യുകെയിൽ നാഷണൽ ഇൻഷുറൻസ് വർധന: വിലക്കയറ്റവും ജോലി വെട്ടിക്കുറവും ഭീഷണി

2025 ഏപ്രിൽ 5, ലണ്ടൻ: യുകെയിൽ ഞായറാഴ്ച മുതൽ തൊഴിലുടമകൾക്ക് നാഷണൽ ഇൻഷുറൻസ് (എൻഐ) സംഭാവനയിൽ വൻ വർധന വരുന്നു. ഇതോടെ, വാർഷിക ശമ്പളം 5,000 പൗണ്ടിന് മുകളിലുള്ള ജീവനക്കാർക്ക് 15 ശതമാനം എൻഐ നൽകേണ്ടി വരും. നിലവിൽ 9,100 പൗണ്ടിന് മുകളിലുള്ള ശമ്പളത്തിന് 13.8 ശതമാനമായിരുന്നു നിരക്ക്. ഈ നികുതി ഭാരം മറികടക്കാൻ ചെറുകിട മുതൽ വൻകിട സ്ഥാപനങ്ങൾ വരെ ഉൽപ്പന്ന വിലയും സേവന നിരക്കുകളും ഉയർത്താൻ ഒരുങ്ങുകയാണ്. കോസ്മെറ്റിക്സ് ഭീമനായ ലഷ്, വാഹന റിപ്പയർ ശൃംഖലയായ ക്വിക് ഫിറ്റ് തുടങ്ങിയ കമ്പനികൾ ഈ മാറ്റം മൂലം വില വർധിപ്പിക്കുമെന്ന് മുന്നറിയിപ്പ് നൽകിയിട്ടുണ്ട്. ചില സ്ഥാപനങ്ങൾ ലാഭം കുറയ്ക്കാനും പുതിയ നിയമനങ്ങൾ നിർത്തിവെക്കാനും തയാറെടുക്കുമ്പോൾ, മറ്റുചിലർ ജോലികൾ വെട്ടിക്കുറച്ച് ചെലവ് നികത്താൻ പദ്ധതിയിടുന്നു.

ട്രഷറി വ്യക്തമാക്കിയതനുസരിച്ച്, ഈ നടപടിയിലൂടെ ശേഖരിക്കുന്ന കോടിക്കണക്കിന് പൗണ്ട് എൻഎച്ച്എസ് ഉൾപ്പെടെയുള്ള പൊതു സേവനങ്ങൾക്കായി വിനിയോഗിക്കും. ആഴ്ചയിൽ 175 പൗണ്ടിന് മുകളിൽ വരുമാനമുള്ള ജീവനക്കാർക്ക് തൊഴിലുടമകൾ നൽകേണ്ട എൻഐ നിരക്ക് 13.8 ശതമാനത്തിൽ നിന്ന് 15 ശതമാനമായി ഉയരും. ഈ മാറ്റം 9.4 ലക്ഷം സ്ഥാപനങ്ങളെ കൂടുതൽ നികുതി അടയ്ക്കാൻ പ്രേരിപ്പിക്കുമെന്നും 2.5 ലക്ഷം സ്ഥാപനങ്ങൾക്ക് ആശ്വാസമാകുമെന്നും 8.2 ലക്ഷം സ്ഥാപനങ്ങൾക്ക് മാറ്റമില്ലാതെ തുടരുമെന്നും സർക്കാർ കണക്കാക്കുന്നു. നികുതി ബാധകമാകുന്ന ശമ്പള പരിധി 9,100 പൗണ്ടിൽ നിന്ന് 5,000 പൗണ്ടായി കുറയുമ്പോൾ, തൊഴിലുടമകൾക്ക് എൻഐ ബില്ലിൽ നിന്ന് തിരികെ ക്ലെയിം ചെയ്യാവുന്ന എംപ്ലോയേഴ്‌സ് അലവൻസ് 5,000 പൗണ്ടിൽ നിന്ന് 10,500 പൗണ്ടായി വർധിപ്പിച്ചിട്ടുണ്ട്. എന്നിരുന്നാലും, ഈ നടപടികൾ സാമ്പത്തിക ഭാരം വർധിപ്പിക്കുമെന്ന ആശങ്ക സ്ഥാപനങ്ങൾക്കിടയിൽ ശക്തമാണ്, ഇത് ഉപഭോക്താക്കൾക്ക് വിലക്കയറ്റമായും തൊഴിലാളികൾക്ക് തൊഴിൽ നഷ്ടമായും പ്രതിഫലിക്കാനിടയുണ്ട്.