ഗ്രേറ്റർ മാഞ്ചസ്റ്റർ മലയാളി ഹിന്ദു സമൂഹം വിഷു ആഘോഷിച്ചു
മാഞ്ചസ്റ്റർ: ഗ്രേറ്റർ മാഞ്ചസ്റ്റർ മലയാളി ഹിന്ദു കമ്മ്യൂണിറ്റി സംഘടിപ്പിച്ച വിഷു ആഘോഷം രാധാകൃഷ്ണ ക്ഷേത്രത്തിൽ അവിസ്മരണീയമായി നടന്നു. മലയാളികളുടെ പുതുവർഷത്തിന്റെ തുടക്കം കുറിക്കുന്ന വിഷു, പാരമ്പര്യത്തിന്റെയും സാംസ്കാരിക ഐക്യത്തിന്റെയും പ്രതീകമായി ഈ വർഷവും ആഘോഷിച്ചു.
പൂജാരി കൃഷൻ ജോഷി ഭക്തിപൂർവം ഭദ്രദീപം തെളിയിച്ച് വിഷുകണി ഒരുക്കിയാണ് പരിപാടികൾക്ക് തുടക്കം കുറിച്ചത്. വിഷുകണിയുടെ ദർശനം എല്ലാവർക്കും പുതുവർഷത്തിന്റെ സന്തോഷവും ഐശ്വര്യവും നൽകി. തുടർന്ന്, പ്രശസ്ത സംഗീതജ്ഞനായ ശ്രീ വിശ്വജിത് തൃക്കാക്കര അവതരിപ്പിച്ച സോപാന സംഗീതം ആഘോഷത്തിന് ആത്മീയവും കലാപരവുമായ മാനം പകർന്നു.
കമ്മ്യൂണിറ്റി അംഗങ്ങൾ ഒരുക്കിയ വിവിധ കലാപരിപാടികൾ ആഘോഷത്തിന്റെ മനോഹാരിത വർധിപ്പിച്ചു. നൃത്തവും സംഗീതവും ഉൾപ്പെടെയുള്ള പ്രകടനങ്ങൾ കാണികളെ ആകർഷിച്ചു. ഭക്തിഗാനങ്ങളുടെ മധുരിമയിൽ എല്ലാവരും ഒന്നിച്ച് ഭക്തിയിൽ ലയിച്ചു. വിഷു ആഘോഷത്തിന്റെ പ്രധാന ആകർഷണമായ വിഷുസദ്യ, പരമ്പരാഗത മലയാളി വിഭവങ്ങളോടെ ഒരുക്കി എല്ലാവർക്കും ഒരുമിച്ചിരുന്ന് ആസ്വദിക്കാൻ അവസരമൊരുക്കി.
പരിപാടിയുടെ വിജയത്തിനായി സുധീർ, ശ്രീജിത് നായർ, വിനോദ് ചന്ദ്രൻ, ഹരികുമാർ, ചന്ദ്രശേഖരൻ നായർ, ബിജു നായർ, വരുൺ കണ്ണൂർ, ഷാജി മോൻ, അനി രുദ്ധൻ, രാഗേഷ് നായർ, സിജി സുധീർ, സിനി ബിജു എന്നിവർ നേതൃത്വം വഹിച്ചു. ഈ ആഘോഷം മലയാളി സമൂഹത്തിന്റെ ഒത്തൊരുമയും സാംസ്കാരിക പൈതൃകത്തിന്റെ സംരക്ഷണവും പ്രകടമാക്കി. വിദേശത്ത് ജീവിക്കുന്ന മലയാളികൾക്ക് വിഷു ആഘോഷം നാടിന്റെ ഓർമകളും പാരമ്പര്യവും ജന്മദേശവുമായുള്ള ബന്ധവും ശക്തിപ്പെടുത്തി.
