വോൾവെർഹാംപ്ടണിൽ സിഖ് വൃദ്ധർക്ക് നേരെ ക്രൂര ആക്രമണം: മൂന്ന് കൗമാരക്കാർ പിടിയിൽ

ലണ്ടൻ: യുകെയിലെ വോൾവെർഹാംപ്ടൺ റെയിൽവേ സ്റ്റേഷന് പുറത്ത് ഓഗസ്റ്റ് 15ന് രണ്ട് സിഖ് വൃദ്ധർക്ക് നേരെ നടന്ന വംശീയ ആക്രമണം സോഷ്യൽ മീഡിയയിൽ വൈറലായതോടെ ലോകമെമ്പാടുമുള്ള സിഖ് സമൂഹത്തിൽ ശക്തമായ പ്രതിഷേധം ഉയർത്തി. 60-70 വയസ് പ്രായമുള്ള രണ്ട് ടാക്സി ഡ്രൈവർമാർക്ക് നേരെ മൂന്ന് കൗമാരക്കാർ നടത്തിയ ആക്രമണത്തിൽ ഒരാളുടെ തലപ്പാവ് ബലമായി നീക്കം ചെയ്യപ്പെട്ടു. വീഡിയോയിൽ, ഒരു വൃദ്ധൻ തലപ്പാവ് നഷ്ടപ്പെട്ട് നിലത്ത് കിടക്കുന്നതും മറ്റൊരാൾ മർദ്ദനമേൽക്കുന്നതും കാണാം. ഈ ദൃശ്യങ്ങൾ ഒരു ദശലക്ഷത്തിലധികം ആളുകൾ കണ്ടതോടെ, വംശീയ വിദ്വേഷത്തിനെതിരെ കർശന നടപടി ആവശ്യപ്പെട്ട് പ്രതിഷേധം ശക്തമായി.

ശിരോമണി അകാലി ദൾ നേതാവ് സുഖ്ബീർ സിംഗ് ബാദൽ ഈ ആക്രമണത്തെ “ഭീകര”മെന്ന് വിശേഷിപ്പിച്ച്, ഇന്ത്യൻ വിദേശകാര്യ മന്ത്രി എസ്. ജയ്ശങ്കറിനോട് യുകെ സർക്കാരുമായി വിഷയം ഉന്നയിച്ച് സിഖ് സമൂഹത്തിന്റെ സുരക്ഷ ഉറപ്പാക്കണമെന്ന് ആവശ്യപ്പെട്ടു. ഈ ആക്രമണം, 30 വർഷത്തിലേറെ യുകെയിൽ ജീവിച്ച ഈ വൃദ്ധർക്ക് നേരിടേണ്ടിവന്ന ക്രൂരമായ അനുഭവമാണെന്ന് സിഖ് ഫെഡറേഷൻ യുകെ വ്യക്തമാക്കി. വെസ്റ്റ് മിഡ്‌ലാൻഡ്‌സ് പോലീസിനോടും യുകെ ഹോം ഓഫീസിനോടും നീതി ഉറപ്പാക്കാൻ ബാദൽ ആവശ്യപ്പെട്ടു.

ബ്രിട്ടീഷ് ട്രാൻസ്‌പോർട്ട് പോലീസ് സംഭവത്തെതുടർന്ന് 17, 19, 25 വയസുള്ള മൂന്ന് കൗമാരക്കാരെ അറസ്റ്റ് ചെയ്തു. എന്നാൽ, അവരെ ജാമ്യത്തിൽ വിട്ടയച്ചത് വിവാദമായി. സിസിടിവി ദൃശ്യങ്ങളും സാക്ഷികളും ഉണ്ടായിട്ടും പോലീസ് പ്രതികരണത്തിൽ വീഴ്ച വരുത്തിയെന്ന് സിഖ് ഫെഡറേഷൻ വിമർശിച്ചു. സാക്ഷികളോട് 61016 എന്ന നമ്പറിൽ വിവരങ്ങൾ റിപ്പോർട്ട് ചെയ്യാൻ പോലീസ് ആവശ്യപ്പെട്ടുണ്ട്.

പ്രാദേശിക എംപി സുരീന ബ്രാക്കൻറിഡ്ജ് ആക്രമണത്തെ അപലപിച്ചു പോലീസിന്റെ വേഗത്തിലുള്ള അറസ്റ്റിനെ അവർ അഭിനന്ദിച്ചെങ്കിലും, ജാമ്യം അനുവദിച്ചതിൽ ആശങ്കയുണ്ടെന്നും പറഞ്ഞു . ഈ സംഭവം യുകെയിലെ വർദ്ധിച്ചുവരുന്ന വംശീയ വിദ്വേഷ കുറ്റകൃത്യങ്ങൾക്കെതിരെ കർശന നടപടികൾ ആവശ്യമാണെന്ന് വ്യക്തമാക്കുന്നു.

English Summary: Three teenagers were arrested for brutally attacking two elderly Sikh men, forcibly removing one’s turban, outside Wolverhampton railway station on August 15, sparking outrage and calls for justice.