ലേബർ സർക്കാർ വിദേശ കുറ്റവാളികൾക്കെതിരെ കർശന നടപടികളുമായി: യുകെയിൽ പുതിയ നയം
ലണ്ടൻ: യുകെയിൽ നിന്ന് വിദേശ പൗരന്മാരെ ഏതൊരു കുറ്റകൃത്യത്തിനും നാടുകടത്താൻ ലേബർ സർക്കാർ പുതിയ നിയമം കൊണ്ടുവരുന്നു. നിലവിൽ ഒരു വർഷത്തിൽ കൂടുതൽ ശിക്ഷ ലഭിക്കുന്നവർക്ക് മാത്രമാണ് നാടുകടത്തൽ നടപടി. എന്നാൽ, ഹോം സെക്രട്ടറി യെവെറ്റ് കൂപ്പറിന്റെ നേതൃത്വത്തിൽ, എല്ലാ കുറ്റവാളികളുടെയും വിവരങ്ങൾ ഹോം ഓഫിസിന് കൈമാറാനും നാടുകടത്തൽ അധികാരം വിപുലീകരിക്കാനുമാണ് പദ്ധതി. നൈജൽ ഫറാഷിന്റെ റിഫോം യുകെ പാർട്ടിയുടെ വളർച്ചയും കുടിയേറ്റ വിരുദ്ധ വികാരവും മറികടക്കാനുള്ള ലേബറിന്റെ ശ്രമമാണ് ഈ നീക്കം.
നാളെ പ്രസിദ്ധീകരിക്കുന്ന വൈറ്റ് പേപ്പറിൽ, ലൈംഗിക കുറ്റവാളികളെ ‘ഗുരുതര കുറ്റവാളികൾ’ ആയി വർഗീകരിക്കുകയും അവർക്ക് അഭയം നിഷേധിക്കുകയും ചെയ്യും. കുറ്റവാളികൾ യുകെയിൽ വേര് താഴ്ത്തുന്നതിന് മുമ്പ് വിസ റദ്ദാക്കാനുള്ള നടപടികളും ആലോചനയിലാണ്. മനുഷ്യാവകാശ നിയമത്തിലെ എട്ടാം അനുച്ഛേദത്തിന്റെ വ്യാഖ്യാനം പരിമിതപ്പെടുത്തി നാടുകടത്തൽ എളുപ്പമാക്കാനും പദ്ധതിയുണ്ട്. 2024 ജൂലൈ മുതൽ 3,594 വിദേശ കുറ്റവാളികളെ നാടുകടത്തിയതായി ഹോം ഓഫിസ് വ്യക്തമാക്കി.
കുടിയേറ്റം നിയന്ത്രിക്കുന്നതിൽ ലേബർ പരാജയപ്പെട്ടുവെന്ന് ടോറി നേതാവ് ക്രിസ് ഫിൽപും നൈജൽ ഫറാഷും വിമർശിച്ചു. “ഈ നയങ്ങൾ വാഗ്ദാനങ്ങൾ മാത്രമാണ്, നടപ്പാക്കില്ല,” ഫറാഷ് പറഞ്ഞു. 2028-ഓടെ വാർഷിക കുടിയേറ്റം 5.25 ലക്ഷമായി ഉയരുമെന്ന് ഹോം ഓഫിസ് ഉദ്യോഗസ്ഥർ ആശങ്കപ്പെടുന്നു. യുകെ നിയമങ്ങൾ പാലിക്കാൻ എല്ലാവരും ബാധ്യസ്ഥരാണെന്നും കുറ്റവാളികൾക്കെതിരെ കർശന നടപടി തുടരുമെന്നും യെവെറ്റ് കൂപ്പർ വ്യക്തമാക്കി.
