ഗാസയിലെ കുട്ടികൾക്ക് യുകെ തുണയാകുന്നു: ചികിത്സയ്ക്കായി ആദ്യ സംഘം ഉടൻ എത്തും

ലണ്ടൻ: ഗാസയിൽ യുദ്ധത്തിന്റെ ഭീകരതയിൽ പരിക്കേറ്റ 30 മുതൽ 50 വരെ പലസ്തീൻ കുട്ടികളെ വൈദ്യചികിത്സയ്ക്കായി യുകെയിലേക്ക് കൊണ്ടുവരാൻ ഒരുങ്ങുന്നു. യുകെ ഫോറിൻ ഓഫീസ്, ഹോം ഓഫീസ്, ആരോഗ്യ വകുപ്പ് എന്നിവയുടെ ഏകോപനത്തോടെ നടക്കുന്ന ഈ ചരിത്രപരമായ പദ്ധതിയിൽ, ലോകാരോഗ്യ സംഘടന തിരഞ്ഞെടുക്കുന്ന കുട്ടികൾ കുടുംബാംഗങ്ങളോടൊപ്പം മൂന്നാമതൊരു രാജ്യം വഴി യുകെയിലെത്തും. അവിടെ ബയോമെട്രിക് വിവരങ്ങൾ ശേഖരിച്ച ശേഷമാണ് യാത്ര. ഗാസയിലെ ആരോഗ്യ സംവിധാനം പൂർണമായി തകർന്ന സാഹചര്യത്തിൽ കുട്ടികളുടെ ജീവൻ അപകടത്തിലാണെന്ന് ചൂണ്ടിക്കാട്ടി 96 എംപിമാർ യുകെ സർക്കാരിന് കത്തയച്ചിരുന്നു.

2023 ഒക്ടോബർ മുതൽ ഗാസയിൽ തുടരുന്ന യുദ്ധത്തിനിടെ യുകെ സർക്കാർ ആദ്യമായാണ് ഇത്തരമൊരു മാനുഷിക ദൗത്യത്തിന് തുടക്കമിടുന്നത്. നേരത്തെ, പ്രോജക്ട് പ്യുവർ ഹോപ്പ് എന്ന സന്നദ്ധ സംഘടനയുടെ നേതൃത്വത്തിൽ ചില കുട്ടികൾ യുകെയിൽ ചികിത്സയ്ക്കായി എത്തിയിരുന്നെങ്കിലും, സർക്കാർ തലത്തിൽ ഇതാദ്യ നീക്കമാണ്. ഓഗസ്റ്റ് ആദ്യം, ഈ പദ്ധതി അതിവേഗം നടപ്പാക്കിവരികയാണെന്ന് സർക്കാർ വ്യക്തമാക്കി. ചികിത്സ കഴിഞ്ഞ് ഗാസയിലേക്ക് മടങ്ങാൻ ബുദ്ധിമുട്ടുള്ള കുട്ടികൾക്ക് യുകെയിൽ അഭയാർഥി പദവി ലഭിച്ചേക്കുമെന്നും സൂചനയുണ്ട്.

യൂനിസെഫിന്റെ ഞെട്ടിക്കുന്ന കണക്കുകൾ പ്രകാരം, യുദ്ധം തുടങ്ങിയതിനു ശേഷം 50,000-ലധികം കുട്ടികൾ ഗാസയിൽ കൊല്ലപ്പെടുകയോ പരിക്കേൽക്കുകയോ ചെയ്തു. വ്യാപകമായ പോഷകാഹാരക്കുറവും ക്ഷാമത്തിന്റെ ഭീകര സാഹചര്യവും ഗാസയെ വേട്ടയാടുന്നതായി യുഎൻ മുന്നറിയിപ്പ് നൽകുന്നു. 2023 ഒക്ടോബർ 7-ന് ഹമാസിന്റെ ആക്രമണത്തിൽ 1,200 പേർ കൊല്ലപ്പെടുകയും 251 പേർ തട്ടിക്കൊണ്ടുപോകപ്പെടുകയും ചെയ്തതിനെ തുടർന്നാണ് ഇസ്രയേൽ ഗാസയിൽ സൈനിക നടപടി ആരംഭിച്ചത്. ഹമാസ് നിയന്ത്രിത ആരോഗ്യ മന്ത്രാലയത്തിന്റെ കണക്കുകൾ പറയുന്നത്, 60,000-ലധികം പേർ ഇതുവരെ യുദ്ധത്തിൽ കൊല്ലപ്പെട്ടുവെന്നാണ്.

യുകെ, ഗാസയിലെ ആശുപത്രികൾക്ക് സാമ്പത്തിക സഹായം നൽകുകയും ജോർദാനുമായി ചേർന്ന് വിമാനമാർഗം സഹായ വിതരണം നടത്തുകയും ചെയ്തിട്ടുണ്ട്. എന്നാൽ, സഹായ വിതരണത്തിൽ തടസ്സങ്ങളില്ലെന്ന ഇസ്രയേലിന്റെ വാദത്തിനെതിരെ, യുഎനും മറ്റ് ഏജൻസികളും വിതരണം കാര്യക്ഷമമല്ലെന്ന് ആരോപിക്കുന്നു. ഇറ്റലി ഉൾപ്പെടെ മറ്റു രാജ്യങ്ങളിലേക്ക് 180-ലധികം പലസ്തീനികളെ ചികിത്സയ്ക്കായി മാറ്റിയിട്ടുണ്ട്. യുകെയുടെ ഈ പുതിയ ദൗത്യം ഗാസയിലെ കുട്ടികൾക്ക് ജീവൻരക്ഷാ പ്രതീക്ഷ നൽകുമെന്നാണ് പ്രതീക്ഷ.

English summary: London: A group of 30 to 50 critically injured Palestinian children from Gaza will be brought to the UK for medical treatment in the coming weeks.