ഡ്രൈവിങ് ടെസ്റ്റ് റദ്ദാക്കലിനും മാറ്റത്തിനും പുതിയ നിയമം: കാത്തിരിപ്പ് സമയം കുറയ്ക്കാൻ നടപടി
ലണ്ടൻ: ഡ്രൈവിങ് ടെസ്റ്റ് മാറ്റുകയോ റദ്ദാക്കുകയോ ചെയ്യുന്നതിന് ലേണർ ഡ്രൈവർമാർ ഇനി മുൻകൂർ നോട്ടീസ് നൽകേണ്ടി വരും. 2025 ഏപ്രിൽ 8 മുതലാണ് ഡ്രൈവർ ആൻഡ് വെഹിക്കിൾ സ്റ്റാൻഡേർഡ്സ് ഏജൻസി (DVSA) പുതിയ നിയമം നടപ്പാക്കാൻ ഒരുങ്ങുന്നത് . ഇത് പ്രകാരം കാർ ഡ്രൈവിങ് ടെസ്റ്റിന്റെ ഫീസ് നഷ്ടപ്പെടാതിരിക്കാൻ 10 പൂർണ പ്രവൃത്തി ദിനങ്ങൾക്ക് മുൻപ് അറിയിപ്പ് നൽകണം. നിലവിൽ 3 പ്രവൃത്തി ദിനങ്ങളുടെ നോട്ടീസാണ് ആവശ്യം. തിങ്കൾ മുതൽ ശനി വരെയുള്ള ദിവസങ്ങൾ പ്രവൃത്തി ദിനങ്ങളായി കണക്കാക്കും; ഞായർ, പൊതു അവധി ദിനങ്ങൾ ഒഴിവാക്കും.
നിയമം മാറ്റുന്നത് എന്തിന്?
ടെസ്റ്റിന് തയ്യാറാകാത്ത നിരവധി പേർ അവസാന നിമിഷം വരെ മാറ്റുകയോ റദ്ദാക്കുകയോ ചെയ്യുന്നതാണ് പുതിയ നിയമത്തിന് കാരണം. ഇത് മറ്റ് ലേണർ ഡ്രൈവർമാർക്ക് അവസരം ലഭിക്കുന്നുണ്ടെങ്കിലും, ടെസ്റ്റ് തീയതിക്ക് സമീപമായതിനാൽ പലർക്കും ക്രമീകരണങ്ങൾ നടത്താൻ സാധിക്കാതെ വരുന്നു. ഇതുമൂലം ഒഴിഞ്ഞ അപ്പോയിന്റ്മെന്റുകൾ ഉപയോഗിക്കപ്പെടാതെ പോകുന്നു. കൂടുതൽ നോട്ടീസ് ഉറപ്പാക്കുന്നതിലൂടെ, മറ്റുള്ളവർക്ക് ആ അവസരം പ്രയോജനപ്പെടുത്താനും ഡ്രൈവിങ് ടെസ്റ്റിന്റെ കാത്തിരിപ്പ് സമയം കുറയ്ക്കാനും DVSA ലക്ഷ്യമിടുന്നു. ഏഴ് നടപടികളിലൊന്നായാണ് ഈ മാറ്റം കൊണ്ടുവരുന്നത്.
മറ്റ് ടെസ്റ്റുകൾക്ക് മാറ്റമില്ല
ഈ പുതിയ നിയമം കാർ ഡ്രൈവിങ് ടെസ്റ്റിന് മാത്രമാണ് ബാധകം. തിയറി ടെസ്റ്റ്, മോട്ടോർസൈക്കിൾ ടെസ്റ്റ്, ലോറി-ബസ് ടെസ്റ്റ്, ഡ്രൈവിങ് ഇൻസ്ട്രക്ടർ യോഗ്യതാ ടെസ്റ്റ് തുടങ്ങിയവയ്ക്ക് ഇപ്പോഴും 3 ദിവസത്തെ നോട്ടീസ് മതിയാകും. പ്രത്യേക സാഹചര്യങ്ങളിൽ—രോഗം, പരിക്ക്, അടുത്ത ബന്ധുവിന്റെ മരണം, സ്കൂൾ പരീക്ഷ, ലൈസൻസ് മോഷണം—ചുരുങ്ങിയ നോട്ടീസിൽ റദ്ദാക്കിയാലും ഫീസ് തിരികെ ലഭിക്കാൻ അപേക്ഷിക്കാം. DVSA ടെസ്റ്റ് റദ്ദാക്കിയാൽ 3 ദിവസത്തിൽ താഴെ നോട്ടീസിൽ ചെലവുകൾ നഷ്ടപരിഹാരമായി നൽകും.
ടെസ്റ്റിന് എത്താൻ കഴിയില്ലെങ്കിൽ റദ്ദാക്കണമെന്ന് DVSA അഭ്യർത്ഥിക്കുന്നു. 2024ൽ ഏകദേശം 60,000 അപ്പോയിന്റ്മെന്റുകൾ ആളുകൾ എത്താത്തതിനാൽ പാഴായി അതായത് 45 പൂർണസമയ പരീക്ഷകർക്ക് ഒരു വർഷം ചെയ്യാവുന്നത്ര ടെസ്റ്റുകൾ. ഇതിനെതിരെ, എത്താത്തവർക്ക് പുതിയ ടെസ്റ്റ് ബുക്ക് ചെയ്യാൻ കൂടുതൽ കാത്തിരിപ്പ് സമയമോ പിഴയോ ഏർപ്പെടുത്തുന്നത് പരിഗണിക്കാൻ DVSA ഈ വർഷം അഭിപ്രായം തേടും.
