യുകെ–ഇന്ത്യ വ്യാപാര കരാർ ജൂലൈ 15 മുതൽ പ്രാബല്യത്തിൽ; സ്റ്റാർമറും മോദിയും ധാരണയായി

 യുകെയും ഇന്ത്യയും തമ്മിൽ ഒപ്പുവെച്ച സുപ്രധാന വ്യാപാര കരാർ 2026 ജൂലൈ 15 മുതൽ പ്രാബല്യത്തിൽ വരും. ഫ്രാൻസിലെ ഏവിയൻ-ലെസ്-ബെയ്ൻസിൽ നടന്ന ജി7 ഉച്ചകോടിക്കിടെ ബ്രിട്ടീഷ് പ്രധാനമന്ത്രി കിയർ സ്റ്റാർമറും ഇന്ത്യൻ പ്രധാനമന്ത്രി നരേന്ദ്ര മോദിയും നടത്തിയ കൂടിക്കാഴ്ചയിലാണ് കരാർ നടപ്പാക്കുന്നതിന് അന്തിമ ധാരണയായത്. ബ്രെക്സിറ്റിന് ശേഷം യുകെ ഒപ്പുവെക്കുന്ന ഏറ്റവും വലിയ വ്യാപാര കരാറായാണ് ഇത് വിലയിരുത്തപ്പെടുന്നത്.

കരാർ പ്രാബല്യത്തിൽ വരുന്നതോടെ ആദ്യ വർഷം തന്നെ ഏകദേശം 400 മില്യൺ പൗണ്ടിന്റെ തീരുവ ഇളവുകൾ ലഭ്യമാകുമെന്ന് യുകെ സർക്കാർ വ്യക്തമാക്കി. ഇന്ത്യൻ വിപണിയിലേക്ക് കയറ്റുമതി ചെയ്യുന്ന യുകെ കമ്പനികൾക്ക് പുതിയ വ്യവസ്ഥകൾ പ്രകാരം കൂടുതൽ അവസരങ്ങൾ തുറക്കും. വിസ്കിക്കുള്ള തീരുവ 150 ശതമാനത്തിൽ നിന്ന് 40 ശതമാനമായി കുറയ്ക്കുകയും, കാറുകൾക്കുള്ള തീരുവ ക്വോട്ട അടിസ്ഥാനത്തിൽ 100 ശതമാനത്തിൽ നിന്ന് 10 ശതമാനമായി കുറയ്ക്കുകയും ചെയ്യും. കരാർ യുകെയുടെ വാർഷിക ജിഡിപിയിൽ ഏകദേശം 4.8 ബില്യൺ പൗണ്ടിന്റെ വർധനവ് ഉണ്ടാക്കുമെന്നാണ് പ്രതീക്ഷ.

അതേസമയം, യുകെയുടെ പുതിയ സ്റ്റീൽ സംരക്ഷണ നടപടികളെച്ചൊല്ലി അവസാന ഘട്ടത്തിൽ ഇരുരാജ്യങ്ങൾക്കിടയിൽ ചർച്ചകൾ ശക്തമായിരുന്നു. ഇന്ത്യയിൽ നിന്നുള്ള സ്റ്റീൽ കയറ്റുമതിക്ക് യുകെ വിപണിയിൽ ലഭിക്കുന്ന പ്രവേശനവുമായി ബന്ധപ്പെട്ട ആശങ്കകൾ പരിഹരിച്ചതിനെ തുടർന്നാണ് കരാർ നടപ്പാക്കാനുള്ള വഴിതെളിഞ്ഞത്. ഇതോടൊപ്പം യുകെ–ഇന്ത്യ ഡബിൾ കോൺട്രിബ്യൂഷൻസ് കൺവെൻഷൻ കരാറും പ്രാബല്യത്തിൽ വരും. ഇതനുസരിച്ച്, ഇരുരാജ്യങ്ങളിലുമുള്ള വിദഗ്ധ തൊഴിലാളികൾക്ക് ജോലി വിസയിൽ മറ്റൊരു രാജ്യത്ത് പ്രവർത്തിക്കുമ്പോൾ അഞ്ചുവർഷം വരെ സ്വന്തം രാജ്യത്തെ പെൻഷൻ സംവിധാനത്തിലേക്ക് മാത്രം സംഭാവന നൽകാനും, താമസിക്കുന്ന രാജ്യത്തെ സാമൂഹിക സുരക്ഷാ സംഭാവന ഒഴിവാക്കാനും കഴിയും.

Image Source/Credit: Press Information Bureau, Government of India

The UK-India trade deal will come into force on July 15, boosting trade, investment and skilled worker mobility between both countries.