ഇംഗ്ലണ്ടിലെ ആശുപത്രികളിൽ വൻ ജോലി വെട്ടിക്കുറവ്: ഒരു ലക്ഷത്തിലധികം പേർക്ക് ജോലി നഷ്ടപ്പെടാൻ സാധ്യത

ലണ്ടൻ: ഇംഗ്ലണ്ടിലെ ആശുപത്രികളിൽ വൻ തോതിലുള്ള ജോലി വെട്ടിക്കുറവ് വരുന്നു എന്ന ഞെട്ടിക്കുന്ന വാർത്തയാണ് ഇപ്പോൾ പുറത്തുവരുന്നത്. എൻഎച്ച്എസിന്റെ പുതിയ തലവനും ഹെൽത്ത് സെക്രട്ടറി വെസ് സ്ട്രീറ്റിംഗും ചേർന്ന് നടപ്പാക്കുന്ന കടുത്ത ചെലവ് ചുരുക്കൽ പദ്ധതിയുടെ ഭാഗമായാണ് ഈ നീക്കം. ഒരു ലക്ഷത്തിലധികം ജീവനക്കാർക്ക് ജോലി നഷ്ടപ്പെടാൻ സാധ്യതയുണ്ടെന്നാണ് റിപ്പോർട്ടുകൾ പറയുന്നത്. ഈ വൻ ജോലി നഷ്ടത്തിന്റെ ചെലവ് ഏകദേശം 200 കോടി പൗണ്ട് വരും എന്ന് കണക്കാക്കപ്പെടുന്നു. എന്നാൽ, ഇതിനുള്ള പണം ആശുപത്രികൾക്ക് ഇല്ലാത്തതിനാൽ ട്രഷറിയോട് സഹായം ആവശ്യപ്പെട്ടിരിക്കുകയാണ് എൻഎച്ച്എസ് നേതൃത്വം.

എൻഎച്ച്എസ് ഇംഗ്ലണ്ടിന്റെ പുതിയ മേധാവി സർ ജിം മാക്കി, 215 ആശുപത്രി ട്രസ്റ്റുകളോട് ഈ വർഷാവസാനത്തോടെ അവരുടെ ഓഫീസ് ചെലവുകൾ—എച്ച്ആർ, ഫിനാൻസ്, കമ്മ്യൂണിക്കേഷൻസ് പോലുള്ളവ—50 ശതമാനം കുറയ്ക്കാൻ നിർദേശിച്ചു. എന്നാൽ, ഇത് പാലിക്കാൻ ശ്രമിച്ചാൽ 3 മുതൽ 11 ശതമാനം വരെ ജീവനക്കാരെ കുറയ്ക്കേണ്ടി വരുമെന്ന് ചില ട്രസ്റ്റുകൾ മുന്നറിയിപ്പ് നൽകി. 13.7 ലക്ഷം പേർ ജോലി ചെയ്യുന്ന ഈ മേഖലയിൽ ഇത് 41,100 മുതൽ 1,50,700 വരെ ജോലികൾ നഷ്ടപ്പെടാൻ ഇടയാക്കും.

എൻഎച്ച്എസ് കോൺഫെഡറേഷൻ തലവൻ മാത്യു ടെയ്‌ലർ പറയുന്നത്, ഇത്രയും വലിയ ചെലവ് ചുരുക്കൽ ആവശ്യപ്പെടുന്നത് ഞെട്ടിക്കുന്നതാണ്. രോഗികൾക്ക് വേഗത്തിൽ ചികിത്സ ലഭ്യമാക്കാൻ ഈ നടപടി തടസ്സമാകുമെന്നും അവർ ആശങ്കപ്പെടുന്നു. ട്രഷറിയിൽ നിന്ന് ഒരു ദേശീയ റിഡൻഡൻസി ഫണ്ട് ഉണ്ടാക്കിയില്ലെങ്കിൽ, സർക്കാർ പ്രതീക്ഷിക്കുന്ന ലാഭം പൂർണമായും ഇല്ലാതാകുമെന്ന് അവർ മുന്നറിയിപ്പ് നൽകി. ആശുപത്രികൾക്ക് സാമ്പത്തിക സ്ഥിരത ഉറപ്പാക്കാൻ ഇത് അത്യാവശ്യമാണെന്നും അവർ കൂട്ടിച്ചേർത്തു.

