വിന്റർ ഫ്യൂവൽ പേയ്മെന്റുകൾ പുനഃസ്ഥാപിക്കുമെന്ന് യുകെ ചാൻസലർ റേച്ചൽ റീവ്സ്
ലണ്ടൻ: യുകെ സർക്കാരിന്റെ ജനപ്രിയമല്ലാത്ത തീരുമാനത്തിനെതിരെ ഉയർന്ന വിമർശനങ്ങൾക്ക് ശേഷം, ഈ ശൈത്യകാലത്തിന് മുമ്പ് വിന്റർ ഫ്യൂവൽ പേയ്മെന്റുകൾ ഭാഗികമായി പുനഃസ്ഥാപിക്കുമെന്ന് ചാൻസലർ റേച്ചൽ റീവ്സ് പ്രഖ്യാപിച്ചു. 11,500 പൗണ്ടിന്റെ വരുമാന പരിധിക്ക് മുകളിലുള്ള പെൻഷൻകാർക്ക് ഈ ആനുകൂല്യം ലഭിക്കില്ലെന്ന് നേരത്തെ തീരുമാനിച്ചിരുന്നെങ്കിലും, ഈ പരിധി ഉയർത്തി കൂടുതൽ പെൻഷൻകാർക്ക് ആനുകൂല്യം ഉറപ്പാക്കുമെന്ന് റീവ്സ് വ്യക്തമാക്കി. അടുത്ത ആഴ്ച നടക്കുന്ന സ്പെൻഡിംഗ് റിവ്യൂവിൽ പുതിയ പരിധി പ്രഖ്യാപിക്കാനാണ് സാധ്യത.
പ്രധാനമന്ത്രി കെയർ സ്റ്റാർമർ കഴിഞ്ഞ മാസം കൂടുതൽ പെൻഷൻകാർക്ക് ഈ ആനുകൂല്യം ലഭ്യമാക്കണമെന്ന് ആഗ്രഹം പ്രകടിപ്പിച്ചിരുന്നു. എന്നാൽ, എല്ലാ പെൻഷൻകാർക്കും യൂനിവേഴ്സൽ വിന്റർ ഫ്യൂവൽ പേയ്മെന്റ് നൽകില്ലെന്ന് പെൻഷൻസ് മന്ത്രി ടോർസ്റ്റൻ ബെൽ വ്യക്തമാക്കി. സമ്പന്നരായ പെൻഷൻകാർക്ക് ഈ ആനുകൂല്യം നൽകുന്നത് നീതിയല്ലെന്നാണ് സർക്കാർ വിലയിരുത്തൽ. പകരം, ഉയർന്ന വരുമാനമുള്ളവരിൽ നിന്ന് ടാക്സ് റിട്ടേൺ വഴി തുക തിരികെ പിടിക്കുന്ന ഒരു സംവിധാനം പരിഗണിക്കുന്നുണ്ട്.
ബജറ്റ് ബാലൻസ് ചെയ്യുന്നതിന് വെല്ലുവിളികൾ നേരിടുന്നതിനിടെ, 14 വർഷത്തെ കൺസർവേറ്റീവ് ഭരണത്തിന്റെ “സാമ്പത്തിക കെടുകാര്യസ്ഥത”യാണ് തന്റെ പ്രശ്നങ്ങളുടെ കാരണമെന്ന് റീവ്സ് ആരോപിച്ചു. മന്ത്രിസഭയിലെ ചില അംഗങ്ങളുടെ ചെലവ് ആവശ്യങ്ങൾ നിരസിക്കേണ്ടി വന്നതായും അവർ സൂചിപ്പിച്ചു. ഹോം സെക്രട്ടറി യെവറ്റ് കൂപ്പർ, എനർജി സെക്രട്ടറി എഡ് മിലിബാൻഡ്, ഹൗസിംഗ് സെക്രട്ടറി ആഞ്ചല റേനർ എന്നിവരുടെ വകുപ്പുകൾ ഇനിയും ട്രഷറിയുമായി ബജറ്റ് കരാറിൽ എത്തിയിട്ടില്ല.
2029-30 ഓടെ ബജറ്റ് ബാലൻസിലോ സർപ്ലസിലോ എത്തണമെന്നും സാമ്പത്തിക കടം ജിഡിപിയുടെ ശതമാനമായി കുറയണമെന്നും വ്യവസ്ഥ ചെയ്യുന്ന ഫിസ്കൽ റൂളുകൾ റീവ്സ് കർശനമായി പാലിക്കുമെന്ന് ഉറപ്പിച്ചു. 2022ലെ ലിസ് ട്രസിന്റെ മിനി-ബജറ്റ് സൃഷ്ടിച്ച സാമ്പത്തിക പ്രതിസന്ധി ഓർമിപ്പിച്ച അവർ, “ഫാന്റസി ഇക്കണോമിക്സ്”ന്റെ അപകടങ്ങളെക്കുറിച്ച് മുന്നറിയിപ്പ് നൽകി. ഈ ഫിസ്കൽ റൂളുകൾ തൊഴിലാളികളുടെ സാമ്പത്തിക സുരക്ഷയ്ക്ക് അനിവാര്യമാണെന്നും അവർ വ്യക്തമാക്കി.
