളർച്ച രേഖപ്പെടുത്തിയതാണെന്നും അവർ ചൂണ്ടിക്കാട്ടി. ഈ പ്രതിമ ഇന്ത്യൻ ഡയസ്പോറയ്ക്കും സന്ദർശകർക്കും അപമാനകരമാണ്.

2020-ൽ ബ്രിസ്റ്റോളിൽ അടിമവ്യാപാരി എഡ്വേർഡ് കൊൾസ്റ്റൺ പ്രതിമ ബ്ലാക്ക് ലൈവ്സ് മാറ്റർ പ്രവർത്തകർ താഴെയിട്ടപ്പോൾ ദേബോണെയർ അവിടെ എംപിയായിരുന്നു. ആ പ്രതിമ പിന്നീട് മ്യൂസിയത്തിൽ സന്ദർഭവിശദീകരണത്തോടെ പ്രദർശിപ്പിക്കപ്പെടുന്നു. എഡിൻബറോ പുസ്തകമേളയിൽ സ്വതന്ത്രാഭിപ്രായപ്രകടന ചർച്ചയിൽ ദേബോണെയർ ക്ലൈവ് പ്രതിമയെക്കുറിച്ച് തുറന്നുപറഞ്ഞു. അധികാരത്തിന്റെ കഥകൾ മാത്രം പറയപ്പെടുന്നത് സ്വതന്ത്രാഭിപ്രായത്തെ ദുർബലപ്പെടുത്തുമെന്ന് അവർ മുന്നറിയിപ്പ് നൽകി.

English summary: Labour peer Thangam Debbonaire demands removal of Clive of India statue from UK Foreign Office, calling it historically inaccurate and insulting to Indian visitors.