എൻഎച്ച്എസ് ഇംഗ്ലണ്ടിനെ പിൻവലിച്ച് ഡിപ്പാർട്ട്മെന്റ് ഓഫ് ഹെൽത്ത് ആൻഡ് സോഷ്യൽ കെയറുമായി ലയിപ്പിക്കാനുള്ള തീരുമാനവും ഈ മാറ്റങ്ങളുടെ ഭാഗമാണ്. ഇതോടെ 15,300 ജീവനക്കാരുള്ള എൻഎച്ച്എസ് ഇംഗ്ലണ്ടിൽ നിന്ന് പകുതിയോളം പേർക്കും 3,300 പേർ ജോലി ചെയ്യുന്ന ഡിപ്പാർട്ട്മെന്റിൽ നിന്ന് ചിലർക്കും ജോലി നഷ്ടമാകും. കൂടാതെ, 42 റീജണൽ ഓവർസൈറ്റ് ബോഡികളിൽ നിന്ന് 12,500 ജോലികൾ വെട്ടിക്കുറയ്ക്കാനും സാധ്യതയുണ്ട്.

ചില ട്രസ്റ്റുകൾ ഈ വർഷം 12 ദശലക്ഷം പൗണ്ട് വരെ ചെലവഴിച്ച് ജീവനക്കാരെ പിരിച്ചുവിടാൻ പദ്ധതിയിടുന്നു. എന്നാൽ, ചിലർക്ക് ഇത് താങ്ങാനാവില്ലെന്നതിനാൽ സ്വാഭാവികമായി ജീവനക്കാർ കുറയുന്നതിനെ ആശ്രയിക്കുകയാണ്. കിംഗ്സ് ഫണ്ടിന്റെ സാറാ വൂൾനോ പറയുന്നത്, ബ്രിട്ടനിൽ 14% പേർ മാത്രമാണ് എൻഎച്ച്എസ് പണം കാര്യക്ഷമമായി ഉപയോഗിക്കുന്നുവെന്ന് വിശ്വസിക്കുന്നത്. എന്നിട്ടും, ആരോഗ്യ ബജറ്റിന്റെ 1.9% മാത്രമാണ് ഓഫീസ് ചെലവുകൾക്ക് ഉപയോഗിക്കുന്നതെന്ന് അവർ ചൂണ്ടിക്കാട്ടി.

നഫീൽഡ് ട്രസ്റ്റിന്റെ തലവൻ തിയ സ്റ്റെയിൻ പറയുന്നു, എൻഎച്ച്എസിൽ ആവർത്തനങ്ങളും സമയനഷ്ടവും ഉണ്ടെങ്കിലും, എന്താണ് കുറയ്ക്കുന്നതെന്ന് സർക്കാർ ശ്രദ്ധിക്കണം. ഡിജിറ്റൽ വിദഗ്ധർ, വിശകലന വിദഗ്ധർ, റിക്രൂട്ട്മെന്റ് പ്രൊഫഷണലുകൾ തുടങ്ങിയവർ ആശുപത്രികളുടെ കാര്യക്ഷമതയ്ക്ക് അത്യാവശ്യമാണെന്നും അവർ ഓർമിപ്പിച്ചു. പോർട്സ്മൗത്ത്, ഐൽ ഓഫ് വൈറ്റ് എന്നിവിടങ്ങളിലെ ട്രസ്റ്റുകൾ 798 ജോലികൾ വെട്ടിക്കുറയ്ക്കാൻ പദ്ധതിയിടുന്നു. ബ്രിസ്റ്റോൾ ആശുപത്രികളാകട്ടെ 300-ലധികം പേർക്ക് ജോലി നഷ്ടമാകുന്ന സാഹചര്യത്തിലേക്ക് നീങ്ങുന്നു.

ഡിഎച്ച്എസ്‌സി വക്താവ് പറഞ്ഞത്, എൻഎച്ച്എസിനെ ശക്തിപ്പെടുത്താൻ ഈ മാറ്റങ്ങൾ സഹായിക്കുമെന്നാണ്. 2600 കോടി പൗണ്ട് അധികമായി നിക്ഷേപിക്കുന്നുണ്ടെന്നും വെയ്റ്റിങ് ലിസ്റ്റ് 1.93 ലക്ഷം കുറച്ചുവെന്നും അവർ അവകാശപ്പെട്ടു. എന്നാൽ, ഈ വൻ ജോലി വെട്ടിക്കുറവ് എൻഎച്ച്എസിന്റെ ഭാവിയെ എങ്ങനെ ബാധിക്കുമെന്ന് കാത്തിരുന്ന് കാണേണ്ടതാണ്.