എൻഎച്ച്എസിൽ വൻ പരിഷ്കരണം: ഇംഗ്ലണ്ടിൽ നൂറുകണക്കിന് ഏജൻസികൾ ഒഴിവാക്കുന്നു
ഇംഗ്ലണ്ടിലെ ദേശീയ ആരോഗ്യ സേവന (എൻഎച്ച്എസ്) സംവിധാനത്തിൽ വൻ പരിഷ്കരണങ്ങൾ പ്രഖ്യാപിച്ച് ബ്രിട്ടീഷ് സർക്കാർ. രോഗികൾക്ക് വേണ്ടി പ്രവർത്തിക്കുന്ന ഹെൽത്ത്‌വാച്ച് ഇംഗ്ലണ്ട്, വിസിൽബ്ലോവർമാരെ പിന്തുണയ്ക്കുന്ന നാഷണൽ ഗാർഡിയൻസ് ഓഫീസ് തുടങ്ങി 201 ഏജൻസികൾ ഒഴിവാക്കാനാണ് തീരുമാനം. നിലവിലെ സങ്കീർണമായ സംവിധാനം ലളിതമാക്കി, കൂടുതൽ പ്രവർത്തനക്ഷമതയും രോഗികളുടെ ശബ്ദത്തിന് പ്രാധാന്യവും നൽകാനാണ് ഈ നീക്കമെന്ന് ആരോഗ്യ സെക്രട്ടറി വെസ് സ്ട്രീറ്റിംഗ് വ്യക്തമാക്കി. ലേബർ സർക്കാരിന്റെ 10 വർഷത്തെ ആരോഗ്യ തന്ത്രത്തിന്റെ ഭാഗമായാണ് ഈ മാറ്റങ്ങൾ.
എൻഎച്ച്എസ് ഇംഗ്ലണ്ടിന്റെ ഭരണപരമായ നിയന്ത്രണം അവസാനിപ്പിച്ച്, ആരോഗ്യ സേവനങ്ങൾ സർക്കാർ നേരിട്ട് നിയന്ത്രിക്കും. ഹെൽത്ത്‌വാച്ച് ഇംഗ്ലണ്ട്, ഹെൽത്ത് സർവീസസ് സേഫ്റ്റി ഇൻവെസ്റ്റിഗേഷൻസ് ബോഡി (എച്ച്എസ്എസ്ഐബി) തുടങ്ങിയ സ്ഥാപനങ്ങൾ 2012 മുതൽ രോഗികളുടെ അവകാശങ്ങൾക്കായും സുരക്ഷയ്ക്കായും പ്രവർത്തിച്ചിരുന്നു. എന്നാൽ, ഈ ഏജൻസികൾ അനാവശ്യമായ ഭരണച്ചെലവുകൾ വർധിപ്പിക്കുന്നുവെന്നും ജീവനക്കാരെ അനാവശ്യ നിയന്ത്രണങ്ങൾക്ക് വിധേയമാക്കുന്നുവെന്നുമാണ് സർക്കാർ വിലയിരുത്തൽ. രോഗികളുടെ അഭിപ്രായങ്ങൾ ശേഖരിക്കാൻ എൻഎച്ച്എസ് ആപ്പിന്റെ ഉപയോഗം പ്രോത്സാഹിപ്പിക്കാനും തീരുമാനിച്ചിട്ടുണ്ട്.
ആശുപത്രികളുടെ ഫണ്ടിംഗ് രോഗികളുടെ റേറ്റിംഗിനെ അടിസ്ഥാനമാക്കി നൽകുന്ന പരീക്ഷണ പദ്ധതിയും സർക്കാർ പ്രഖ്യാപിച്ചു. മോശം റേറ്റിംഗ് ലഭിക്കുന്ന ആശുപത്രികൾക്ക് ഫണ്ടിന്റെ ഒരു ഭാഗം മേഖലാതല എൻഎച്ച്എസ് മെച്ചപ്പെടുത്തൽ ഫണ്ടിലേക്ക് മാറ്റും. എന്നാൽ, ജീവനക്കാരുടെ ക്ഷാമം, പഴകിയ കെട്ടിടങ്ങൾ തുടങ്ങിയ പ്രശ്നങ്ങൾ കണക്കിലെടുക്കണമെന്ന് എൻഎച്ച്എസ് കോൺഫെഡറേഷൻ മുന്നറിയിപ്പ് നൽകി. ഈ പദ്ധതി മോശം സേവനമുള്ള ആശുപത്രികളിൽ മാത്രമേ നടപ്പാക്കൂവെന്ന് സർക്കാർ വ്യക്തമാക്കി.
എൻഎച്ച്എസ് ഇംഗ്ലണ്ടിന്റെ പുതിയ തലവൻ സർ ജിം മാക്കി, ആരോഗ്യ സേവനങ്ങൾ രോഗികൾക്ക് കൂടുതൽ ലഭ്യമാക്കേണ്ടതിന്റെ ആവശ്യകത ചൂണ്ടിക്കാട്ടി. “പൊതുജനങ്ങളെ അകറ്റുന്ന സംവിധാനങ്ങൾ നിലവിൽ ഉണ്ട്. ആശുപത്രികളിൽ ബന്ധുക്കളെ ബന്ധപ്പെടാൻ ഫോൺ വിളിച്ചാൽ ആരും എടുക്കാത്ത സ്ഥിതിയാണ്,” അദ്ദേഹം പറഞ്ഞു. ഹെൽത്ത്‌വാച്ച് ഇംഗ്ലണ്ടിന്റെ സിഇഒ ലൂയിസ് അൻസാരി, തങ്ങളുടെ പ്രവർത്തനങ്ങൾ രോഗികൾക്ക് വലിയ മാറ്റങ്ങൾ വരുത്തിയെന്നും, ഇനി അവ സുഗമമായി എൻഎച്ച്എസിന് കൈമാറാൻ ശ്രമിക്കുമെന്നും വ്യക്തമാക്കി.
