യുകെയിൽ നാല് മാസത്തിനിടെ രണ്ട് മക്കളെ നഷ്ടമായി; കോട്ടയം ദമ്പതികൾ ദുഃഖത്തിൽ

ലണ്ടൻ: യുകെ സ്വിണ്ടനിൽ താമസിക്കുന്ന കോട്ടയം ഉഴവൂർ സ്വദേശികളായ കെ.സി. തോമസും സ്മിതയും അത്യന്തം വേദനയിലാണ്. നാല് മാസത്തിനുള്ളിൽ രണ്ട് മക്കളെ നഷ്ടമായതിന്റെ ദുഃഖം ഈ കുടുംബത്തെ തകർത്തിരിക്കുന്നു. ന്യൂറോളജിക്കൽ രോഗങ്ങളെ തുടർന്ന് ചികിത്സയിൽ കഴിഞ്ഞിരുന്ന ഏഴു വയസ്സുകാരൻ ഐഡൻ തോമസ് സ്വിണ്ടൻ ഗ്രേറ്റ് വെസ്റ്റേൺ എൻഎച്ച്എസ് ആശുപത്രിയിൽ വച്ച് പുലർച്ചെ ഒരു മണിയോടെ മരണപ്പെട്ടു.

കഴിഞ്ഞ രണ്ട് വർഷമായി ന്യൂറോളജിക്കൽ പ്രശ്നങ്ങളാൽ ബുദ്ധിമുട്ടുകയായിരുന്ന ഐഡൻ, കഴിഞ്ഞ രണ്ട് മാസമായി യുകെയിലെ വിവിധ ആശുപത്രികളിൽ ചികിത്സ തേടിയിരുന്നു. പത്ത് ദിവസം മുമ്പാണ് അവനെ സ്വിണ്ടൻ ആശുപത്രിയിൽ പ്രവേശിപ്പിച്ചത്. ഇതേ രോഗത്തെ തുടർന്ന് 2025 മാർച്ച് 4ന് ഐഡന്റെ സഹോദരി ഐറിൻ സ്മിത തോമസും മരണപ്പെട്ടിരുന്നു. 2024 മാർച്ച് 22ന് സ്മിതയ്ക്ക് ജോലി ലഭിച്ചതിനെ തുടർന്ന് ആശ്രിത വീസയിൽ മക്കളായ അഭിജിത്ത്, ഐറിൻ, ഐഡൻ എന്നിവർക്കൊപ്പം യുകെയിലെത്തിയതാണ് ഈ കുടുംബം.

ഉഴവൂർ സ്വദേശികളായ ഈ കുടുംബത്തിന്റെ വേദന അവർണനീയമാണ്. ഐഡന്റെ സംസ്കാരം, സഹോദരി ഐറിനെ അടക്കം ചെയ്ത സെന്റ് പയസ് ടെൻത് ക്നാനായ കത്തോലിക്കാ പള്ളിയുടെ സെമിത്തേരിയിൽ നടത്താനാണ് കുടുംബത്തിന്റെ തീരുമാനം. ഇതിനുള്ള ക്രമീകരണങ്ങൾ നടന്നുവരികയാണ്, സംസ്കാരത്തിന്റെ തീയതി പിന്നീട് അറിയിക്കുമെന്ന് കുടുംബാംഗങ്ങൾ അറിയിച്ചു.

English Summary:

K.C. Thomas and Smita, a Kottayam couple in Swindon, UK, are grieving the loss of their seven-year-old son Aiden Thomas, who passed away due to neurological issues at Great Western NHS Hospital. This follows the death of their daughter Irene Smith Thomas from the same illness in March 2025. Aiden’s burial is planned at the same cemetery where Irene was laid to rest.